ميته تبين تستخدمين دابر أملا وخايفه من الريحه تعالي هنا

السلام عليكم ورحمة الله وبركاته 
شخباركم بنات 
اليوم موضوعنا عن الزييييت المعروووف اللي ماله منافس
زيت دابر أملا
انا من مستخدمينه وزبوونه عندهم طبعا انا اللي مكسبه شركتهم ولا كان وقفوه من زمان هع
المهم
انا اعاني من ريحته للأسف حالة استنفار في البيت مني لمن احطه لكن شسوي فأضطر اني اتركه واروح لزيت ثاني عافيه ولا فازلين ولا زيت زيتون 
ولا البث الا القليل وارجع له لانه الى الآن أفضل شي استخدمته وأكثر شي يقهرني انه ريحته ماتروح بعد الغسييل وكل ماتبلل الشعر تطلع ريحته وقلت لازم أشوف حل جذري للريحه
لان قبل كنت احط خمريه بس تخف الريحه ولما يتبلل ترجع يعني ماكانت تفيد لأن احيانا اغسله قبل الدوام ويكون لسا ماجف والريحه طالعه وواضحه أما البخور صعبه شوي لاني احطه يوم ورا يوم

المهم رحت ادور بالنت لطريقه 
والحمد لله لقيت طريقه سهله وقلت بجربها 
وهي انك تحطيين ملعقتيين جيلي كرز وتخضين علبة الشامبو
لين يصير لونه وردي 
وخلاس تغسلين شعرك بالشامبو مرتين

سويت هالطريقه وانا فاقده الأمل قلت ان راحت زين وان ماراحت يارب تخف

غسلته ونشفته بمنشفه الشعر شوي وفتحته 
قمت أشم...... 
اشم عدل يمكن يتهيأ لي...... 
أشم أقوى يمكن خشمي تعود ع ريحته....... 

تخيلوا. ماصدقت نفسي!!!! 
رحت ركض عند أمي شمي شمي وش ريحة شعري.؟ 

تقول شامبو قلت جد شمي عدل قالت ايه مافيه ريحه كله ريحة شامبو 
رحت عند اخواني وش ريحة شعري يقولون مافيه ريحه قلت ولا ريحة دابر أملا ولا شي قالو لا 
قلت الحمممد لله الحييييين صدقت هههههه 


وطبعا جيت ركض هنا عشان اقولكم الطريقه 
لان قريت ان في بنات كثير يبون يستخدمونه لكن ممتنعين عشان الريحه وأغلبهم متزوجات 
قلت ليش أمنع الخير؟ 

،

وانا احب أمشي على حديث الرسول عليه الصلاة والسلام ( حب لأخيك ماتحب لنفسك) هذا كل اللي عندي اليوم جربو الطريقه وادعولي بالهدايه والصلاح والتوفيق دنيا واخره وطبعا لكم بالمثل وادعوا لوالدي ان الله يحفظهم ويطول بأعمارهم الله يسعدكم دنيا. وآخره.......