مو طايقة بيتي--فكرولي بخطة عشان اخرج منه-او حتى ادعولي:(

السلام عليكم

من يوم ما اتزوجت من تقريبا خمس سنين وانا ما ارتحت في السكن,,بيتي الاول ارضي ومطل على الشارع وعيال الجيران مش طبيعيين على طول صراخ ولعب وخبط ويحرقوا في اي شي ,,غير كدة حتى وانا داخل يعني مو في الغرف اللي على الشارع فباب الجيران قريب جدا مني لدرجة اسمعهم وهم داخل بيتهم واسمع طبعا اي احد يدق عليهم واللي داخل واللي خارج من عندهم,,جلست في بيتي الاول سنتين وكنت اضغط على زوجي اننا نخرج منه لحد ما اصحاب البيت طلبوا مننا اننا نخرج لان صاحب البيت بيجيب مرته الثانية يسكنها فيه,,طبعا فرحت لكن المشكلة انهم ضغطونا بحيث ماعرفنا ندور البيت اللي اتمناه وتكررت المأساة وبيتي الثاني نفس مواصفات بيتي الاول :( بعد ماقلت اني برتاح لكن مافي راحة,,وزيادة كمان ان المطبخ والصالة فيهم منور على مطابخ وصالات الجيران,,وطبعا الكل عنده عيال ماعدا انا هذا غير ضيوفهم وحفلاتهم اللي ماتخلص,,واللي زاد وكمل ان صاحبة البيت جالسة تشطب الطابق اللي فوقي وهات يادق طول اليوم احس كانهم بيطيحوا فوق راسي,,اتخيلوا حالتي :( عيال الجيران في الحوش على طول يلعبوا وفي الشارع وانا مرات انجن واصيح وهم يضحكوا عليا,,المشكلة اني احب الاطفال ما اعرف اكون عنيفة معاهم فما يسمعوا كلامي بالاضافة انهم اشقياء جننن ,,ضغطت على زوجي كثير اني اخرج من البيت,,مرات بالشدة ومرات باللين حتى مرة قلت لهم يمكن الله ماكتب لنا يكون عندنا اطفال عشان نرتاح!! لكن مو معقولة اني اعيش مع جيراني كلهم,,على اني تعبت في بيتي ولي الان تقريبا ثلاث سنين فيه وفرشه احسن فرش والديكور حلو لكن تصميمه زفت مو عارفة ارتاح وللا انام فيه,,ادعي ربي انه يخرجني من هذا البيت ليل نهار وان زوجي يقتنع ,,بنات شوفوا لي خطة مع زوجي والله انه بارد وماهمه,,واصلا هو نومه ثقيل ومتعود على الازعاج عكسي انا نومي خفيف واي شي يصدع راسي,,حاسة طول وقتي معصبة وارتاح لما اروح عند امي ,,واذا ماعندكم خطة وللا نصيحة ادعولي اني اخرج من البيت للبيت اللي اتمناه وان الله يرزقني الحمل السليم التام المعافى عاجلا غير اجل ويجعل ذريتي من العباد الصالحين