اهلين يا عيني
والله يتمم عليك يا رب

وانصحك تسويها في مركز الأعمال بمستشفى الشميسي
ولا تستغربين علشان الشميسي مستشفى حكومي
للعلم عندهم احدث جهاز ليزك في الرياض
عندهم الدكتور عبدالملك القحطاني
والعملية مع كل تكاليفها ب 5000 ريال فقط واذا تعرفي احد يشتغل هناك تصير ب4000 ريال فقط لاغير :42:
طبعا لأنه مركز اعمال لكن تابع لوزارة الصحة
رقمهم 4355555 تحويلة 1425

انا كنت كاتبة تجربتي معاهم من زمان والعملية ما فيها ألم ابدا
موفقة يا قمر

الف الف شكر يالغاليات
ناعمه..حلى..n3omh..ترانيم..كحيله ياعسل شكرا عالشرح تعبتك معي
اسيرة..حنين..زينه..اكشن..ماشي الحال..قلب الياسمين..مس هايدي
الله يجزاكم كل خير
والله ماتوقعت هالتفاعل
الله يسعد ايامكم..ويكحل عيونكم بالعافيه
بس مستغربه اشلون اسويها في مستشفى حكومي زي الشميسي.. وبفلوس
والله اخاف من الشميسي..الظاهر بسويها بالحبيب..
من اول هو علي بالي وكثير منكم شجعوني
ماشي الحال..قلتي الحرس بام الحمام؟؟
هذا بفلوس ولا ببلاش؟
ماسألتكم بنات..اشلون نظركم بعدها..ممتاز؟؟

مشكورين حبيباتي يعطيكم الف عافيه
ولكم مودتي..

8
8
ياخيه سوي العمليه وانبسطي
لي سنه مسويتها مدري شلون كنت عايشه قبل العمليه احس اني غبيه لاني ماسويتها قبل

شوفي الدكتور يوسف المقبل مركزه بشارع التخصصي عند بنك البلاد
الدكتور مره شاطر
سويتها عنده انا وخواتي وصديقة اختي كلهم قبلي بسنوات واذكر الممرضه قالت لي انه سوا لها العمليه قبلي بسنه وانها بالمره ماعانت من شي بالعكس تمام ومن بكره داومت عادي <<يعني خمس مجربينه


من ناحيتي مافيه الم راس ولا حاجه
بس اول ماطلعت من العمليه كنت مابي افتح احس تتعبني عيني اذا فتحت
رجعت البيت ونمت مباشره
صحيت من بكره ولا فيني الا العافيه لا صداع ولا غيره
طبعا هو عطاني اجازه ثلاث ايام والا كان يقول لي عادي ينفع اداوم من بكره بس تعرفين فرصه اخذ اجازه :icon20:
بس جلست فتره اتعب بالقرايه والكتابه بما ان الخط يكون صغير ويبي تركيز
طبعا العمليه كانت جدااا سهله
ومثل ماقالوا البنات لبسوني البالطوا الاخضر وحطوا الكمامه والراس غطيته ونظفت الممرضه العين من اثار الكحل قبل يبدون العمليه <<طبعا ما منعني الدكتور من الكحل يقول عادي حطي حنا ننظف لك العين قبل العمليه
بعدين حطت الممرضه قطرة بنج وبدا الدكتور يشتغل اللي طلبه مني اني اركز بنظري على نقطه حمراء وبس ما احس بشي بالمره وما اشوف اي شي غير سواد وفيه نقطه حمراء
بعد ما انتهى بدا ينظف العين او مدري وش يسوي تسنه يكنسها :3_2_8v: <<<تسمع بالتشبيه :biggrin2:
لابجد كانه يكنسها يعني تخيلي نفستس منسدحه وفوقتس قزازه والناس من فوقها ينظفونها :biggrin2:
تدرين وش رايتس تسوين بروفه قبل العمليه انسدحي وحطي لتس قزازه على وجهتس وخلي اختتس تمسحها عشان تروح رهبة العمليه عقب :icon31:
عطاني قطرات بعد العمليه وحده استخدمتها بس ثلاث ايام والثانيه استمريت عليها يمكن شهر وهي عباره عن معقم للعين فقط ويقول عادي لو استمر باستخدامها على طول ولو يستخدمها اي شخص بعد لانها عباره عن معقم ماتضر
طبعا كم يوم قال لي احرص لايجي عيني مويه ولا اعركها بالمره
بعد ماسمح لي اغسل العين قال لي اغسلها بشامبو جونسون كل كم يوم
طبعا انا قبل العمليه غثيته بالاسئله كنت اقول له عادي اجلس عالكمبيوتر والتلفزيون بعد العمليه او يبي لي فتره
قال لي شوفي تقدرين تقومين من العمليه ومباشره تجلسين عالكمبيوتر مافيه اي مشكله
وسالته عن النظاره الشمسيه قال لا مو لازم لاتلبسين
بس انا لبستها فتره لان النور القوي كان يتعبني لفتره وان ماكان التعب شديد وتركت التلفزيون والكمبيوتر بعد عاد هذي مو من تعب بس زيادة حرص هذي عين مو حي الله

والنظر بعد العمليه ممتاز ممتاز ممتاز
طبعا النظر مايرجع كامل مره وحده بعد العمليه بالتدريج يتحسن<<بالتدريج خلال فتره قصيره مو طويله
كل ماجيت مراجعه تحسن نظري فيها اكثر لين اكتمل ولله الحمد

سويت العمليه بخمس الاف خواتي قبلي عند نفس الدكتور بس اكثر بثمانيه وفوقها
على فكره الدكتور نفسه كان بالحبيب اول وفي كذا مستشفى غيره لين فتح له مركزه الخاص
بالاخير اقول لتس توكلي على الله وسويها

انا سويتها تقريبا قبل ثلاث سنوات
وعيوني الحمدلله للحين تمام
سويتها بمستشفى المانع بالخبر
مع اني من الرياض
بس لاني اختي بالخبر وجربته
فقلت واحد مجرب احسن من واحد ماعرفه
والله يسهل عليك امرك
وتراها ابد ماتخوف
منتب حاسه بشي وبينتهي الموضوع بسرعه
وبتعدين تقولين ..وش كان مصبرني على النظارات كل هذاك الوقت

وانا اشهد:42:

شوفي حبيبتي انا سويت العمليه عند د.عبدالرزاق الصالح قبل سنتين
موقع عيادته ورا مستشفى الوطني اللي بالملز

ماشاء الله عليه رجال صالح الله يثبته طول العمليه وهو يسمي ويدعيلي وكلاامه مرره مطمن اذا كنتي خايفه مثلي

بقولك نظري كان رايح فيها - 5.75:42: والبس نظارات وعدسات من عشر سنين

والحمدلله يااارب يوم سويتها ارتحت من هم العدسات
تخيلي عشر سنين وانا مرتبطه بهالنظارات او العدسات لاااعرف اسبح زي العالم بالمسابح:(

توكلي على ربك حبيبتي وسويها