نبغي أفكار حلوه للصدقة

بنات أنا قررت أخلي الصدقة جزء من حياتي اليوميه وبقولكم شو صار لي قبل يومين بالضبط أنا قبل أسبوع صدفة كنت مطلعة صدقة مبلغ بسيط جدا يمكن عشر دراهم بس ما تخيلت إن هالصدقة البسيطة بتسويلي جذي قبل كنت أتصدق يمكن مره كل أسبوع بس أحين بحاول أخليها يوميا حتى لو درهم..كنت أنا وأختي فالسياره ماشين فطريقنا عادي وفجأه السياره اللي جنبنا كان بينها وبيننا شعره وبتصدممنا لولا حفظ رب العالمين إن أختي فالوقت المناسب غيرت مسار السياره بعيد وبسرعه كبيره عشان نتفادى ىالسائق المتهور للحظات أننا قلت خلاص أكيد بتصدمنا أكيييييد..وأنا على طول قلت حق أختي بدون وعي هاي أكيد الصدقة هي اللي دفعت عنا البلاء وقالت أختي فعلا سبحان الله، وإقتنعت أكثر بأننا لازم وكل واحد أو وحده فينا لازم تتصدق حتى لو مبلغ تافه لانها ممكن تقيكم إنتو وأولادكم من أي شي خطير سواء مرض لا سمح الله أو حادث أو سقوط محد يعرف..خلنا نتصدق أي شي حتى لو ماعدنا فلوس ولا تقولون بتنقص بيزاتنا (مانقص مال من صدقة) ولا تقولون ماعدنا في وسايل كثيره بقترحها، يعني أنا مثلا بعطيكم أفكار وإنتو ساعدوني لو عندكم غيرها، أحيانا لو رحت السوبرماركت وشريت أغراض بسيطه أقدر أشيلها بس أخلي عامل النظافه عمداً يساعدني فيها وأعطيه 3 أو 4 دراهم هذيلا رواتبهم بسيطه يادوب 300 درهم وساعات بالشهور ما يعطونهم، وأحيانا تشوفون بعض العمال فالحي أو الشارع وخاصه في فصل الصيف إشترولهم زجاجات ماء أو عصير أو لبن ووقفوا السياره وعطوهم، في بعض العوايل تسكن في المساجد أو البيوت القديمه ومعروف عنهم إنهم عايشين على الصدقات خاصه يكونون مهاجرين من دول فقيره روحلهم دقوا عليهم الباب وعطوهم أي شي تقدرون عليه إن شاء الله لو كيس خبز وفي بعض البنات بيقولون ما يعرفونا ليش نروحلهم مب لازم تعرفونهم يعني لو بس تعرفون إن في عايله ساكنه في هالبيت أو أيتام في أطراف الحي أو في هاي العماره دقو الباب وإسألو عن أمهم أو صاحبة البيت سبحان الله أحيانا يكونون محتاجين حبات بنادول أو ودوا مب قادرين يوفرون ثمنه وإحنا شكثر اللهم لك الحمد نيمع في هاي الأدويه وفي النهايه نرميها عطوهم اي شي يزيد عندكم ، أحين نجي للدوام ..أحاوول أودي معاي يوميا صحين فطاير مب شرط كبير و أخلي كم قطعه على جنب يمكن 5 تقريبا وفي نهاية اليوم أخليها في مطبخ الدوام عشان يشيلها حد عمال النظافه سبحان الله ماتعرفين بيكون من نصيب منو أو أوأخليه أي شي زايد عندي في البيت ومابغيه مثل علبة قهوة أو شاي إشتريتها وماعجبهم في البيت أو نوع بسكوت أو تشيبس كان زايد عندج وماتبغينه تراج بتشترين غيره فالنهايه ليش محتفظه فيه طول المدة في الغرفه وماكلتيه..مثلا في البيت أي أكل يزيد عندكم يعني لو في ناس بعثولكم كيكه كبيره أو أكله بس كميتها كبيرة كم إنتي بتاكلين يعني خليلج والباقي وزعيه منه رشاقة ومنه صدقة.. أكيد في كل حي يكونون ناس فقراء وعفيفين نحن الحمدالله صادف إن نعرف ناس ساكنين فالمسجد وبالصدفه عرفنا إنهم فقرا لان مب كل الناس تقول إنها محتاجه، فنحاول متى ما قدرنا نبعث لهم أكل حتى لو صحن بسيط لان مساكين يفرحون بالشي القليل..وحتى أطفالهم مساكين يعني مب بطرانين مثل عيالنا حاولي في يوم تشترين أنواع حلويات حتى لو مره فالشهر وتيشبس وعصاير وحطي في كيس كبير و عطيهم إياه لانهم ما يقدرون يشترون هالشي دايم..حتى الملابس إحنا شكثر نفصل عبايات ونيشتري وما يطلع قياسينا بدل ما يكون معلق فالدولاب بنعطيه غيرنا بيستفيد منه..ولو مالقيتي حد عدال بيتج تقدرين مثلا لو رحتي جمعيه أو سوق وفيها كشك تبرعات ويبيعون دفاتر تختارين مثلا الصدقة الجاريه أو كفالة طالب أو يتيم أو أي شي من هالقبيل..حتى الحيوانات فيهم أجر لو تطعمينهم ويمكن غيري بيضحك وبيقول خل نعطي الأوادم أولى بس بقولكم ترا هاي الحيوانات تسبح لرب العالمين والله سبحان يمكن سخرج إنتي عشان تطعمينهم يعني مثلا لو الطيور اللي في حديقة البيت أو الحوش نحن نشتري الحبوب الخاصه بالطيور من الدكان أو من اي مكان وتكون رخيصة شوالات كبيرة تقعد أيام وكل يوم بعد صلاة الفجر إنثري من هالحبوب في الحديقة ترا (في كل كبد رطبة أجر) يعني مثلا دجاج أو ديوك تشوفينها جدام البيت تحطيلهم حبوب أو ماي ولو ماعند الخبر الجاف المكسر إطحنيه وإنثريه على السطح وقت الصبح أو قطوة جوعانه طعمتيها أو أي حيوان لا تضحكون رب العالمين يرسل هالمخلوقات لبيتج أحيانا لغرض معين ونحن نطرده أو نضربه مب حرام هالشي..في إمرأه بغي (يعني من البغايا) دخلت الجنه لاانها سقت كلب تخيلوا يعني هالشي البسيط شو ممكن يسوي..حاولي تسقين الزرعه أو الحديقة أو لو شفتي نبته جافه ..الماي الزايد بدل ما ينكب في البواليع أحسن نسقي فيه الزرع على الأقل وبنحصل أجر..

أنا هذا اللي أتذكره ولو في شي ثاني برجع بقوله..ولو عندكم أفكار حلوه قولوها...وتحياتي