مين مغتربه تدخل ضروري

وعليكم السلام
الحياة بسيطة وحلوة ، اكيد اشتاق لاهلي واكيد لما اشوف صور جمعاتهم اتمنى اكون معاهم
واتمنى اليوم قبل بكرا اعيش قريب منهم
بس في النهاية الدنيا فيها تنازلات
وانا اخترت ولازم اكون قد اختياري وقراري 🧘🏻‍♀️

انشغلي بالقران وحفظة اول شي صعب وثقيل ثم تحبينه

👍من جد والله افضل حل تشغلين نفسك وتحسين بارتياح وسكينة وما يصير في ملل ورتابة واذا قدرتي تسمعي مع مجموعة أو تسجلي بالتحفيظ افضل هذي عن تجربة

و عليكم السلام و رحمة الله
هلا فيك
أنا بعيدة عنهم في نفس المملكة لكن منطقة مختلفة
و عشت فترة خارج السعودية ست سنوات لذلك بعدها ما عدت أعتبر اختلاف المناطق غربة .. يكفي أمشي بحجابي بدون ما أشعر إني غريبة و النظرات علي 👀
المهم .. يا روزا يا حلوة الإنسان من طبعه يتكيّف على حسب الوضع ،
و هذه نعمة في الإنسان ..
لكن ما يعني إنه ما يفتقد بعض الأمور اللي اعتاد عليها ..
الحل بوضعك هو تركزين تفكيرك على النعم الموجودة ،، كل ليلة قبل النوم فكري و احمدي الله على نعمة الحياة .. العافية .. العقل .. البصر .. الزوج .. الذرية .. البيت المستقل
كل هذه نعم .. لكن ننساها شوي لما نفكر باللي نفقده
ثم بعدها فكري .. كيف تسعدين نفسك و اللي معك ؟ قد ما تقدرين ♥️
شوفي يا قلبي لو بأقولك عندك مشروع كبير و عظيم و إنت المديرة له .. بتحسين بحماس إنك تتابعينه ..
خلاص هالمشروع هو ذريتك / أبناءك .. فكري كيف تربينهم على قيم و مهارات تفيدهم .. فكري بألعاب تلعبيها معهم ..
جميلة ضحكاتهم معك .. صدقيني لو خسرتي نفسيتك لفقدك لأهلك هذا يضرك .. لأن أولادك بيفقدونك و إنت معهم .. لأنك الحياة و جمالها بنظرهم ..
ثم زوجك يحب يشوف منك الروح الحلوة ..
لذلك لو لزمت اكتبي بورقة كل شيء ممكن يسعدك (طبعًا بإستثناء جمعات أهلك الله يجمعك بهم قريب)
و لما تملّين اقرائي القائمة و اختاري اللي تحبين منها ..
اكتبي أشياء دينية .. تلاوة القرآن مع تدبر .. تفسير آيات صفحة
اتصال فيديو مع أهلك ..
عناية بنفسك .. و اكتبي بالتفصيل بعض الأمور حتى تختاري منها
ترتيب اجتماع لصديقاتك ..
ترتيب ليوم العائلة الأسبوعي ( إما حديقة ،، شواء ،، متابعة فيلم كرتوني مع أطفالك ،، ......)
أي شيء
عمومًا .. اشغلي نفسك بالمفيد حتى ما تنشغلي بالتفكير السلبي
📝 قائمة الاختيارات الممتعة ؛
هذه أحب اكتبها مع بنتي الصغيرة لما تصير تطلب جهازها للعب ..
أناديها و اطلب منها تفكر بكل شيء تقدر تعمله و يسعدها بعيد عن الإلكترونيات و سبحان الله تبدأ بفكرتين ثلاث ثم تمتد لعشرات الأفكار ههههه
لكن هي جميلة الفكرة حتى للكبار اللي يشعر إنه تايه بعض الأوقات ، فيساعده يخفف من تعلق التفكير بشيء واحد
أتمنى ردي يفيدك و يضيف لك ولو شيء بسيط
و بالأخير صدقيني .. سعادتنا من صنع تفكيرنا
و الحمد لله ربي ما جعل سعادتنا بيد البشر لكن بالاتصال به سبحانه ثم الرضا بما وهب ثم وجود هدف لحياتنا و سعينا للعمل
بالتوفيق 🌷

عادي زي. وضعك انا
الحمدلله شاغله نفسي
ومرتبه جدولي

وانتي نفس الشي
سلي نفسك واسعدي نفسك بنفسك

دوره دراسه شغل
او بالبيت