نداء لكل أم ( أنقذوا اطفالكم من طيور الجنه )

السلام عليكم ورحمة الله وبركاته ..
حبيت أمسي على كل أم هنا معانا وحابه اطرح موضوع وهو تجربتي مع بنتي الله يحفظها لي لجل الكل يستفيد ونحافظ على اطفالنا ..
القصه صارت مع بنتي من عمر ٥ شهور طبعاً الحمدلله جبت بنتي مافيها غير العافيه بس كنت لما اشتغل البيت وهي عمرها ٥ شهور احط لها على طيور الجنه لجل تسكت عني واسوي شغل البيت لحد ماتعودت بنتي بس عليها لين وصل عمرها سنه وهي على هذا الحال وقتها ماكنت مدركة الوضع الخطير اللي بتكون فيه بهذا الوقت والله حسيت ي امهات بنتي ماهي بنتي اللي اعرفها تغيرت صارت وحده ثانيه شفت فيها تغّيرات ماهي طبيعيه حتى بسبب هالقناة صارت بنتي ١- صارت ماتتكلم لو بحرف ٢- صارت عصبيه ٣- صارت وقت نومها تجيها نوبات هلع وبكاء غريبة ٤- صارت تكرهه شي اسمه حضني ٥- وتمشي على اطراف رجولها ٦- بس تشوف هالقناة ابتسامتها تشق الوجهه ٧- لما صرت اخذها عند اهلي واهل زوجي اتنكد بسببها تكره الناس وتصارخ وتبكي
والله وقتها كانه صفعة على وجههي جاتني منها وقتها حسيت ان بنتي تعيش سمات توحد بسبب هالقناة جلست اسبوع ابكي واصيح اني خليتها بهذا الشكل لجل بس اخلص شغل البيت .. وقتها حلفت اني استرجع بنتي لحضني باي طريقة وباي ثمن وان شاءالله عمر شغل البيت مايخلص بس اهم شي بنتي ماتضيع من يدي ..
طبعا البداية كانت صعبة جداً علي ..
اول حاجة مسكت ابوها وطلبت منه اشياء يسويها مع بنتي بدون مااخليه يحس انه هي فيها شي من باب انه هالشي يعلمها اشياء وكذا
وثاني شي جبت لها العاب وعبيت لها غرفة كامله وقطعت عنها الtv شهور ماتشوفه طول الوقت طافي صرت العب معاها واشاركها وقتها صرت بكل مكان اخذها معاي واكلمها كثير حسيت بدت البنت تتجاوب معي واستمريت شهور على هالشي صرت اتعمد اتركها عند امي واخواتي لجل تحتك فيهم ف البداية كانت تبكي بس شوي شوي تعودت وصارت تحب تروح لهم وتتكلم وتقول جده وخاله وبرضوه مع اهل زوجي كنت اجبر زوجي ياخذها وينزلها عند امه واخواته ويتعذر اني رايحه مستشفى لحد ماضبط وضع البنت بدال الصراخ والبكاء منهم صارت تحبهم وتاكل معاهم وتتقبل كل شي منهم وتعالو شوفو اللعب معاهم كيف والحمدلله ياربي ماضيع لي مجهود طوال الست شهور اشتغل على هالشي معاها صرت لما اروح السوق اخذها واشتري لها كل شي قدامها وانا فرحانه فيها لجل تحس اني احبها وكذا وبالتدريج صرت احضنها شوي شوي لين ماوصلت والله معاها انها ماتنام الا بحضني الحين وتقول ماما وبابا بعد ماكانت ماتتكلم وصار تعلقها فيني وف ابوها جداً قوي وصارت تساعدني ف البيت وتعطيني اي شي اطلبه منها حتى لما تكون تبغى اكل تتكلم انها تبغى واذا انكسرت لعبه لها تجي عندي وتمدها لي انه اسويها يعني ولله الحمد بعد كل هالمعناة رجعت بنتي طبيعيه وكل الاعراض اللي كنت اشوفها فيها اختفت تماماً صارت تمشي طبيعي وتتكلم وتحب حضني وتتقبل الناس لو اخذ يوم كامل عنها عادي ماتبكي تجلس عند اهل زوجي واهلي وتلعب بأادب صار الكل يحبها وهي تحبهم
بنتي اللي كانت ماتتقبل لعب مع احد الحين تلعب مع الكل وجريئه وتحتك بالناس وماتستغرب اي شخص حتى والله ي بنات والله انه لشافتني اصلي وادعي تقلدني وتصلي 😭😭😭
الله لك الحمد يااااااربي اللي لحقت عليها قبل تضيع مني بسبب هالقناة اللعينه اللي دمرت اطفالنا وخربت عقلياتهم والحين الحمدلله بنتي صار عمرها سنتين وتعرف كل شي اسال الله ان يحفظها لي ويحفظ لكم اولادكم ولا تشوفون فيهم مكروه ..
وهذي قصتي مع بنتي واتمنى من كل ام تقرا وتسمعها انها تستفيد وللي اولادها يجلسون على هالقناه او اي قناة غيرها للاطفال بالساعات او على tv انها تمنعهم وتعوضهم بشي افضل والله اللي تبي صلاح اولادها تمنعهم من الجوال والتلفزيون وبتشوف كيف اولادها فيهم فطنه وذكاء وجراءه .
.
.
وصلى الله وبارك على نبينا محمد صلى الله عليه وسلم