السلام عليكم ورحمة الله وبركاته
المعروف عن التربية إنها مهمه شاقة ومتعبة وأنا في موضوعي هذا أبغى أكسر هذه القاعدة وأحولها إلى مهمة ممتعة وأحتاج إلى مساعدتكم حتى نشجع بعض بالأفكار الإيجابية ولكي نوجد أفكار إبداعية في التربية بحيث نستمتع بتربية أطفالنا ونخفف من العصبية والصراخ إلي على الطالعة والنازلة :024: وإلي يضيع علينا لحظات جميلة كان من الممكن أن نحولها إلى لحظات سعيدة وهادئة :icon31:
وإنطلاقا من مبدأ أن الإنسان يبدع عندما يتعاون مع الآخرين فتحت هذا الموضوع إلي أتمنى إني ألاقي تفاعل فيه
وفي البداية راح نحدد هدفنا إلي نبغى نوصله
((الإستمتاع بتربية وتعليم أبناؤنا))
طيب ليش نبغى نستمتع بالتربية ؟؟؟
لأن التربية يا أخواتي عبارة عن وظيفة الراتب فيها مؤجل تستلمينه يوم القيامة إن شاء الله وزي مافي موظف مبدع وموظف عادي نفس الشيء في أم مبدعة وأم عادية وعلشان الإنسان يبدع في الشيء لازم يحبه ويستمتع فيه.
وإحنا إن شاء الله راح نبدع في تربيتنا لأبنائنا بس لازم من شوية إرادة وعزيمة وراح نقدر نوصل لهدفنا بإذن الله.
وألحين نبغى نحدد العقبات إلي ممكن تواجهنا ونحدد في نفس الوقت كيف من الممكن التغلب عليها.
طبعا راح تختلف العقبات من وحده للثانية فكل وحدة تسجل العقبات الخاصة فيها وتفكر كيف ممكن نحلها
مثال
العقبة : الغضب السريع
أظن الغالبية تعاني من هذه المشكله
أولا كل وحدة تحدد إيش الأشياء إلي تسبب غضبها من أبناءها وتحاول تشوف حل
مثال
أنا يثير غضبي تخريب عيالي
أحاول أجد حلول
أولا: أقنع نفسي إن مرحلة الإستكشاف لدى الطفل مرحلة طبيعية مهمة لنموه.
ثانيا: ممكن أسوي أشياء أخفف من خلالها من الفوضى زي تفريغ الدولايب إلي يقدر الطفل يفتحها بالإضافة إلى وضع باب خاص للأطفال على باب المطبخ وهذا الأخير إستفدت منه كثير وأنصح فيه خاصة وأن المطبخ مكان خطر وأيضا وضع مفتاح على باب الحمام من الخارج علشان يقفله إلي يطلع من الحمام وبالتالي يظل الحمام دائما مقفول.
ثالثا: محاولة شغل وقت الطفل وإيجاد ألعاب يفرغ فيها طاقته وخاصة الخروج للخارج مثل الحديقة والبحر أو حتى حديقة البيت.
رابعا: إذا كبر الطفل شوي حاولي تشركينه في العمل إلي قاعدة تسوينه وهذا الكلام ممكن ينفع من سن سنه ونصف إذا صار الطفل يمشي ويفهم بعض الجمل وهذي أيضا مفيدة جدا.
من الأشياء إلي تثير غضبي هو البكاء والزن
وهذا أفضل حل لقيته هو التجاهل الهادئ يعني مش تتجاهلين وإنتي تصرخين في وجه الطفل لا خطأ لازم تكونين هاادية وتتكلمين في نفسك إن الغالبية العظمى من الأطفال تجيها نوبات غضب وإحباط وفي نفس الوقت حاولي تلعبين في شي أو تلعبين مع أخوه وإذا قرب منك حاولي تشركينه في اللعبة علشان يوقف صياح وينشغل معاك وإلعبي واضحكي معاه وكأن شيء لم يكن.
وكل وحده عندها أسباب الغضب إلي خاصة فيها لازم تركز على كيفية حل المشكلة وليس على المشكلة نفسها.
وإحنا في هذا الموضوع راح نحاول إنه يكون باب للتفاؤل ورفع المعنويات.
في كلمة جميلة سمعتها من الدكتور النابلسي((إن الحلم هو أن تسكت وتعفو وأنت تشعر بسلام وصفاء داخلي وليس الحلم أن تسكت وتعفو وأنت تغلي من لداخل))
نعم هذا ما نريد الوصول إليه حلم مع سلام داخلي
وألحين مين تنظم معاي علشان نبدأ نوجد أفكار للعب ولتعليم الأطفال بشرط تكون مسلية وممتعة نبغى نبدع ونستمتع وروني همتكم يا أمهات ولا تنسون تحتسبون الأجر.
بالنسبه لي دخلت بنتي مدرسة تحفيظ والولد كمان حادخله باذن الله
وانتظر منك ومن الباقيات معلومات واساليب استفيد منها