مو كل مشكله حلها: اطلبي الطلاق.. روحي لاهلك🤦🏻‍♀️

بنات اتوقع كلنا عندنا مشاكل زوجيه.. اللي مشاكلها صغيره واالي مشاكلها كبيرة.. بس ملاحظه اذا وحده كتبت مشكلتها يجون بنات ينصحونها بالطلاق او تترك بيتها😦 وعلى هالموال كل شوي..



اعتقد صارت هبه بين الجيل الجديد من المتزوجات اللي كل ماصار شي اخذت عفشها وراحت لاهلها زعلانه وانتظرت المحروس يرجعها.. عاد ان مارجعها جت تبكي بالمنتدى بعد فتره وتقول ادعوا لي ارجع بيتي🤨.. طيب ليه اصلا تعملي هالشي ليييييه 😪
اذا المطلقة وهي المطلقه الشرع نصحها ماتترك بيتها فليه تتركون البيت.. ترى هذا بيتك انتي مو بيت زوجك.. فاهمه يعني ايش بيتك؟



يعني كل شي فيه يخصك طول ما انتي على ذمته.. اللي تترك البيت كل شوي ثقتها بنفسها مهزوزه او ماهي حاسه انها كفو تملك هالبيت.. خصوصا اللي تزعل على اشياء تافهه💔



وبعدين محد مستفيد من ترك البيت الا زوجك.. عطيته فرصه يفلها ويتسدح ويتبطح.. لا مسؤوليه زوجة ولا عيال ولا جب ولا تعال ولااااا شي عزوبيه فاخرة😎
وانتي منحشره بغرفه ببيت اهلك مع اطفالك☹️ واهلك متورطين بمشاويركم وهذا مرض خذه ياخوي للطبيب وذا يبي بامبرز جيبوا له الخ..






نجي الحين للجد.. متى اترك بيتي واروح لاهلي؟
الجواب: اذا زوجك ضربك ومد يده عليك
هنا اتركيه واهربي لان مافي اي امان معه ولان الضرب شي يبي له رجال.. بس.. بس يا بنات..
اما العصبيه والاهمال والبخل ومايصرف والا يغازل والا يشتم فهذي امور تقهر صح.. بس ترك البيت مايحلها بالعكس يزيدها ويشعللها.. خلاص كبرنا وصرنا امهات مو طفلات نتشكى عند اهلنا: بابا قال لي كذا.. يا ماما شتمني يا ماما مقاطعني الخ..




ارجوكم بنات.. ارجوكم ارحموا اهلكم ترى والله يغتثون عالفاضي💔 بالنهايه الرجال ان خاف واستحى مره بكره بيطنش ويقول لك طز فيك وباهلك ويقطك عندهم ولا يسأل فيك.. 🤕






انتم اناث عندكم اسلحة قويه.. معطلينهاااا
تدرون ايش اكثر شي يقهر الرجال؟
انك ماتشوفينه رجال.. ماتعتبرينه رجال..
اذا غاثك مره العبي على هالوتر
ولا تشوفينه شي اصلا.. كأنه شفااااف






بتقولون وشلون يا مناير؟
حبيباتي ماسمعتوا بالتجاهل التكتيكي؟
التجاهل ثم التجاهل ثم التجاهل التااااااام
ان غلط عليك والا جرحك والا شتمك.. شوفيه هو والكرسي واحد.. والله ان يمووووت والله ان يقهرررر.. حتى لو تجلسون اسبوع واسبوعين على هالحال عادي ادبيه بطريقتك..






بعطيكم كم فكره تغث الرجال..
اول شي بكاء ممنوع.. دموع ممنوع..
حزن ممنوووووع.. لا تسمحي له يزعلك فاهمه
ابكي بالحمام لحالك كيفك
بس بمرحله التأديب كوني مبسووووطه..
خصوصا اذا هو مزعلك ومتجاهلك..
هذا مستهين فيك.. فجيبي راسه..
وعلميه انه لا هو ولا عشره منه يهزون منك شعره..




اولا
لاعبي عيالك ودلعيهم بصوت عالي☺️
ناغشيهم.. قلبوووس قلبووووس بوسه بوسه
والله ان يغتث ان مر وسمعك..




اثنين..
اذا شفتيه بيطلع افتحي شنطه المكياج
وابدي تشيكي عالتسريحة..
يعني جالسه تكشخين بس مو له..
وخلك على سنقه عشره..
والله ان يحتار وينقهر..
خصوصا اذا جلستي تغنين مع نفسك كنك سرحانه..




ثلاثه..
اذا انتي تدلعينه بالطبخ والاكل.. خفي..
ودي اقول لا تطبخين واطلبي دلفري..
بس ادري بعضكم رحيمات
اوكي.. اطبخي اكلات يحبونها عيالك..
اذا اكل منها بكيفه.. واذا ما اكل طز.. 🙂




رابعا..
وقت النوم لا تدخلين الفراش معه..
يا قبله يا بعده بوقت.. وفهمكم كفايه




خامسا..
قبل رجعته كلمي صديقاتك والا خواتك وكعيها ضحك وسواليف.. ابي يدخل وانتي مفرفشه وكل يوم يشوفك اسعد من اللي قبله..
هذا مسج معناته: فرقاك عيد 😅




سادسا..
اللي عندها سناب والا انستغرام لا توقف تصوير.. طبخات خلطات بزران اكواب قهوه الا تبون..
وانتبهي تكتبين كلام حزين! ممنووووع..
اكتبي عبارات حلوه: سعيدة بحجم هذا الكون..
بوسه لاجمل صديقات..
احب قهوتي لانها رقيقة مثلي..
سويت الذ سوشي لي لاني احب ادلعني
وهكذا 😇




باقي نقاط كثيره بس تعبت..
زبدة الكلام انتي انثى عندك اسلحه: العيال والاكل والجنس والراحة وكل شي
اللي مايحترمك ويقل ادبك معه اسحبي كل شي كان متوفر له وماعرف قيمته.. وزيدي عليها حقران واستفزاز بصمت.. هذا يسمونه الانتقام الرااااقي..
بيستسلم ويجيك يركض هنا الكره بملعبك.. اذا الموضوع بسيط اقبلي رضاوته..




اما اذا شي كااااايد وجايب العيد معك فلا تسامحينه بالساهل وواصلي التجاهل التكتيكي مده اطول والله ان يمشي ويكلم نفسه.. اذا غلطته كبيره خلي تجاهلك شهر عشان ينحفر بباله ليوم الدين..






بس ترى كلامي للمشاكل اللي فيها اهانه وسب وشتم وقله ادب وتنكيد.. خلكم ارقى من هالرجال الدفشين.. بدون خضوع واستسلام وتبكبك.. قوتك في انوثتك ياقلبي💓






الله يهنيكم يا بنات ويسخر لكم رجالكم..