كفآني عذآب @kfany_aathab_6

عضوة فعالة

نداء للحريم الفاهمات الحكيمات .....اخوي المراهق والبلاك بيري

صباحكم / مساكم ورد
:26:

اخواتي العزيزات الحلوات اللي ما احد مثلكن بهالعالم

قبل ما اقول مشكلتي ابي منكم حاجتين>>>طرار ويتشرط
اولا: اقروا الموضوع لنهايته مو تجي وحده تقرا سطرين وتدرعم ترد وهي ماتدري وش السالفه
ثانيا:بعض العضوات الله يهديهم طايحين في التكذيب>>قلت البعض لحد ينبرش علي:icon33:
انا موب مضطره اخترع مشكله عشان اسوي زحمه وازيد عدد مشاركاتي ع الفاضي فاللي بتصدقتي ترد علي جعلها الجنه واللي موب مصدقتني ترى محدن حالف عليها ترد علي جعلها الجنه بعد>>متعقده من بعض الردود لا تلوموني

واللحين نجي للمشكله ياطويلات العمر

ولد خالي عمره 15 سنه وهو اخوي من الرضاعه >>انا راضعه مع اخوه الكبير
هو ماعنده خوات كبار كلهم صغار وخالي دايم مشغول بحكم عمله وامه مريضه الله يشفيها يعني الولد ماله احد يشكيله الا انا بحكم اني اخته الكبيره (عمري 23) ودايم اهتم فيه من هو صغير وقريبه منه كثير وهو يثق فيني وعلى قولتهم يعتبرني امينة اسراره ويقولي ع كل شي يسويه
وهو ساكن في منطقه غير منطقتنا تبعد عننا ساعه ومانجيهم الا بالاجازات ومرات نروح خميس وجمعه>>>شرحت لكم وضعه عشان تكونون بالصوره

هو معه بلاك بيري الله لا يعده من جوال ماجاب لنا الا المشاكل
وكنت اسولف معه برسايل sms لان انا مو مفعله خدمتي
قالي انا بقولك شي فيه وحده اسمها مريم اضفتها واسولف معها من امس سوالف عاديه واليوم قلت لها كلام وحذفتني
انا كن احد كاب علي مويه بارده
ارسلت له : من ذي مريم ووش قلت لها
قال: مريم بنت عمرها 21 كنت اسولف معها سوالف عاديه وقلت لها كلام عيب وحذفتني
اذا تبيني اقوله لك قلته بدون فعل لانك اختي
انا انصدمت وما عاد ادري وش اسوي ادري انه قايل كلام عن الجنس >>عذرا عن هالكلمه
ارسلت له وقلت خلص رصيدي بعدين نتفاهم ع هالموضوع >>توهقت والله وقلت مالي الا اني اصرفه لين اشوف حل:(

واللحين مدري شلون اتفاهم معه انا متاكده ان اصدقاه هم اللي معلمينه ع هالشي وهم اللي معطينه البن حق البنت
وانا اعرفه زين هو جريء مره وعادي يقول اللي بخاطره ولا عليه من احد

لدرجه مره سالني عن العلاقه الزوجيه مع اني موب متزوجه
يقولي ابي اعرف شلون تصير:09:
انا طارت بوهتي قلت وشو تبيني اعلمك ياولد استح توك صغير ع هالسوالف
قال انا اعرف بس في شغله وحده ما اعرفها علميني قلت معصي توك صغير استح ع وجهك تكلمني بهالطريقه عيب >>عاد انا وجهي صار الوان وذبحني الاحراج واذا انحرجت ما اعرف اهاوش ولا كان فقعت وجهه وقتها
قال طيب ليش استحيتي >>كشفني:44:
ترى عادي احنا اخوان مافيها شي تعلميني >>موب اقول الولد مايستحي وجري عادي عنه يبيني اعلمه
قلت لا هالامور مافيها عادي والحياء شعبه من الايمان استح وانت تكلمني بهالمواضيع
قالي انا بس ابي اعرف اذا جاء....>>يبي يكمل ويقول السؤال ياويل حالي
حطيت يدي ع فمه قلت لالا والله ان قلته اني ماعاد اكلمك عيب ياولد وعصبت عليه
عاد شافني بديت ازعل وسكت

المهم يابنات ياحلواات ياشاطرات جعل رياجيلكم مايعرسون عليكم

شلون اتعامل مع هالورع والله انه جنني من يوم السبت وانا بس افكر شلون اتكلم معه ووش اقوله ما ابي اهاوشه واعصب عليه واستخدم اسلوب قاسي اخاف ينفر مني ولا عاد يقولي شي
وما اقدر اقول لخالي لان الموضوع محرج واذا عرف اني قلت لابوه بيزعل وماعاد يثق فيني
وامه مريضه الله يشفيها ما ابي ازيد همها

وانا احس ان الولد مسؤليتي ماابي اتركه كذا مع العلم يابنات والله اني دايم ارسله رسايل ادعيه واحثه ع الصلاه وبر الوالدين واذكره بربه والاخره وهو يتجاوب معي يعني مايكره هالاشياء ويقولي انا اصلي بالمسجد كل صلاواتي وادعي ربي واقرا قرآن والله مدري عنه صادق ولا بس يسكتني

هو مايحب زعلي ولا يبيني اتضايق منه مره زعلت عليه وقعد يبكي ويقولي تكفين سامحيني والله مالي غيرك لا تتركيني >>يعني اقدر استخدم هالشي لصالحي

تكفووون جعلكم الفردوس والله ماعندي خوات استشيرهن واخليهن يساعدني ولا كتبت الموضوع الا فعلا
ابيكم تعلموني

كيف انصحه بأسلوب بعيدا عن العصبيه والهواش
وكيف اعرف انه ماراح يرجع لها الشي لاني بعيده عنه موب دايم اقدر اجلس معه واعلمه الصح من الخطا خصوصا ان اصدقاه معه طول الوقت بالمدرسه وبرى المدرسه والله اني خايفه عليه وعلى مستقبله اخاف يطيح بهالطريق ولا عاد يتركه وتتطور المسأله ويجي شي اكبر من السوالف بالبلاك بيري

بتسألوني ليش تشترون له بلاك بيري
انا اقولكم
هو قال لابوه اذا نجحت تشتريه لي خالي رفض بالبدايه
قال كل العيال اللي بعمري معهم بلاك وش زودهم عني
وخالي مايحب ان عياله يكونون اقل من غيرهم وشراه له

ومثل ماقلت لكم هو مراهق وانا ما اعرف اتعامل مع المراهقين اسلوبي كله عصبيه وهواش وتمعيط شوش والمراهق يبيله احد يسايسه وانا ماعندي صبر
وهو بعد عنده فراغ عاطفي من انولد وامه مريضه ومنشغله عنه وانا مدري كيف املأ هالفراغ اللي عنده

ادري طولت بالهرج وهذرتي واجد وكلامي موب مرتب بس شسوي تحملوني عاد:42:

الله يعطيكم اللي تتمنون ساعدوني اعتبروه اخوكم الصغير شلون بتتعاملون معه

تكفون يابنات اللي ماتبي ترد بس تدعي له ان ربي يصلحه ويعصمه عن هالطريق ويجعله إمام مسجد
وتدعي لامه بالشفاء العاجل

يلزم عليك تسجيل الدخول أولًا لكتابة تعليق.

تسجيل دخول

جنة مشاعر • 13 سنة

محتاره في الحلول والا كان افدتس
ماقول الا الله يهديه ويعمي بصره وبصيرته عن هالحرام
ويبعد عنه وعن اخواننا المسلمين طريق الشيطان
ويشفي امه شفاء لايغادر سقما

حياه الخليج111 • 13 سنة

خخخخ والله مافيه صغار
والله مدري وش اقولك انصيحيه وخوفي من الهيئه يمكن يدرون ويسجنونك ومن الكلام هاذا وشوفي

جناان الدنيا • 13 سنة

حياه الخليج111 :

خخخخ والله مافيه صغار والله مدري وش اقولك انصيحيه وخوفي من الهيئه يمكن يدرون ويسجنونك ومن الكلام هاذا وشوفي

خخخخ والله مافيه صغار والله مدري وش اقولك انصيحيه وخوفي من الهيئه يمكن يدرون ويسجنونك ومن الكلام...

كفآني عذآب • 13 سنة

جنة مشاعر
آميين الله يسمع منك
الله يجزاك خير ياقلبي
حياه الخليج
صادقه ماعاد فيه صغار الله يهديهم بس
نبهتيني عن موضوع الهيئه اخوفه فيهم كوده يركد شوي
الله جزاك خير يابعدهم
جنان الدينا
مشكورره ياقلبي ع المرور
الله يجزاك خير

روني90 • 13 سنة

والله مااني عارفة اش اقولك بس ادعي ربي انه يهديه ويخلصنا من بلاوي البلاك اللي خربت بيوتنا وازواجنا وحتى شبابنا