cute moon @cute_moon_1
محررة ذهبية
نزلت للأن 7 كيلو ومازالت الرحلة مستمرة (امور تعلمتها بالرحله)
السلام عليكم ورحمة الله :")
كيفكم بنات وايش اخباركم ..
الحين انا قد بدأت بعمل الرجيم ومازلت مستمره فيه بثبآت :16:
لاحظت كم شئ وحبيت انبهكم فيهآ ..
اول شئ : لما خلاص تقررين انو تبدأي بالرجيم باليوم فالفلاني ، فأبدأي فيه عآدي .. البنات لو بدأو وخبصو يقولو خلاص نكمل تخبيصه ونبدأ بكره وهذا مره غلط وحتستمري تاجلي وتأجلي حتى تطير فكرة عمل الرجيم من مخك !
فلما تقرري تعملي رجيم فأبدأي عادي.. لو خبصتي بوجبه فعادي كملي باقي الرجيم بالوجبات التانية واعملي رياضه زي ماكنتي مقرره .. بكذا انتي حترسخي التغيرات الي حتحدث بحياتك زي انو : وجباتك حتقل ، انو حتبدأي تخصصي وقت للمشي والرياضه .. فتتعودي ويصير مع الايام حتلتزمي .. ..
( انا ليآ شهرين تقريبآ بادئة رجيم وفيكان كم يوم اخبص فيهم بشكل كبير لدرجة انو ازيد كيلو بيوم ! لكن كنت اكمل عآآآدي وهذا كان سبب اني انزل ولو اني قلت خلاص ابدأ من بكرآ لتكاسلت ولا كنت نقصت السبعه كيلو من بعد مشيئة الله )
ثاني شئ : المشي ثم المشي ثم المشي ..
المشي ضروري وربي انه اسهل شئ في حرق السعرات الحرارية .. من الضروري جدا لما تبدأي تمشي ع السير انو تمشي وقت قليل زي نص ساعه لحتى تتعودي وبعدها تزودي وتزودي لحتى تصيري تمشي ساعه.
(أكبر غلط عملته انو ع طول ابدأ ساعه .. لأنو اتعب وجسمي يوجعني .. ومن حقه لانو الجسم تعود ع الكسل والجلوس ، فحيتعب لما ترغمية يتحول من حالته الكسل للحركة ! فالتدريج وربي انه حلو.. الحين انا صرت امشي ساعه ع السير واشوفها شئ سهل وحلو ويخلص الساعه وانا احس انو اقدر ابذل المزيد ، قبالتالي انبسط واكون متحمسه انو امشي ساعه بكرا :22: ..
ثالث شئ : ذي النقطه تتعلق عقليآ ..
مرة قرأت يبنات بكتاب من كتب تطوير الذات جمله اثرت فيآ مره .. معناها : ( انتي الوحيدة مسؤوله عن نفسك ، انتي الوحيدة مسؤوله انو تأخدي بيها نحو الافضل او ترميها بالقاع، فلاتنتظري الإلهام من احد او التشجيع ، انتي شجعي نفسك وامسكي بيدها نحو عالم الرشاقه ، جسمك هو مسؤولتك انتي ماهو مسؤوليه زوجك او اهلك )
انصحكم انو تتخيلو دايم شكلكم وانتو نحيفات.. انا كنت حتى اتخيل نفسي بزواج اثنين من قرايبي الي حيكون بالصيفيه ، واتخيل اني لابسه فستان حلو وارقص ع الكوشه ، واتخيل قريباتي يطالعو فيآ بإعجاب .. يآآآه والله ابتسم من التخيل ويعطيني جرعآت مو جرعه ...
رابع شئ : االمفروض اكتبه اول شئ ، سؤال الله تعالى انو يعطيكي القوة والعزيمة لحتى تنحفي ، وربي انا كنت ادعي انو انحف ، بس صرت ادعي انو يارب اعطيني عزيمة وقويني لحتى انحف وربي وشفت فعلا نتائج رهيبه لذا الدعآء ..
هذي هي الأشياء الي اعتبرهآ من الأسرار الي تخليكي مستمرة برحلتك الجريمية .. اعملي الرجيم الي تبيه بس حطي هذي الأمور حلق بأذنك وبإذن الله بتستمري بشكل أفضل =)
ويآآرب يارب اعطي العزيمة والأرادة الصلبه لكل حوائية تبي نحف ووفقها ويسر عليها يارب .. قولو امين .
وشكرا :)
64
8K
يلزم عليك تسجيل الدخول أولًا لكتابة تعليق.
منال الهدايه
•
صح كلامك والله والله ينحفك بصحه وسلامه ويصبرني ويعطيني العزم عشان اكمل مشواري
الصفحة الأخيرة