لا تحرجينه بالاسئلة يمكن مار بتجربة سيئة ولا يبي يعترف اهم شي افهمي المرض وابعاده وعلاجه

زوجي تعب قلبي عنده مشكلة ولا كنت اعرف بالبداية والى يومك ما ادري هو عارف من الاول والا لا لانه متزوج قبل وعنده عيال
وانا اخذته له زمن عن زوجته ولا حملت يصير معاي حمل ضعيف وينزل على طول فماني متاكدة تابعت نع دكتورة ومنشط وكل لين اخر شي قالت لا عاد تجيني لين تجيبين تحليل زوجك معاك
الصدمة طلعت نتيجة التحليل 0 الحيوانات المنوية 💔😢

اكتشفت بعدين ان فيه عدة زواجات يمكن كان يجرب نفسه يمكن الله اعلم طير عقلي لين راح يحلل ولين اقنعته بالحقن المجهري رافض وكان من شروطه ما احد يدري وطبعاً اعذاره انه هذا الشي عشاني 🙄
بعدين يشككون بنسب البيبي ومن هالخرابيط صرت اخذه على قد عقله واخليه يشوف اني مصدقته لكن مع الوقت والايام بدا تدريجياً يتغير لما شاف اني حافظت على صورته واوحيت اني عندي انا مشكلة وشاف اني متمسكة فيه وقلت هذي المشكلة ممكن تكون في اي انسان هذا شي من الله انا والا انت كله واحد
يعني يبي لك صبر وطولت باااااال وحب كبير وتضحية الان بدا شوي يتكلم عن انها مسكينة عذبوها وبدا يلمح ان الحمل بتدخل بس بدون تفاصيل صار الموضوع بالنسبة له ابسط اهم شي يشوف انك تحبينه وان هذا الشي ماراح يغير مشاعرك
واذا كنت مو مقتنعة فيه مرة لا تضيعين وقتك لان من حق كل يحب وينحب ويحس انه مرغوب وان الطرف الثاني متمسك فيه الله يسهل امرك الحمدلله موضوعك ان شاء الله اهون بكثير

معليش صكيت راسك لكن لاني مريت بظرفك وكنت اتمنى احد اقدر اشكي له همي والله بالليل صيييياح وبالصلاة مخنوقة ولا اقدر انطق بحرف
بديت ارتاح لما صرت اشتكي همي لربي وصرت اشوف احلام سبحان الله كنت اتكلم مع الله سبحانه برمضان وانا اصلي التراويح بالبيت والله احيانا وانا اقرا الفاتحة انهاااار واقول ياربي انا ما اتحمل ولا معي احد مالي الا انت سبحانك ولا يعجزك شي انت تلين قلبه وتيسر امري وترزقني من واسع فضلك الذرية الصالحة وتعينني على اني ما افشي سره ولا احرجه او اجرحه والله ارتاح وانام بعدها وبدا سبحان الله يوافق على اشياء كان يقول مستحيل خلاص روحي لاهلك الله يستر عليك

الحياة تذهبُ وتبقى الباقِياتُ الصّالحاتُ سُبحان الله ، الحمد لله ، لا اله الا الله ، الله اكبر ، لاحول ولا قوة الا بالله.