نا وبنتي كأننا توم وجيري

السلام عليكم ورحمة الله وبركاته..

أخواتي.. أبغى أشرح حالة بنتي وأنتم قولوا لي هل هي طبيعية أو فيها فرط حركة؟ لأنها أتعبتني بالمرررررة لأني حامل وفي شهري الأخير..

هي عمرها سنة وعشرة أشهر.. أنا وياها الله يهديها كأننا توم وجيري يعني دورات المياه تدخلها وتحوس بالمويه.. المطبخ تدخله وتلعب بالبرادة وأنتم عارفين الأيام هذي بدأ البرد.. المستودع تدخله وتحوسه وتطلع اللي فيه بما فيه من أشياء خطرة.. ترقى على أي كرسي أو مركى وتنبش اللي على المكتبة.. أو تفتح الأبواب المسكرة.. أحرجتني مع ناس كثييييييير تفتح شناطهم وتلعب بمكياجهم وأغراضهم.. لاااااازم تصير عيوني عليها أربع وعشرين ساعة عشان ما تكون في حالة خراب.. تحب اللعب وأنا بصراحة ألعب معها لكن إذا انشغلت عنها لازم تدور شيء وتخرب فيه..

كثير من اللي حولي يقولون بنتك مو طبيعية.. فيها فرط حركة..

تكفووووون عطوني حل... تعبت معها خصوصاً إني حامل.. وشايلة هم النفاس وشلون بلاحقها وفي نفس الوقت بهتم بنفسي وبالطفل الجديد؟!...

وطبعاً هذا العمر (أقل من سنتين) نادر إنه يفهم الهواش أو الضرب أو المدح أو التشجيع..

الله يرضى عنكم فرجوا عني وأعطوني من خبراتكم وتجاربكم..
وادعوا لي الله يهون حملي وولادتي ويعجل بولادتي إن كان فيها خيرة..