ندمت بعد ملكة طليقي تكفون ساعدوني

السلام عليكم
بنات مدري منوين ابدى بس احس بضيقه وقهر ولادري وش اسوي انا مطلقة برغبة مني من ولد خالتي نحب بعض من احنا صغار
طلقت لكثرة المشاكل بيننا مايحب اهلي يتدخلون في شيء يخصني انا اشاور خواتي متزوجات في بعض اموري ويرفض بعض الي اطلبه ويقول مانبي نقلد الناس لنا حياتنا وانا انقهر من رده لي واحيان يردني لا اروح لجمعة خواتي يقول يخربن عليك وهن ينصحن لي من حرص علي مو تخريب وبعد فيه غيره قويه اذا طلعت معه مشوار وفيه عيال واقفين برى عند البيت يقولهم روحو ماتقفون هنا وانا انقهر احس كنه شك في ولا كيف وسالت مستشار اسري قال اذا مايفتش جوالك ومايبحث وراك ماهو شك غيره ؟
وبعد وكل شي له فيه راى حتى لبسي ومكياجي يقول سوي كذا احسن من كذا وانا اعانده في امور كثيره بس تخصني هو يعصب ويطلع برى البيت اذا صارت مشكلة الى ان يوم قال لأخوي اذا بتستمر على ذا الوضع تسمع كلام اهلها ولاتمشي على كلامي بطلقها؟
هنا انا جلست في بيت اهلي مارجعت معه وحسيت بكره شديد له بسبب كلامه عني عند اخوي كأني رخيصه عنده يطلق ماهميته !
وبعد اسبوع جاء وحاول يرجعني ورفضت حتى اقابله وهو يتردد علينا كل اسبوع واقابله احيان واقول مابيك طلقني واحيان ارفض مقابله ويوسط اهلي كلهم حتى خدامتنا يرسل معها ورقه لي يعتذر ( لأني حاضرته من الجوال ) وانا رافضه وصرت استمتع بمحاولاته واحس لي اهمية حتى اهلي قالوا يحبك وماراح يترك حسبي الله على ابليس الي وسوسلي وخربت بيتي
مع الرفض واصراري على الطلاق طلق (طلقة وحدة بصك من المحكمة ) وانا ماكنت افكر غير فالطلاق واحس اني ماعاد ابيه خلاص وبعد الطلاق حسيت ان كأني في حلم وتو صحيت منه والي زاد الطين بله خطب بعد الطلاق على طول ووافقوا عليه وتملك وزواجه بعد كم شهر
يابنات شور علي وش اسوي احس بنار في صدري مقهوره مقهوره عليه احبه واعرف انه يحبني ليش يتزوج بسرعه ليش ماعطاني فرصة اراجع نفسي مع الوقت ليش


وش تنصحوني فيه ارسل له اقول رجعني خصوصاً انه ماتزوج للان ؟
ماودي اصير في موقف المتنازل بعد كل الي سويته وبموت حسره وقهر وانا اشوفه متزوج غيري وناسيني
لاتقولون لي تنسين مع الوقت مابغى غيره لو ابقى طول عمري ماتزوجت


سبحانك اللهم وبحمدك اشهد ان لا اله الا انت استغفرك واتوب اليك