نجاح الحقن المجهري ؟

السلام عليكم ورحمة الله.
تساؤلات عن هل نجاح عمليات الأنابيب تعتمد على شطارة الدكتور ؟
.
أكيد الدكتور الفاهم أفضل من الدكتور اللي مو فاهم وقليل الخبرة لكن هذا مايعني إن نجاح الأنابيب يعتمد على الدكتور بس .
طبعا ارادة الله فوق كل شي ، اللي الله رايد له الذرية ولله لو فوق الخمسين وبدون علاج تحمل واللي ربي مو كاتب له لو اجتمعوا كل الاطباء وعمرك مناسب ماراح تحملين ، لكن احنا نسعى بالأسباب.
.
والأسباب هي التالي
١/سلامة الزوجين ووجود بويضات وحيوانات منوية صالحه للتلقيح .
.
٢/قوة المستشفى أو المركز بالمختبر والطاقم الطبي كامل ، فالدكتور بدون طاقم شاطر وبدون مستشفى ممتاز ماراح يفيدك ، فالأخصاءيين اللي يشتغلون بالمختبر واجهزة المختبر عوامل مهمه والبعض مايستوعب هالشي ، فممكن نلاقي مراكز متخصصة بالانجاب نسب النجاح كبيرة عندهم رغم اختلاف الاطباء لأن المركز ممتاز بشكل عام .
.
٣/الطبيب ، طبعا الطبيب الفاهم اللي عنده خبرة عالية بيكون يفهم الحالات من اول ماتجيه ويقدر يقدر الخطة العلاجية اللي ممكن تفيد معك وممكن ماتفيد ، فالاستجابة بأمر من الله راجعه لبويضاتك ومنوي زوجك .
.
.
بعطيك الخطة العلاجية اللي يسويها الطبيب :(أحكي عن تجربة ).
.
١/اليوم الثاني للدورة اروح للمركز وأعمل سونار داخلي ، السونار تعمله اخصائية خاصة مو الدكتور ولهالسبب أحكي انه الطاقم كامل مهم .
.
٢/الاشعه الاولى حق ثاني يوم دورة تحدد لنا كم عدد البويضات اللي ممكن تطلع ومقاس بطانة الرحم ، ثم ياخذون وزنك وطولك ويشوفون لو ذي أول مرة تسوين تنشيط او لا وبعد كذا يقررون لك نوع الادوية والمقدار .
.

٣/انا جربت ادوية كثير سواء حبوب بالبدايات ثم ابر بالسنوات الاخيرة ، طبعا الابر اقوى نتيجة ، الابر اللي استخدمتها: مرة استخدمت (منيبور) ومرة استخدمت ( قونال اف) ، بالنسبة لي ارتحت لقونال اكثر من منيبور ..

٤/الجرعات للابر أو المقدار الموصى يكون يعتمد على حالتك ، وخطر يعطونك جرعة اضافية عشان مايحصل لك فرط اباضة ، انا اخر مرة صرفوا لي مونيبور ٦٠٠ كانت قوية مرررة واتعبتني ولله من دوخه شديدة وألم بالجنب وغثيان .

٥/ باليوم الخامس من التنشيط اللي مفترض يكون سابع يوم بالدورة المفترض تروحين تسوين سونار مرة ثانية ويكشفون على مقاس بويضاتك ومقاس بطانة الرحم .
.
٦/اليوم الخامس غالبا الدكتور بيقول لك تاخذين ابر تنشيط زيادة لمدة ثلاث ايام ممكن او اكثر او اقل ، الله اعلم ، وكمان ممكن يعطيك ابر مثبته للبويضات عشان ماتنزل ، ثم بعد الابر تسوين سونار مرة ثانية وبناء عليه الدكتور يحدد موعد الابرة التفجيرية ووقت العملية ..
.
٧/هذي الخطوات السابقة اعتفد عند كل الأطباء سويتها والنتايج اغلبها كانت ممتازة ويحصل حمل لكن مثل ماقلت ارادة الله فوق كل شي وكان الحمل مايكمل معي …
.
٨/ الطبيب الشاطر يعرف كم مقدار الجرعه اللي يعطيك ، ويكون يعرف يحدد موعد السحب ، ويكون يعرف يسحب البويضات زين ، وأهم شي هو سحب البويضات ، وسحب البويضات يتم عن طريق عملية بسيطة مدتها يمكن ربع ساعه وبتخدير كامل ، تنسدحين وماتحسين بشي ، ويكون يغطونك ويتم السحب للبويضات من الدكتور وبنفس الوقت زوجك يكون مجهز العينه للمنوي ، ويخلص الدكتور سحب وثم يرسلون البويضات للمختبر ، والان تبدا مهمة المختبر ويكونون بتواصل مع الدكتور ..
تبدا عملية تلقيح الأجنه ، وثم يكلمونك المختبر بعد كم يوم ويعلمونك كم جنين صالح وكم جنين غير صالح ..
.
الأجنة الصالحة ياخذها الدكتور ويرجعها لك بثواني بدون عملية ولا تعب
.
.
المهم انه الطبيب الشاطر مهم بالتلقيح لكن الأهم هو ارادة الله ، فاللي بتسوي عملية تبحث عن مركز زين واسم دكتور وثم تستخير الله وتتوكل عليه ، لأن النجاح يعتمد على ارادة الله والباقي كله أسباب ولعل البعض مبارك ويكون الله يطرح الخير على يديهم