لمار ياحبيلك على هالدعوة الله يجزاك ووالدينك الجنة ولك بمثل مادعوت

سارةلونا الله يسلمك ويسعدك يااارب

الصمت حكمة : هذانا ندور حلول ونحاول نحل الأمور بالمنطق قلت من البداية بعيدا عن المثاليات وبعيدا عن تتبع الهوى ووسوسات الشيطان بالعقل فقط ..

شوفي أختي الصمت حكمة أختي موظفة وشغالتها سافرت ( الآن هي ورطت ) مافي تتخيل الأمر حقيقة ايش سوت ؟!
مضطرة تقوم بعيالها وببيتها هنا الزوج أيضا صار ملزم هو أيضا إنه يتعاون مايقدر يترك طفلينه الصبح وهي بيتها بعيد عن بيت أهلي وكانت هي تفكر تستغني عن الشغالة وتودي عيالها عند أمي بس كان راااافض يقولها أنا فاضي للمشوار ذا كل صبح ؟!!

وكنت أقولها الواحد مايصير أناني يفكر بس في نفسه لازم نحسسهم هم بعد بالمسؤولية ولا ليش يجيبون عيال إذا مايبون يتحملون جزء من المسؤولية ..المهم كان باقي على انتهاء الدراسة شهرين يعني راح يتحمل شهرين ذا الوضع وزوجها راعي عزايم ولو مو عشاء لكن قهوة المغرب ذي غالبا يصير معه أحد ..

صارت تقوم الصبح قبل وقت روحتها بوقت عشان تودي عيالها عند أمي وتروح هي الدوام ويلحق هو على دوامه ترجع البيت تكون من الليل طابخة غداء تطلعه وبالمكرويف تدفيه ويتغدو وينام زوجها وعيالها الي جايين من المدرسة واحد رابع والثانية ثاني ابتدائي ( تخليهم مع أخوانهم الصغار ينتبهولهم على التلفزيون لحد ماتصحى )

هنا لاحظي (شغّلت عيالها ) وعلمتهم شلون يتحملون المسؤولية ومنبهة عليهم مايدقون عليها الباب إلا إذا واحد تعوّر أو شيء غيره تخلوكم هنا وتنتبهون لهم والمطبخ مقفل .. تقوم العصر تسويلهم شاي ويجلسون كلهم مع بعض بعدين تبدأ تذاكر لهم وبعد المغرب زوجها طبعا عنده رجال قهوة وشاي بالمجلس مسواة لهم وهي تشتعل بالبيت ومعها عيالها يساعدونها ..

صحيح قلت طلعاتها عن أول .. صحيح في البداية تقول انهد حيلي وتعبت لأن لها فترة ماتعودت على ذا النظام .. بس الظروف خلتها غصب تتعود على ذا الوضع يعني الواحد لو اضطر إنه يعيش الموقف بيلقى حلول ..

اشترت غسالةأوتوماتيك ونشافة صارت ترمي الغسيل وأول ماتوقف النشافة عيالها يطبقوا الملابس حقتهم وعلى دواليبهم .. ثياب زوجها تكوى برى والملابس الداخلية مع النشافة مايحتاج واشترت مكوى الكبس الصغير وصارت تكوي ملابس الخرجة حقتهم فيها لمدة أسبوع تجهز لبسها وثوب وبدل ولدها ومريولين لبنتها .. ( يوم الجمعة يوم الكوي )

أنا قلت من أول الوحدة لو بتستغني عن الخادمة بتتنازل عن أشياء لكن لو فكرنا عشان مين احنا نستغني ونتنازل مو عشان أولادنا المتضرر الأكبر منهم وعشان نحافظ على بيوتنا .. وأنا قلت الواحد مايتكل على نفسه بل يتكل على الله ومايركن لجهده فبدون معاونة الله لنا ماراح ننجز شيء ...

الخرجات ماهي كماليات ؟!! أنا أقدر أحدد لنفسي يوم واحد ممكن أخرج فيه أو استقبل على حسب ظروف عملي وعمل زوجي أشوف اليوم وأحدده ولو بغى أحد يجيني أقول له أستقبلك في اليوم الفلاني ماعندي وقت فاضي غير في ذا اليوم ..

بعدين أنا لماأبي أزور أحد أخلي عيالي عند زوجي لأنه فعلا ماأحد راح يتحمل العيال مثل أمهم وأبوهم وفي البداية كان يتضايق زوجي بس قلت له لازم أجل وين أحطهم أمي وأمك كلهم كبار في السن بنرج الناس بعيالنا لازم تتحمل وصحيح ماأطول عند الناس بس عاذريني عيالي ماعندهم أحد أحطهم عنده ..

بعدين خرجاتنا متى بتكون بتكون كل أسبوع ؟!! ليش أنا رايحة لأمي ؟!! ولا أمه ؟!! يعني بتكون على فترات متباعدة بالله أجيب وحدة تغثني ومشاكلها لليل عشان لحظات راح تمر عليّ !!
ولا عشان أشياء اضافية ؟!!!

حتى العاملة في شيء اسمه حضانات إذا ماكنت في منطقة فيها أهلي أو أهله ماهو نفس الشيء بتحطينه عند غريبة بس يمكن هالغريبة أفضل من الخادمة لو بنسوي احصائية إضافة إلى أنها فقط وقت الصباح وبعدين ماهي مرافقة لطفلك أغلب الوقت ويتعلق فيها وتأثر فيه ...

الصراحة الصراحة ولايزعلون منا الموظفات إني قابلت موظفات كثييير ( أصلا كل الي حولي موظفات ) غير صديقاتي مافي غير وحدة مثلي عاطلة .. كلهم يحسبون الأمر من ناحية مادية وليس الشاغل الأول لها أطفالها يعني تقول بدل ماأدفع 300 بالشهر لطفلي بالروضة و300 لطفلي الآخر في الحضانة وبعد أرجع اشتغل بالبيت أخلي هالستمية راتب خادمة توفر علي شغل البيت والعناية بأطفالي !!!!!! مع إنها هنا غلطانة لأنها ماحسبت تكاليف الاستقدام مع الراتب ولو قسّمتها كم يطلع صارفة عليها ؟!!!

إذا كان هذا المنطق إحنا ماراح نتناقش لأن هذي الأم من البداية ماعندها أولويات في حياتها وهي على إنها متعلمة إلا أنها تجهل الأشياء الأساسية والدور الأساسي لها في الحياة ..

بعدين ياأخوات شوفوا الغرب والله مافي أحرص منهم على الفلوس ومع هذا تلقيهم بدون خادمات تلقين عندهم هالأجهزة وتستأجر بالساعة مرافق لطفلها (( ياليت هذي تتطبق عندنا )) وعيالهم من 5 سنين أو أربع مدخلينه روضة لأن الطفل بيخرج بفائدة يوم تدفعين ذي الفلوس بعكس لو خليتيه عند خادمة يمكن تدمره لك ..


أعود وأقول احنا هنا مو عشان نتهاوش أو نفكر براحتنا ونمشي على هوانا احنا هنا عشان نساعد بعض ونقنع بعض ونشجع بعض ونجد مع بعض حلول عملية وتجارب تشد من عزمنا لنقوم ببيوتنا ونحفظ أبناءنا وبيوتنا بأنفسنا ..

أتمنى مايكون كلامي زعّل البعض وأتمنى أن يجدن الفائدة فيه

أما سالفة القصة الي أقولك كل ماتذكرتها صراحة شدت من عزمي إني اهتم ببيتي بنفسي وتذكرني دوما بأهمية الاستعانة بالله


هذي الله يسلمكم وحدة من البنات تصير جارة صديقتي وأنا كنت عند صديقتي وهي حكتني سالفتها وبعدين شفتها وشفت عيالها ماشاء الله الله يحفظ لها عيالها يارب ويتمم عليها بالنعمة الي هي فيها ..

أنا كنت أفكر أجيب خادمة لأني كنت أفكر وأقول ماعاد صرت أهتم بنفسي وودي أحفظ قرآن وأدخل دورات وماعندي وقت وحيلي دايم منهد .. وكان الي حولي لاشافوني مع بزراني يقولون الله يعينك كانت هذي الكلمة قوية عندي ماأحب أحد يحسسني بالمسكنة وكنت أفكر جديا أشتري راحتي بخادمة وإن أتفرغ لنفسي وزوجي ويصير عندي وقت كبير ..

المهم يوم رحت لصديقتي وهي تنصحني تقولي شفت جارتي فلانة عيالها ثلاثة في الابتدائي واثنين صغار وماشاء الله عيالي عند عيالها رحمة حركين بشكل فظيع تقولي تعرفي شلون نظامها في البيت (( هي مدرسة ولا عندها خدامة ))

قالت الفجر تصحي عيالها ويصلون بالمسجد مع أبوهم وهي تجهز الفطور يرجعون يفطرون ويلبسون وهي تفطر وتلبس ويرحون يودون عيالها عند أم زوجها هي الأقرب ويروح البقية مدارسهم وبعدين لاجات ( وخرجتها هي وزوجها وعيالها سوى ) تحط لهم فاكهة على بال مايخلص الغداء ويتغدون وينامون شوي إلى العصر ( مواعينها يوم خلصت حطتها كلها في غسالة الصحون وشغلت عليها وراحت تنام ) قامت العصر تجلس هي وعيالها وزوجها يتقهوون وعيالها عندها يذاكرون وإذا بغو شيء يسألونها (( تقول معودة عيالها يعتمدون علة نفسهم بالمذاكرة ) ماتمسك وتحفظ لا بس تسمع وتتابع من بعيد وهي تتقهوى هي وزوجها بعد المغرب يروحون المسجد تحفيظ هي في ذي الأثناء تشتغل بالبيت ترفع وتغسل الحمامات ووتكنس بعد العشاء تسوي لهم سندويتشات وينامو العيال وهي تحضّر وتجلس مع زوجها شوي وتنام على الساعة 10 ونصف أو 11 بالكثير .. (( طبعا الغسيل والكوي مخليته آخر الأسبوع الخميس الصبح)) والصبح فيه بكرة فضييييعة بس احنا نغفل عن دعوة الرسول اللهم (( بارك)) لأمتي في بكورها .. والبركة تكون في الوقت وفي إنهاء العمل بسرعة وفي النشاط الي يجينا .. المهم

تقوم الحرمة قبل الفجر بساعتين وتصلي وتطلب العلم الشرعي تسمع الأشرطة شروحات الكتاب الي تدرسه ولما تصلي آخر الليل تقول أنا أدعي لكل واحد من عيالي باسمه إن الله يهديه ويصلحه ويعينني على تربيته وأدعيله أنه يكون هاديء وإنهم مايشغلوني بكثرة حركتهم عن عملي وطلبي للعلم الشرعي .. وتقول صديقتي شوفي عيالها وشوفي أثر الدعوة ..

عيالها صايرين أحسن من أول ومتعاونين معها والله رزقها البركة بالوقت والصحة وكل يوووم تدعي .. وفي كلمة صراحة للآن ثابته بعقلي تقول حنا ندعي للكل لنا ولأزواجنا ولأمهاتنا وآباءنا ولأمواتنا وللمسلمين بس مانخصص دعوة خااااصة لأولادنا بالاسم وباللي نبيه بس دعوة عامة إن الله يصلحهم ويهديهم لااااا لازم نخصص دعوة لكل واحد وندعي الله باللي نبيه إنهم يكونون هاديين متعاونين معنا مايشغلونا وإن الله يوفقنا بتريبتهم وإن يرزقهم حفظ القرآن وإن الله يهديهم وهكذا ...


صراحة يوم سمعت قصة جارتها والله حسيت إن احنا ولا شيء كل همنا نفكر بنفسنا نبغى نرتاح ونرمي مسؤوليتنا على غيرنا ونتفضى لزوجنا ولنفسنا لااااا دامك جبت عياااال إنت المسؤولة عنهم أولا وأخيرا واكثر الحمل عليك ..

شني هي هتنا وشنو هو همنا .. الإنسان إذا كان صاحب همة عالية ويتصل دوما بالله ليستمد منه العون والسند سيبلغ همته لكن ماتكون لنا همة ولا نحتسب حتى التعب الي نتعبه في بيوتنا وهمنا بس راحة وطلعة ووقت فاضي نمارس فيه هواياتنا ؟!! بالله وش راح نسوي !!!! ...

مهم جدا أن تجدي لك سند يساندك ويشد من عزمك إذا قررت عمل شيء مخالف للي حولك .. لأن كلام الي حولك يثبطك ويجعلك تفكرين مثلهم لو لقيت واحد كل شوي يقولك اشتري راحتك .. ياحراااام .. الله يعينك .. لازم لك شغالة .. وووووو راح تدخل الفكرة براسك لكن لو لقيت الي يقولك حاولي واثبتي أنت على حق استعيني بالله واحتسبي راح تثبتي وتشدي من عزمك ..

راح تجيني وحدة وتقولي أنت تقولي نتكلم بالعقل وإنت حكمت عواطفك هنا ؟!!

راح أجاوب ألسنا مسلمين نعلم ماللإرتباط لله والدعاء من أثر كبييييييير ؟!!!

الي تقولي أنت تتكلمي بمثالية الأزواج الآن صاروا يطلبوا ويبغوا.... صح .. لكن أليس الذي خلق الأزواج هو الله أليس الدعاء قادر على تغيير فكرة في عقل زوجك أليس الله إذا طلبتيه وألحيت عليه وكنت صادقة أحبب زوجك بك وجعله متفهم لك ولو كان عنيد أو جبروت أو أو أو ... من كان أشد من قلب عمر على المسلمين وبدعوة تغيّر مباشرة واهتدى للإسلام ؟!!
الله قادر على أن يجعلك قرة عين لزوجك إذا بدأت بتغيير نفسك والتجأت له حقا وانطرحت بين يديه في جميع أمورك في شدتها ويسرها والله لايعاملنا بعدله لأنه لو عاملنا بعدله لما استجاب لنا لكنه يعاملنا بكرمه وعفوه وفضله ومنته لذا لو التجأنا إليه بصدق مع مابنا من تقصير في حقه نجده قريب يجيب دعوة المضطر إذا دعاه ..

تمنياتي للجميع بحياة سعيدة بعيدة عن الخادمات :)

الجووودي

ماشاء الله عليك و الله يقويك و إنتبهي لا تضعفين قدام هالظاهره ...

عرعوره ..

الله يسلمك و فعلا أنا إذا شفت بناتنا أستغرب كيف بيقومون ببيوتهم بكره و هم عندنا ما يرفعون قشه يعني المشكله عندهم بتكون

مضاعفه ...

عبايه فوق الرأس ...

جزاك الله خير ...

الصمت حكمه ...

و إذا قلنا الطلعات !!! مع إني ما أعتبرها سبب قوي للشغاله

إنتي كل يوم بتطلعين ؟؟ هي مره غالبا زياره نهاية الأسبوع للأهل يعني عشان زيارة أجيب وحده تقعد على قلبي سنتين !!!

وبالنسبه للطلعات الأسواق و التمشيات إحنا دايماً نصرفهم ما نبيهم معنا و إللي تأخذهم معها غلطانه تراهم والله تطلع نفوسهم

وبعدين الزيارات ألحين مو مثل أول صايره قليله مره خاصه الموظفات ..

أم فوفو ...

الله يشفي بنتك وأنا من البدايه قلت إللي تعبانه أو في مثل وضعك الله يعينهم عليهم لأنهم هم اللي مضطرين يجيبون

والباقين أحمدوا ربكم على نعمة العافيه والصحه و إحتسبوا الأجر و أتركوا هالشغالات وترى غيركم مضطر لها إما بسبب مرض أو إعاقه

وإلا هو تلقين وده بالعافيه أللي تغنيه عنها ..

ساره لونا ..

مشكوره على مرورك .

أما إنتي يا وميض الليل ...

فكفيتي و وفيتي و فعلاً كملتي الموضوع و قلتي كل إللي خاطري فيه و زدتي عليه و نبهتينا زياده

الله يجعلك في كل حرف حسنه ..

بنااااااااااااااااات

أتمنى ما أحد يزعل من كلامي طبعاً أنتم عارفين الموضوع كله تنبيه لكم والمقصود منه المصلحه و مصلحة الأطفال تحديداً

و عشان كذا إن ودي كل وحده تقول وش المشكله إللي إضطرتها تجيب الشغاله و حنا مع بعض نفكر بحلول لبعضنا ..

الله يغنينا عنهم بالصحه و العافيه والقوه والشجاعه إللي تخلينا نخالف نظرة المجتمع و نطلعهم من بيوتنا ...