عزيزتى اتمنى لك رحلة سعيدة بالنسبة للاماكن فى القاهرة كتير ممكن تزورى الاهرام و خليها من الساعة الخامسة مساء يعنى اخر النهار عشان الجو يكون كويس و الاهرامات بتقفل الساعة 8 مساء و لو بتحبى العبايات و الجلاليب البلدى روحى قرية كرداسة عندهم انواع كتير و اسعارها مناسبة لكن فصلى معاهم و طبعا فى سينمات كثيرة وافلام الصيف كثيرة و المسرح ايضا بس انصحك خللى السينما و المسرح فى الاسكندرية لانك هتكون فيها مدة اطول من القاهرة و على حسب اللى هيكون معاكى يعنى لو معاكى اطفال يبقى لازم تروحى حاجة فيها ملاهى زى ماجيك لاند و السيرك لو بيحبوه و فى حديقة الحيوان روعة و جنينة الاسماك فى الزمالك و روحوا مدينة الانتاج الاعلامى و لاتنسى زيارة الحسين و طبعا المنطقة اللى حولين الحسين زى خان الخليلى و الغورية هى مناطق اثرية قديمة و كمان ممكن تتسوقى منها و كمان عندك الحديقة الدولية فى مدينة نصر و عندك برج القاهرة رائع سوف تشاهدين القاهرة كلها منه و ممكن تتغدى او تتعشى فى اى باخرة رحلة ساعتين زى فرعون النيل و بالنسبة للتسوق على حسب المنطقة اللى هتنزلى فيها يعنى عندك مولات كتير منها السراج مول و الحرية مول و مركز التجارة العالمى و اركاديا مول على الكورنيش بجانب التليفزيون و جميع المولات اللى فى الفنادق و محلات وسط البلد زى محلات قصر النيل و شارع 26 يوليه و الشواربى حسب المكان اللى هتزوريه و طبعا فى اماكن كتير ممكن تشوفيها فى القاهرة بس انتى هتقعدى 3 ايام فقط
اما بالنسبة للاسكندرية فى عندك المعمورة و عندك المنتزه رائع و زورى القلعة قلعة قايتباى خطيرة و الجو هناك ستشعرين بالبرد و عندك كازينوهات كتير كلها على البحر مباشرة و عندك اماكن للتسوق زى زنقة الستات و المنشية و على فكرة الاسعار فى الاسكندرية ارخص فى الشراء من القاهرة و خاصة الاحذية الجلد الطبيعى و لو تحبى اى سؤال انا تحت امرك