موقف موجع حصل لأحد احبابك من اهلك الجميع يدخل

يتبع
وأول مادخلت البيت جوها بناتها وقالوا خالي محمد مات قامت تصيح تحسبه اخوي وتطيح على ركبها ولان اسم اخوي محمد على اسم خالي والمتوفي الله يرحمه خالي وجاتها ضرتها تطمنها تقول اللي توفى خالك ماهو اخوك استغفر الله شوفوا قيمه الاخ تقول ردت لي روحي يوم طلع اخوي عايش ونست هم خالي رغم انه عزيز علينا

الموقف الاول
كنت اقرا ع امي الله يرحمها فجاه قالت قوميني وجيت اقومها الاثقيله ماقدرت ارفعها وهي مريضه كانت الا تتعب عليه وانادي اختي احسبها دايخه اكلها تمر وسكر احسبها غيبوبه سكر الا تجي خالتي تشهد فيها وانا اقول لا غيبوبه سكر اعطوها شي حالي وماتت وانا باقي اقولهم عيبوبه سكر وادق ع الاسعاف بنوديها كلهم عرفوا انها ماتت وانا باقي اقولهم لا ذي غيبوبه سكر
الموقف الثاني
ولدت وجابوا ولدي طيب وبخير بس ماحسيت براحه ومانمت طول الليل وجاء الصبح وكنت انتظر ولدي متى يجيبونه جابوا عيال الي جنبي وولدي ماجابوه وتجي الدكتوره تكشف عليه قلت لها دكتوره ولدي ماجابوه لي قالت ولدك في العنايه المركزه بغيت اتجنن جلست ارجف اقول ليش وشفيه قالت مدري مدري وراحت
واقوم امشي وانا مسوييه عمليه بروح اطمن عليه قالو عنده صمام في القلب
اه كانت اصعب ايام حياتي الله لايوريكم في احد مكروه يارب

الصباح عالساعه ١٠ مر اخوي خالد على امي وابوي و باسهم على يديهم و راسهم وقال بروح للجامعه و كان يلاعب اختي الصغيره عمرها ٦ سنوات يقول : تعالي سلمي علي قبل امشي و رفضت قالت : كلها ساعتين وتجي تتغدى قال : وش دراك يمكن مااجي .... و مسك اختي ورفعها فوق و باسها ونزلها بحضن امي كان يلاعبها ....
عالساعه ٣ الظهر كنت ارتب طاولة الاستقبال من شاهي و قهوه و مكسرات وتمر وحلا كان عندي عشاء و عازمه حريم الحاره وكنت متحمسه ومرتبه بيتي ، الا زوجي يدخل علي و يضمني يقول : اذكري الله . قلت : لا اله الا الله قال : خالد يطلبك الحل ادعي له بالرحمه وتصبري وانا اخوك ...
انا هنا كنت حامل بالشهر الرابع و زوجي كان ينتظر المولود بأحر من الجمر وكان خايف عليه لأن لي ٧ سنوات ماحملت ....
كانت فاجعه لي ماانساه ابد .... مرضت و تعبت و ترقدت بالمستشفى حوالي اسبوع والمسكين زوجي كان بين عيونه الجنين وش اخباره ... وانا بين عيوني خالد اقرب اخواني الله يرحمه و يغفرله 💔💔😔😔
واختي الصغيره مااستوعبت السالفه الا المغرب ان خالد مات فجأه صاحت و بكيت وحالتها حاله ....

موقف حزني اختي كانت حامل بالثامن وخسرت حملين قبله عالشهر الخامس وارابع وحملها هذا كنا متأملين فيه رنت علي امي الصبح قالت اختك توفى جنينها يالله يابنات بكيت من قلب حزنت عليها كانت مبسوطه لانها وصلت للشهر الثامن بس الحمدالله ربي رزقها ولد وبنت بعد هم..

الموقف الأول ولد أختي كان يلعب مع ولد عمه بحديقة بيتهم فجأه حدث له أغماء وولد عمه جلس يصرخ ينادي أختي وشافت ولدها طايح حاولت تنقذه بدون فايده وجلست تصيح بالشارع ألحقوا علي ألحقوا علي وتجمعوا الجيران و أخذوا الولد على المستشفى وعلى طول حاولوا المستشفى ينقذونه ويسون له ضربات كربائيه للقلب والحمد لله أستجاب نوموه بالعنايه المركزه وبعد كم يوم طلع من المستشفى وكنا بنموت من الخوف عليه طلع ماأخذ علاج بالخطأ وعمره 10 سنوات
الموقف الثاني لجارتي كانت تعاني من القولون وجاها أمساك شديد حاولوا معها بالملينات بكل شئ بدون فايده وقرروا الدكاتره أنهم يشيلون القولون عشان الأمعاء ماتنفجر وتموت دخلوها غرفة العمليات والحمد لله بأخر لحظه أخرجت الفضلات وقالوا الدكاتره خلاص ماتحتاج للعمليه وكنا خايفين عليها عشان العمليه كبيره وخطيره وكانت من أصعب اللحظات اللي مرت علي مابينها وبين ولد أختي شئ فرق يوم الأسبوع اللي فات كان من أصعب الأيام اللي مروا علي والحمد لله على سلامتهم