مين تعرف انجبر على الزواج؟

بسم الله الرحمن الرحيم

السلام عليكم ورحمة الله وبركاته

عذرا العنوان كان مفروض يكون : مين تعرف أحد انجبر على الزواج؟

فلو وحدة تعرف كيف أعدل العنوان تساعدني جزاها الله

المهم..

كل مافي الأمر ..أني أحتاج مشورتكم

حيث أن لي أخ يعمل في مجال فيه احتكاك بالنساء أحيانا

المهم وكان أول يكلم الوالدة أنه يبي يتزوج عاجلا غير آجل

لكن كان صغير جدا وقتها وحالته المادية لاتسمح أبدا...وحتى فكريا ماكان ناضج وقتها

المهم ..

مرت السنين ..وتغير الحال ...صارت الوالدة تتحايل معه يتزوج وهو يرفض

يقول أنا مشغول بالدراسة والعمل

المهم..بعد فترة خطبناله وحدة..

في البداية مارضي وحاول باستماته انه يخرب الموضوع

لكن يوم شافها ....عجبته وعجبتنا وهي بعد خلاااااص تعلقت مره

وكان كل ماتجي سيرتها في أي جلسة عائلية يمدح فيها

والكل خلاص اقتنع أنه انحلت المشكلة

وهوا طبعه كذا في البيت يحب يفرفش ويستهبل وينكت...فكان كل ماتجي سيرتها تقلب الجلسة فرفشة وبسطة

بس كنت ألاحظ في عينه نظرة غريبة!

المهم..اليوم أنا واياه جلسنا جلسة مصارحة...قام قلي ..

أنا كذا كذا مغصوب على الزواج..فمافرقت انبسطت ولا لاء..عشان كذا خليني أسوي نفسي مبسوط أريح لي بدال المشاكل!!

وجلس يقول آآه لو تعرفي القصة كاملة

وصراحة أنا فاهمة عليه..هو يتمنى يختار وحدة بنفسه من (زميلات العمل)..وأنها تكون مثقفة وتفهمه..الخ!

وسبق وتعرف على وحدة ..الله يهديه..لكن الموضوع انتهى وقطع الموضوع (وهو مايدري أني أدري)

هو الله يهديه في خير ..لكن متنااااقض

ومتأثر بأصحابه اللي كلهم آخذين من زميلات العمل !

المشكلة..البنت اللي اخترناها ..صفاتها مره حلوة ماشاء الله..دين وأخلاق وشكل

لكن هو حاط عقدة في نفسه أنه مجبور..وأنه مايبغى إلا وحدة من بيئة عمله..المشكلة هو مقصر دينيا نوعا ما..فأحنا لو نعرف أنه راح يختار ذات دين وعقل..كان تركناه يختار ...لكن راح يختار وحدة راح يندم عليها بعدين..لأنه غيور ..والحمدلله فيه خير..لكنه الأن في فترة مشاعر طايشة...مع أنه مو مرة صغير في العمر

فأبغى مشورتكم..اش التصرف الصح معاه..

علما بأننا والحمدلله أسرة مترابطة

وبيننا حوار

فأتمنى اللي تعرف أحد حصلت معاه ظروف مشابه تفيدنا...أو حتى أي وحدة ممكن يكون عندها حل