مين صار عندها تساقط شعر رهيب بعد اصابتها بالكورونا؟ تجربتي والعلاج

السلام عليكم ورحمة الله وبركاته يا جميلات عالم حواء
الموضوع هام لكل وحدة عندها تساقط شعر , واسال الله ان يأجرني عن هذي المشاركة اللي هيا تجربتي الشخصية.
من دون تأخير حابة أقولكم شو سبب مشاركتي للموضوع.

بشهر 10 اللي طاف 2021 , انصبت للمرة الثانية بالكورونا لكن هذي المرة كانت اصابتي قوية وتعبت لمدة شهر كامل.
خلال هاي الفترة كان شعري بحالته الطبيعية كثيف وصحي.
ما مر شهر ونص من فترة التعافي عندي الا وبدأ عندي تساقط الشعر بطريقة جنونية ... بمعنى كل ما المس شعري تنزل خصلة ...

البيت الارضية كلها شعر , الحمام شعر وحتى لما اصحى من النوم مخدتي عليها شعر والمصيبة ان الشعر اللي ما طاح ينقطع من النص , لدرجة لو تشوفون شعري الان طاح عنه على الاقل 60% واللي يشوف كاني قاصته مثل الاولاد... صرت استحي اقعد جدام زوجي لهالسبب ودايما احط ربطات عشان تخفي الشعر.

على العموم , بحثت بشكل مكثف في الموضوع ودخلت على قناة دكتورة جلدية امريكية على اليوتيوب كانت تتكلم على الموضوع , الصدمة كانت التعليقات!!!! والله يا بنات تعليقات كثيرة لناس يقولون كلهم صارلهم تساقط شعر فظيع بعد اصابتهم بالكورونا السنة اللي فاتت وكانو مو فاهمين السبب ويعتقدون المشكلة عندهم لوحدهم ..خصوصا كثيرين اصابتهم ما كانت اول مرة بالكورونا والمرة اللي فاتت ما حصل اي تساقط في الشعر عندهم... بالضبط مثلي أنا. حتى ان في ناس قالو جاهم الكورونا خفيف مثل الزكام لكن مع ذلك صار تساقط الشعر.
على العموم في ابحاث جديدة طالعة اتقول الكورونا السنة اللي فاتت بالمتحور دلتا سببت هالمشكلة مو عند الكل لكن عند ناس وايدين , والدكتورة قالت:
أن ممكن عند البعض يوصل نسبة تساقط الشعر الى 70% وياخذ يمكن مدة 8 الى 9 شهور عشان الشعر يوقف التساقط ويبدا ينمو مثل الاول !!!!!!!!!!!!!!!!!!!!
سوري, طولت عليكم يا بنات لكن اصبروا معاي .
المهم رحت دورت عن وصفات طبيعية للشعر وحبوب فيتامينات تساعد اتوقف تساقط الشعر ... وربي هداني أكتشف مكون طبيعي رهيييييييب اللي هو نعمة وهدية ربانية اللي هو ((((((((((((( القرنفل))))))))))))))))).
استخدمت مطحون القرنفل بطريقتين وخلال شهر واحد شفت ان التساقط قل بشكل ملحوظ وكبير الحمدلله وشعري صار ناعم .... الطريقتين بعد تجارب في الخلطات و هما :
الوصفة الاولى : أدفي زيت زيتون بكمية كافية لطول الشعر و أحط معاه ملعقة أكل من القرنفل المطحون بشكل ناعم... واخليه في شعر مع تدليك الفروة الى الاطراف, يتغطى الشعر وتنترك الوصفة لمدة ساعة الى 3 ساعات وطبعا الشعر يتغطى بكيس بلاستيك , وبعدها ينغسل وينحط بعده بلسم ....ممكن استخدام الوصفة هاذي مرة الى مرتين بالاسبوع.
اللي شعرها دهني جدا بطبيعته اتخليه على الشعر مدة ساعة وحدة .
الوصفة الثانية ( مرة وحدة في الاسبوع) :
جبت مايونيز 3 ملاعق كبار ( ملاعق الطعام) ... او اكثر حسب طول الشعر.
ملعقة كبيرة قرنفل مطحون بشكل ممتاز
زيت زيتون أو زيت جوز الهند ملعقة واحدة
صفار بيضة وحدة......
وتركته في شعري بدون مبالغة مدة 4 الى 5 ساعات اول مرة لاني كنت جدا حزينة من حالة شعري...... والله العظيم يا بنات ما اوصفلكم اللمعان والنعومةوالاهم بعد الاستخدام لمدة شهر تقريبا كان التساقط قل جدا جدا.... لك الحمد يارب.
(((بالنسبة لبياض البيضة ماراح نرميها: البياض ممكن استخدامه مع ملعقتين كبار سدر مطحون وينحط ع الوجه مدة 15 دقيقة وبعدا بنغسل الوجه وضروووووري يترطب ينظف الوجه بشكل خيااااااااااالي.))
هذي الوصفات أمنة ومفيدة جدا لكل بنت وسيدة عندها تساقط شعر بسبب الكورونا ولا حتى غيره ... لكن مع الاستمرار.
و أخيرا: اخذ فيتامين البيوتين والسيلينيوم والزينك , لانهم يساعدون في طول الشعر.