مو مشكلتي مالي دخل

السلام عليكم
بعد اصرار من زوجي يبيني احمل ربي اكرمني و حملت الحمدالله لكن يوم حملت
على باله زوجي انه سهل وماراح يتغير شي شاف الوضع غثيان خمول تعب صداع وجه شاحب اهمال للاطفال رغم انهم كبرو ١٢ و١١ سنه و ٥ سنوات لكن قبل اصحى اصحيهم اجهز الملابس يتغدون يأذن المغرب يروحون مع ابوهم يوميا يتقهوون مع جدتهم الاذان العشاء يرجعون اجهز عشاء كلي نشاط وحيويه البيت نظيف الحوش مغسول الملابس مغسوله الآن كل شي اختلف فعاليا
اهمال ملابس مكومه حمامات قذره ننتظر بالاسبوع مرتين يجون العاملات اللي بالساعات عشان يغسلونها وينظفون البيت انا شغل المواعين بناتي يغسلونها انا اذا وقفت خمس دقايق دخت زوجي انسان يعشق النظافه ومتعود عليها خصوصا انه انا طبيعتي نظيفه ومنظمه زوجي مل فعليا مل طفش 😐 قال حملتي قبل ماشفتك كذا قلت قبل الوضع مختلف شقه صغيره ماتقارن في فله وحوش و٣ طوابق اكيد بتفرق قال نستاجر عاملة دائمه رغم انه مقدمين لكن ماجت طلعن غاليات جدا الشركات تاجرها بمبالغ خياليه قلت الحل يازوجي طنش وغمض ماش زوجي بدًا يتأفف والله ورب الكعبه فيني تعب وغثيان ما اقدر اتعب ولا اشتهي اذا شفت الحوش مغبر ودي اغسله بس مقدر تعبت واللي بالساعات يجوني مرتين بالاسبوع تنظف ثم اذا طلعت جتنا موجة ذا الغبار اللي رجعت البيت كأنه مهجور شهر والله تعبت هذا غير بناتي اصحى وافطر وبناتي نايمات اناديهم مايردون نايمات ثم يجي زوجي من دوامه الظهر يلقاهم نايمات يبداء يهاوش ويزاعق صاير البيت يطفش يضيق الصدر كلكم كئيبين طيب عشاني تعبانه الفتره هذي قال مو شغلي تعبت انا مقدر اقدر ولا اراعي صارلي شهر مجاملك كل يوم اقول بكرا تطيب خلاص اذا تعبانه روحي بيت اهلك لاتتسدحين عندي حومتي كبدي قلت افاااا بس هذا وانت اللي منهبل تبي الحمل اجل لو ماتبيه كان وش سويت المهم راح وهو معصب وانا جلست افكر قلت يالله ذا الرجال لا احساس والمشاعر ولا رحمه قمة بالانانيه سبحان الله لو يحسون بس بنصف الالم اللي نحسه كان تلاقينه ٢٤ ساعه مايتحرك بالسرير لو يزكم كان مسكين يجيه هلع من مستشفى المستشفى واحنا حمل ووهن وتعب يشوفه بعينه ولايرحم او يشفق سبحان من خلقهم لاذمه والضمير والله يا شلت بقلبي عليه انصدمت ماتوقعته كذا ابداااا