مويا زمزم لنقص ماء الجنين

مرحبا بنات و هذي اول مرا ليا اكتب فيها موضوع هنا..
بس حبيت افيدكم
انا حامل فالشهر التاسع قبل اسبوعين او تلاته تقريباً رحت لدكتورتي و كانت مراجعه عاديه و صدمتني انو مويا الجنين(السائل الامنيوسي) ناقص ف خفت و توترت قالتلي ضروري تروحي قسم الاشعه الترا ساوند و تشوفي
رحت عملت الاشعه و طلعت المويا عندي 4.8 من 15
المفترض تكون 5 اقل مستوى و انا عندي اقل من ادنى مستوى💔
لكم ان تتخيلو الانكسار و الخوف اللي كنت فيه و انا فالاسبوع 37 و طلعت للدكتوره قالتلي انو الاسبوع الجاي تجيني نعمل تحريض للولاده لأن المويا اربعه و شويا و دا تحت المعدل الطبيعي او ممكن ولاده قيصري!!!
المهم طلعت من عندها و اخذت جوالين مويا زمزم و امي الله يسعدها كانت تقرأ لي على المويا ساعات
و كنت اشرب فاليوم الواحد تقريباً جالون كامل 5لتر
قعدت على هذا الحال اسبوع و غيرت الدكتوره لأني ما تطمنت لها لما قالت لي قيصري
و بعدها بإسبوع بالضبط رحت لدكتوره تانيه و شافت حالتي و قالتلي اعملي الترا ساوند و ارجعيلي
و رحت عملت الاشعه و ياربي لك الحمد ما شاء الله تبارك الله المويا كانت فالمعدل الطبيعي ياربي لك الحمد ياربي لك الحمد
اول ما خرجت من عندها سجدت عالأرض ف وسط المستشفى من الفرحه والله
ف حبيت افيد اي وحده عندها نقص ف مويا الجنين عليكِ و على مويا زمزم
و برضو ما يمنع انك تغيري دكتورتك و المستشفى كامل اللي انتي فيه احتياط
الله يسهل لي و يسهل لكم و يبعد عننا كل مكروه♥️