نصائح غفلنا عنها جميعا

السلام عليكم،
هيدي أول مرة بكتب فيها بالمنتدى مع إنو كثير بتصفح و بقرأ مشاركاتكم خصوصا الأشيا المتعلقة بالإهتمام وعلاج مشاكل الشعر.. أنا شعري تعرض من ٣ سنين لتلف كثير كبير بسبب حنة طلعت مغشوشة وعملت بعدها سحب لون وهالشي دمر شعري أكثر ما بتتخايلو..
ما خليت نوع زيت أو وصفة إلى وجربتها ومن كثر التعب النفسي و اليأس يلي صرت فيه.. كنت مقضايه وقتي بهالمنتدى بالذات عم أقرا تجارب عن أي مكون بيخطر ببالي.. عن أي نوع زيت.. و وصلت لدرج اني صار عندي هوس بشراء الزيوت والأعشاب ..
لما تلف شعري قصيته كثييير قصير بسبب انو كان في تفاوت بالألوان وكنت عم جرب كل شي ت يعبى والأهم ت يطول بس مافي شي فادني بشكل منيح و يمكن أنا عاليأس كنت جرب كذا شي سوا وهالشي ما منيح أبدا وما بيسوا الشعر يتعود على شي وينقطع منو فجأة..
بس خلال السنة الأخيرة تعلمت اشيا كثير وحابة انقلها إلكم.. أول شي أنا وقفت شراء زيوت و أعشاب مندون ما أفهم او كون عارفة حالي شو بدي اعمل تحديدا وعملت تحاليل طبية وطلع عندي نقص فيتامين دال بسبب انو نحن كمحجبات جسمنا و شعرنا ما بيشوف الشمس فبينخفض معدله عنا و شعرنا بيتساقط..
بعد هالشي اشتريت خليط زيوت بتصنعه بنت لبنانية بطول الشعر بشكل منيح كثير و بلشت استعمله مرتين بالأسبوع.. وفعلا شعري طال عليه و فرق.. وكان في مصنع لبناني محلي بيزرعوا الوفيرا وبيعملو منها ماسك وزيت للشعر كمان كثير مناح فادوني بتخفيف التساقط وبالتالي التكثيف.. استعملتو لمدة ٤ اشهر و هلا اسبتدلته بماء البصل
تحسن شعري بشكل ملحوظ بس صرت لاحظ انو لسا في شي مش زابط مرات يوقف الهر وفجأة يرجع لحد ما من فترة صغيرة عدت فكر انو اذا الفيتامينات عندي منيحة.. و عم اعتني بشعري كتغذية و زيوت شو الغلط ؟
استنتجت شي كثييييير منغفل عنو نحن الصراحة.. من فرشياة الشعر يلي بتنتفه نتف ولا البشكير يلي بتخلي ينفش و يخسر لمعته ..
أول شي عملته اني اشتريت فرشاية شعر سنانها واسعين وعملية اسمها EZ detangler وهي تستعمل لكل انواع الشعر وكثير خفيفة علية وما بتنتفه..
ثاني شي اشتريت منشفة بتجي متل قبعة مصنوعة من ألياف ما بتضر الشعر وناعمة اسمها microfiber towel بتنحط قريب ال نصف ساعة بعد الحمام و ما بتسد المسامات بالعكس جدا مريحة..
بالإضافة ل شي كثير مهم و هو انو جبت غلاف مصنوع من قماش الستان للمخدة يلي بنام عليها وهالشي بيقلل من احتكاك الشعر أثناء النوم يعني بيساهم ب انو ما يتكسر و يضعف و بيحاظ على اللمعة... الأمر ذاته للربطة يلي منربط شعرنا فيها كثير مهم تكون ستان و اساسا ربك الشعر و شده وقت طويل أبدا ما منيح و بيزيد الفراغات الأمامية وبيعدم الشعر فعليا..
وحاليا بلشت بماء البصل الأحمر مرتين بالأسبوع.. عم رشهم ببخاخ
أنا هلا لأول مرة من سنين بحس انو شعري صحي و انو عم يطول ويتحسن وعم شارك تجربتي هيدي لحتى خبركم انو الزيوت مش كل شي وما بتكفي لحالها.. اعتمدو على زيت واحد و ما تخبصوا اشيا كثير .. هالامور يلي حكيتها مهمة كثير وما بتقل أهمية عن الماسكات ولا الزيوت..
عم شدد على فكرة انو ما تستعملو كثير اشيا سوا لان الشعر لما يتعود على شي و نوقفه فجأة رح يعمل ردة فعل عكسية وما رح نعرف فعليا شعرنا على اي خلطة استفاد...
يعني خلاصة روتيني الحالي :
نوع زيت للتطويل- ماء البصل الأحمر للتكثيف أو اي شي استفدتو عليه لان بتفرق من شخص لشخص ..
مرتين أسبوعيا..
مع قص ١ سم من شعري كل شهرين
خلاصة الاشيا يلي مهم تكون قبل الزيوت :
التأكد من عدم النقص في الفيتامينات
قالب مخدة ستان (حرير)
فرشاة شعر ذات اسنان واسعة + microfiber Towel (منشفة)
ربطات شعر ستان تقلل الاحتكاك.
عذرا على الإطالة.