السلام عليكم ورحمة الله وبركاته..
الله يصبحكم / يمسيكم بكل خير ورضا وراحة بال..
والله يجعل السنه الجديدة سنة خير وبركة وتحقيق الأمنيات والسعادة لكل وحدة فينا قولوا آمين..
والله يا أخواتي ماتوقعت بيجي يوم من الأيام وأكتب موقف أو تجربة صارت لي أنا أنـــا..
لكن سبحان الله جا هاليوم..
بقولكم سالفتي وبتكلم معاكم بكل صراحة..
عائلتي قاعدة تمر بظروف صعبة بحكم أن ابوي الله يطول بعمره قاعد يبني لنا بيت العمر ..ومثل ما انتو عارفين العمار كيف هو كسرة ظهر..
يعني الحاة المادية نوعا ما مستعسره,,
المهم كنت ابي اروح السوق أمس بشتري لي كم بلوزه من محل .. وابي أشتري تنورة وحده بس..
وزي ماقلت لكم فلوسي على قد حالي..
رحت للسوق أنا وأمي وأبوي.. وعند باب المحل كان فيه واحد قاعد يشحذ وبصراحه حالته تكسر الخاطر يده اليسار مشلوله والواضح انه توقف نموها وهو شاب يمني بعمر الزهور ..
أمي قاعده بالسياره وأنا وأبوي بالمحل قال ابوي بطلع له وأعطيه اللي كتبه ربي.. ورجع لي أبوي وشريت لي كم بلوزه وطلعت من المحل وابوي راح يحاسب.. ركبت السياره وشفت الولد مره كسر خاطري وقاعده اقول لنفسي بعطيه من الصروف اللي معي وشوي الا امي قالت عندك صرف ابيك تنزلين تعطينه قلت ايوه وعلمتها كم معي قالت اعطيه كلها قت بس انا ما بيبقالي شي بعطيه منها بس مو كلها.. قالت امي اعطيه كلها وانا بزيدك فلوس قلت طيب.. نزلت واعطيته ..وفعلا زادتني امي فلوس..
وجا ابوي ومشينا للمحل الثاني طبعا زي ماقلت لكم الفلوس محدوده بس بشتري تنوره وحده..
واجيكم كل شوي داخله محل وادور عالتنوره اللي ابيها.. وأجيكم بالصدفه خشيت محل سبحان الله أثاري فيه تخفض تقريبا 70% وربي يا بنات خشيت المحل واخترت وانا مو داريه إن عندهم تخفيضات وأجيكم وأختار التنوره اللي عاجبتني وأنذهلت من السعر مررررررره حلو سعرها وربي يا بنات بدال ما اشتري تنوره وحده شريت ثلاث تنانير وبلوزتين
تخيلوا وربي مو مصدقه نفسي
وتؤمنون بالله أن فلوس امي اللي عطتني ماصرفت منها ريال.. ما احتجتها!!
تخيلوا طلعت وانا فرحانه وما فكرت ولا استوعبت اللي صار لأني شريت اكثر من اللي مخططه عليه الحمد لله
إلا يوم رجعت البيت وقعدت لحالي افكر وش سويت بيومي.. تذكرت هذاك الشاب وتذكرت اللي صار بعده..
عرفت البركه اللي جت بفلوسي من صدقتي له
وعرفت من جد قول الرسول عليه الصلاة والسلام (( مانقص مال من صدقه))
والله يابنات جاني شعور مره حلو انبسطت..عرفت ان الصدقه تنفعني انا قبل لا تنفع الشخص اللي تصدقت عليه .. سبحان الله العظيم..
وعشان كذا انصحكم بالصدقه لوجه الله ..حتى لو فلوسك شويه وميزانتيك معدومه..صدقيني ماراح تتأثر بها أبد على العكس تماما ربي يبارك لك فيها..
حبيت انقل لكم قصتي البسيطه لأن اعرف بنات عالم حواء يحبون التجارب والقصص اللي تكون من واقع تجربة العضوات الاخريات لذلك اتمنى منكم تدعون لي باللي يخطر في بالكم ..
حطيت الموضوع بأكثر من قسم حتى تعم الفائده ..
لذلك ارجو رفعه ولو بكلمه حتى يقراه اكبر عدد منكم ..
الله يوفقني وإياكم لما يحبه ويرضاه ..ويحقق لنا ما نتمناه ويجمعنا في جناته جنات النعيم..
استودعكم الله ..
