مين مافي انسجام بينها وبين اختها ؟

السلام عليكم ورحمه الله

اخواتي مين مافيه انسجام بينها وبين اختها ؟
ايش السبب ؟
كيف تتعاملي مع الاختلاف بينك وبين اختك

انا عندي اختي هي الوحيده اكبر مني الباقي اصغر

مافي بيني وبينها انسجام انا ماارتاح لها يعني يمكن هي تالفني اكثر لاني امسك بناتها

لكن افكارنا غير انا بالنسبه لها طموحه وهي عادي
خلينا من هذا لان الالفة والانسجام بين الارواح احيانا
افكارها مافهمتها عليها تصرفات غريبه
هي صديقاتها هاي كلاس
وانا لبسي حلو وراقي لكن تشوف صديقاتها شي

مثلا مرات عديده رحت بيتها واتلبس لبس ناعم وانيق ويصير فيه صديقات بناتها وماتبغاني اروح امر من عندهم
او يشوفوني تقول هم جدا راقين ولبسهم حتى في البيت كشخه ولا تروحين من عندهم هم ينقلون الصوره
الي يشوفوها لاهلهم :mad: حتى انا (تقصد نفسها) مااطلع لهم انا ماتلبست لبس يناسب
طيب ليه تقولي لي تعالي عندي في البيت ؟
احراج لي انا خلاص ناديني اذا البيت فاضي
هي متواضعه ومتكبره بنفس الوقت مزيج بين الاثنين

مره عند الناس اكل وهي وامي يكلمون بعض ويبتسمون علي وامي تقول شكلك ماهو حلو وانت تاكلي
قالت بنت عمي ومين يطلع شكله حلو وهو ياكل ؟
وهم دايم يقولو انت عند الناس حاولي انك ماتاكلي
يعني الحياه معهم فيها توتر ونرفزه كل شي يدققو عليه
وانا مثل كل البشر تصرفاتي غير مثاليه كلها لكن مااقبل كثر الحن والزن والنقد الصريح البجيح بالوجه
تخيلي امك واختك يضحكو ويعلقون عليك

يعني دقيقين
علي بقوه وحتى على بعضهم لكن انا اكثر كانهم مجهر وانا كائن تحت المجهر يراقبونه
اسلوبهم هذا تاعبهم لكن خلاص عودو عليه

تعرفون البشره قبل الدوره تخرب واحيانا مع هم الوظيفه او الارهاق يعني هذا طبيعي في الحياه اليوميه
لكن يعلقون ليه بشرتك خربانه ؟ خشمك كبر ؟ عينك صغرت ؟
وانا تحت الضغط انفجر :mad:
ودوم تصير مواجهات معهم :06:
اذا امي واختي في جلسه مع احد ماارتاح لاني اعرف انهم يدققون على كل شي

واختي تعرف اني كبيره وتقولي اني كبرت لاني ماتزوجت
لكن تتعامل معي عند الناس وكاني وحده ماتفهم ولا وحده لها شخصيتها واستقلاليتها
خلاص انا مسئوله عن تصرفاتي لو شفتيها تضحك او تقرفك لاتشوفيني خليني

وكمان مايزيد الوضع سوء اني تاخرت في الزواج وهم يدققو على كل شارده ووارده فيني
لبسي وشكلي وطريقه كلامي وتصرفاتي
قبل لااطلع الناس او اي مكان يبغو يدققو على كل شي واذا لبسي ماعجبهم بصريح العباره لبسك مو حلو

والمشكله ان هذا الاسلوب مايساعد يعني بالعكس يزيد من التوتر لكن انا نفسيا وفعليا لااتجاوب معهم
ومع اوامرهم لانهم مايتعاملو معي باحترام ولا بنصيحه او بانتقاد لبق

واحيانا تبغاني انام عندها لكن مااحب انا مافي بيني وبينها الفه
احبها حب بارد لانها اختي وهي تتمنى لي الخير واتمنى لها الخير
لكن لو تقول لي تعالي نطلع منتزه او مطعم او ملاهي مااحب معها انا مافي بيني وبينها الفه
اختي ماتقبلتني مثل ماانا
علموني وافيدوني بالتصرف الامثل معها ؟