نسيان وعدم تركيز زغللة بالنظر تنميل تعالي أعلمك وشو هذا ..

السلام عليكم

بنات أنا تنومت بالمستشفى فترة طويلة لسبب غير الي فوق ولله الحمد على ما كتب

وكنت قبلها اعاني من هالأعراض الي فوق فقلت يابنت ليه ما تشيكين وتشوفين وشو هذا الشي الي معاك ما دمتي بالمستشفى حللي هالقعدة وفعلاً ناديت الدكتورة وقلت لها معاي :

تنميل نصفي خاصة إذا طولت الجلوس على الكمبيوتر يوصل لحد شفايفي !!! ؟.. وعدم تركيز وأحياناً إذا مشيت أحس بعدم توازن بسيط ..

راحت جابت لي دكتور مخ وأعصاب وشرحت له كل الي عندي ..

فحلل فيتامين ب12 وطلع عندي نقص فيه وأعطاني إبر كل أسبوع إبرة وبعدها كل شهر ابرة وبعدها كل شهرين وهكذا لين يرجع طبيعي بس حصلت ظروف خلتني احوس مواعيد الابر وافوتها الله يستر

تذكروا تراه قال غالبية النساء السعوديات عندهم نقص فيه ..

المشكله يا بنات أنه يأثر عالجهاز العصبي ونقصه الشديد يسبب انيميا خبيثة وخرف مبكر وهشاشة عظام الله يحفظنا ويحفظكم وهالمعلومات ماقالها لي أنا بحثت في موقع بحث ولقيتها عشان كذا حبيت انبهكم لأنه قال السعوديات غالبيتهم عندهم نقص وفيه حبوب ياحلوات بس انا لقاه شديد فأعطاني إبر .. وسلامتكم ..