نداء لكل ام جربت تجهيز الولادة و النفاس خاصة للي مجتمعهم مظاهر

السلام عليكم ورحمة الله وبركاته

خواتي ان بكرية ولسا بالشهر الرابع الله يتممه يارب على خير ويجعله ذريه صالحه مباركه باره ويرزق كل مسلم ويفرح قلب كل محروم
وطبعا انا اكبر بنت عند اهلي واول حفيد بالنسبه لهم وللاسف ماعندنا معرفه نهائيا لا بالتجهيز للبيبي ولا للنفاس ..وامي لها سنين طويله مانفست احد من خواتها فمره ناسيه هالشغلات حبيبة قلبي وشايله هم وش بتسوي لي.
وطبعا اللي مخليني شايله هم مو بس اني ماعرف وش اسوي وايش اشري لا
اللي مخليني مهتمه هو اني كيف بيمديني اجهز وانا ادرس ودراستي صعبه حيل ومافيه وقت
فانا ودي اخلي كل شهر اشري فيه شي معين عشان اخلص منه في هالشهر وعشان الميزانيه بعد ماودي تتراكم علي.
فانا ودي تنصحوني فرضا انا متى اجهز لنفسي من قمصان وبجامات ولبس نفاس واي شي يخصني وكيف اخذ المقاس اكبر مني بكم نمره ؟
والبيبي اش اجهز له من اول مايولد لحد عمر كم؟
ومفرش المستشفى وتقديم المستشفى والبيت بالكيف والكم واي شهر ؟

ابلشتكم بس بالمختصر ابي اسوي جدول كل شهر اسوي شي بحيث مااوصل اول الثامن الا وانا مخلصه نهائيا لاني اصير وقت اختبارتي النهائية.
هذا الموضوع الاول


الثاني :
-انا عاجبتني اشياء بالنت شفتها من ماركه رالف لورين وتومي ودي اشريها لكن صاحباتي ما أيدوني يقولون يجيك هدايا ملابس فلاتستعجلين؟ فايش رايكم
-انا ودي اشري قميص المستشفى اللي قطعه وحده وساتر بس ابيه شي ثقيل وكشخه وبرضوا ماحد ايدني يقولون المتعارف عليه قطعتين ؟وش رايكم

لما استقبل الناس بالبيت ان شاءالله لازم البس جلابيه؟ بالمره ماحبيت سالفه الجلابيات ونفسي بالقمصان سواء قطعه وحده او ثنتين ؟واذا عيب ولازم جلابيه ابي جلابيات الوانها ورسماتها ناعمه مره وبنفس الوقت ثقيله وكشخه ومابحياتي حصلت اشياء عندنا بالرياض بالشكل هذا؟

انا نفسي بارواب ماركات زي روبيرتو كفالي ودولتشي اند قبانا بس مادري وين احصلها هنا او جده او البحرين فاللي يعرف ياريت يدلني؟

بالنسبه للبس البيبي حق التقديم في النفاس وش فيه خيارات غير القرعاوي قاليريا لاني ماحبيت سالفه تكرير ديور كل من زرتهم ملبسنهم ديور ولا الفيرو مارتيني ..ورباعيات حلو بس مافيه لحاف اللي نشيل فيه البيبي ..هل في محلات تبيع اشياء ثانيه وحلو مختلفه هنا او بالبحرين او بجده؟

خلصت خخخخ
ادري طولت عليكم بس استحملوني هالبيبي الله يحفظه ويجيبه بالسلامه مفرح الكل قبل يجي واهلي مره متحمسين يرتبون له من الحين وانا معهم
فساعدوني الله يسعدكم لو بكلمه وحده يمكن تنفعني.

للعلم انا ماعرف وش جنس البيبي لحد الان الله يجيبه سليم طيب معافى ويرزق كل محروم يارب