مينى ساندوتش هامبورجر

المكونات

16 جرام كيزر مينى
400 جرام لحمة مفرومة
1 بيضة
كمون
كارى
سماق (بهارات للحمة والفراخ)
فلفل حار
ملح
فلفل رومى بارد
زيت زيتون
جرجير
خيار مخلل شرايح
جبنة موتزاريلا او رومى
مايونيز
3 ثمرة طماطم طازة
40 جرام سكر
ينسون مفروم
16 خلة اسنان

طريقة عمل مينى ساندوتش هامبورجر

فى حلة غويطة، تحطى اللحمة المفرومة وتكسر عليها البيضة، وتضيفى عليهم حاجة بسيطة من كل نوع من التوابل اللى عندك وفى الاخر تضيفى معلقتين كبار زيت زيتون.
بعد كده تخلطيهم كويس جدا (يفضل تخلطيهم بايديك).
وبعدين تسبيهم فى التلاجة لمدة 3 ساعات.
بعد ال 3 ساعات. تطلعى الحلة من الثلاجة وتبدى تعملى اللحمة كور.
وعلى رخامة المطبخ تفردى كور اللحمة على شكل قطع الهامبورجر وعلى حجم الكايزر اللى عندك . وبعد كده تغطيهم لغاية وقت تشويحهم.
بعد كدة تحضرى الكاتشب. تجيبى حلة صغيرة وفيها ميه وتسبيها تغلى.
بعد كدة تقطعى الطماطم قطعتين أو اربع قطع، وتحطيها فى المية المغلية لمدة 4 دقايق.
بعد كده فى طبق غويط فيه مية بثلج، تبردى الطماطم بعد ما تطلعيها من المية المغلية.
بعدين تقشريها وتقطعيها قطع صغيرة جدا.
بعد كدة تجيبى طاسة وفيها زيت، وتضيفى الطماطم مع السكر والينسون مع رشة ملح. وتسبيها على نار هادية لغاية ما الطماطم تاخد لون غامق.
وفى طاسة تانية فيها زيت، تبدأى تشوحى الهامبورجر على الجانبين لغاية ما يستوى كويس.
وتبتدى تفتحى الكايزر، وتحشيه الاول بالجرجير وبعد كده قطعة هامبورجر وفوقها شريحة جبنة.
بعد كدة تضيفى الكاتشب والمايونيز، وفوقهم شرايح الخيار المخلل.
وتسبتيها بخلة اسنان فى النص زى ما هو واضح فى الصورة كدة.
تقديمها سخنة مع بطاطس صوابع مقرمشة وقطع زيتون مخلل. وبالهنا والشفا. وبالهنا والشفا.