مين عنده صبر يبيعه اشتريه ؟

السلام عليكم ورحمة الله

أمر الله سبحانه وتعالى ببر الوالدين الله يقدرنا

لكن لما يطيح أبوك من عينك مثلا وحدة أعرفها أبوها يتحرش بالبنات الصغار
وفي مره كشف على عورة بنت خالتها - طفلة -ولمسها وكرهته

ووحدة ثانية شافت رسالة من ابوها الي مطلق امها مرسلها من جواله لوحده يقولها : تبين نمارس الجنس ؟
وصارت تكره تاخذ شي من يده يعطيها تفاحة ماتقبلها

ووحدة مرت بظروف صعبة كثيرة جدا ومؤلمة والطبيب الي يعالجها يقولها كويس ماجاك مرض نفسي
وتعاني من امها كثير الي هي جزء من مشاكلها

لما وحدة تجي تشتكي بالمنتدى وتتكلم تجي وحدة تقول ابوك يا عاقة وانت ماتستاهلين اب و انت وانت
او امك حتى لو ضربتك وسيحت دمك - طيب الإسلام أمر بالضرب لأسباب وبدون إيلام كيف احنا نجي نطلب
منها تصبر على الضرب الي معلم بأزرق وأحمر على جمسها ومو المشكلة بأنه ينطلب منها تصبر
المشكلة بالطريقة
أنا ماأستهين بالصبر كـ علاج لكن خليك واقعية والله انت امك تضربك وعادي شخصيتك كذا متبلدة الإحساس
أو يمكن كانت تضربك وانت صغيرة وكبرتي ونسيتي مشاعر الي تعيش نفس المشكلة الآن لأن
مايحس بالنار غير رجل واطيها
أو أنك منسدحة ع السرير وقدامك اللاب توب وماما مسوية لك العشاء وماتعرفين منها غير الحنان وعلى بالك
تبي تسوين فيها باره
أو أنك في حرب أنت وأمك أو أنت وابوك لكنك تمرين بمرحلة سلم وتبين تلمعين صورتك شوفوني أنا باره بامي
حتى لو طيحتني من فوق السطح

أعطوا حلول واقعية لامسوا المشكلة وحاولوا تلامسون هم صاحبته - ماراح تقدرون لكن حاولوا- واعطوها كم كلمة
هي محرومة منها مثلا ياحبيبتي يا عزيزتي وانا اختك
علموها كيف تصبر وأعطوها طُرق عملية وفعالة تساعدها
انتم كأنكم تنتشلونها من وضع بكل رقة ولطف - لأنها محرومة من هذا الشيء - وحسسوها بإحساسكم بمشاعرها
وانتبهوا تبينون لها استهانتكم فيها او بمشاعرها او بمشكلتها
بعض البنات تكتب كلام مايليق بأمها وأبوها انصحيها بأن لاتكتب هذي الكلمات حتى ماتكون حجة عليها ولازم الوحدة
تكتب مشكلتها مع والديها بدون سب في شخصهم لأنه أمر مقزز

انا قريت مشكلة في منتدى ثاني وسبق مر علي مثله هنا وحدة تشتكي من امها او ابوها وتجي الثانية
كأنها تكفخها وتقولها لو انا قدامك اعطيتك كف ثم تقول اعذريني قسيت عليك لمصلحتك - انت تعيديتي القسوة
وصاحبت المشكلة من القهر قعدت تدعي عليها انها تشوف الي شافته
وتقول انا هديت من كلام البنات وحسيت بالراحة بسبب كلامهم الحلو واللطيف واعطوني الاهتمام الي فاقدته
لكن أنت ردك رجعني أتوتر وانرفز من جديد

فعلا بعض البنات يحسسونك كأن الصبر يُباع في محلات أبو ريالين