ندمانة على ردي لها بس من قهري على صديقتي

صبحكم الله بالخير
اخواتي المشكلة انا ما احب اشوف ظلم او تفرقة او عدم عدل وخصوصا ظلم الاقارب
على طول انغبن وانقهر واصير اكل بنفسي وودي لو امسك الظالم واقطعه تقطيع لاني مريت انا وزوجي وامه بظلم عظيم ولله الحمد تعديناه وصار ذكريات
انا عندي صديقة من ١٢ سنة
علاقتي فيها قوية جدا وهذي الحرمة يكرهوها اهل زوجها كثير
والله مافي سبب بس كذا حقد وكراهية تعرفون بعض اهالي الزوج كيف
اخوات زوجها وامه ليل نهار يسببو المشاكل بينها وبين زوجها وزوجها يحبها بس مايقدر يواجه اهله ويسكت ويقولها طنشيهم
تسببو بطلاقهم قبل كم سنة وامه بغت تموت يوم رجعها وزعلت منه
كل هذا بس من الغيرة والحسد لانها ناجحة بحياتها كثير وهم لا
للحين ميتين يبغونه يتزوج عليها وماقدرو لدرجة امه كانت بتخلي ام العروس تكلمه وتقنعه يتزوج بنتهم ويطلق حرمته
شوووفو الظلم وعدم الخوف من الله والنفوس المريضة
بعد ماعجزو بالزوج التفتو للعيال يحرشونهم على امهم ويكرهوهم فيها كل مازاروهم والبنت الكبيرة طاعتهم وصارت تكره امها وتعق فيها وتسبها واخوها لا واقف بصف امه لدرجة ضرب اخته برمضان دخلها مستشفى وسب جدته
حسبي الله ونعم الوكيل فيهم كيف شتتو العائلة وللحين مستمرين بالكراهية
امس تقابلت بالمشغل مع ٢ منهم وحدة عمرها ٢٩ سنة ولسا ماتزوجت والثانية عمرها ٣٦ وللحين الله مارزقها بذرية ومن كلمة ل كلمة بيني وبينهم
قلت لها انتي متزوجة تقولي لا ادعي لي بالزوج الصالح
قلت لها وانا طالعة قبل ماتطلبي من الناس يدعون لك بالزوج الصالح ول اختك بالذرية صفي نيتك وكفي شرك وظلمك عن زوجة اخوكم واتركوها بحالها ومشيت
بعدها مدري حسيتها لقافة اني كلمتها كذا واني جرحتها بس اقسم بالله من قهري على صديقتي وعلى حالتها النفسية لي صابتها بسببهم