نزيف حمل مفاجىء

كيف حالكم ؟.
تخيلوا امس جالسه بامان الله الا ويجيني صداع شديد مرررره وقالوا الضغط مرتفع شوي لكن قوة الصداع مو منه ، شي عجيب واخذت ادويه ضغط عاى طول .
المهم سبحان الله ويشد الصداع ويشد ، وشوي اقوم من مكاني الا والقى كل ملابسي وفراشي دم .. يووه يابنات ياشين المنظر دم بدون مقدمات .. حامل بالاسبوع ١٢ تقريبا ووضعي تمام وتوي مراجعه وشايفة الجنين والنبض وقايلين كلش زين الا فجأة بنام وألقى نفسي اسبح بالدم .

تدرون سبحان الله يوم شفت الدم مدري ليش هديت وسميت بالله وزوجي ينتظرني مرتاع يبي له عصفر مسيكين ، وانا من دون وعي قمت للحمام وانتم بكرامة اتصرف غسلت وتنظفت وتوضيت وغيرت ملابسي قلت مدري وش يواجهني وافكر بنفسي ليش اطير واركض ؟! ما هو الدم موجود والركض موب موقفه فخلني اتصرف بهدوء ان الموقف مو جديد علي فلو كان ميت ماراح يفيد الركض ولو كان حي برضو ماراح يفيد لأن كل الاجراءات عبارة عن ادويةبحال كان حي .
.
لبست وتطهرت ولبست عباتي ووقفت وصليت ركعتين طلبت الله قبل اطلع للمستشفى ، لحظة كنت اتصرف فيها من دون تخطيط ، دايم اطلب الله يدلني عالخير فعرفت ان حاجتي عند الله مو عند احد من خلقه.
هالموضوع كله طبعا دقايق مو وقت طويل ، سبحانه يابنات طامني باسمه ورحت ..
رحت للمستشفى ويسوون اشعه وانا بصداعي لاهية ويقولون لي الحمد لله الجنين سليم و ينبض والرحم مافيه اي تجمعات دمويه ولا شي ..يارب لك الحمد والشكر حمدا كثيرا طيبا مباركا فيه .
طيب هالدم من وين ؟ مانعرف
لكن ترى الحمل مهدد بالاجهاض لأنه مو عارفين وش السبب .
قلت دامه ينبض ودعته الله .
و رجعت بيتي وربطت راسي وانسدحت وعالادويه حاليا الله ينفع بها وجلست اقرأ أورادي والبقرة واطلب الله وادهن بزيت زيتون واشرب بذالزمزم ..

طبعا محد عارف السبب لأنه ابن ادم لم يؤتى من العلم الا قليلا لكن ربنا قال انه ينزل من القران ماهو شفاء ورحمة سبحانه .. يالله اني توجهت لك وأطلبك انك تحفظني وتحفظ مافي رحمي وتجعله حسن الخلق والاخلاق ومن الصالحين .
.
..

اكتب لكم وانا مصدعه مرررة ، عطوني مسكن عبارة عن محلول بالوريد يوم شافوني تعبانه من الصداع .
.
طولت عليكم لكن حبيت تدعون لي وافيد من يبحث وحالته مثل حالتي بالاجهاضات المتكررة ..
.