نصائح لشراء سيارة للمبتدئه

حبيت اكتبلكم نقاط ممكن تساعدكم في اختيار السيارة المناسبه طبعا اكتبلكم من خبره وودي لو كنت اعرف هذي النقاط كانت بتساعدني جدا
خذي السيارة اللي فيها تنبيه للبقعة العمياء واللي بتسهل كثير من عملية التحويل من مسار الى اخر في السواقة
خذي سيارة بمواصفات عاليه بحدود امكانياتج بمعنى ،، بدل لا تاخذين مرسيدس فئة اقل ومواصفاتها اقل ممكن تاخذين سيارة ارخص بمواصفات اعلى مثل التويوتا وغيرها
السيارة اللي حابه انج تاخذينها روحي الوكاله واطلبي تيست درايف او سواقة تجريبية وممكن تمرين على كذا وكاله وتطلبين سواقة تجريبيه لكذا سيارة ما تتخيلين كيف ممكن يغير رايج هالشي معنى انه ممكن تحبين سيارة بس لما تسوقينها ما تحبين حجمها وكراسيها وغيرها
كراسي السيارة تجي اما جلد او قماش دائما وابدا الجلد افخم (صح انه في الصيف نار) وطبعا اغلى فانتي شوفي شو يناسب ميزانيتج
في حال خذتي سيارة مافيها تنبيه البقعة العمياء هناك مرايات صغيره عند محلات السيارات يثبتونها هم على المرايات الجانبيه لسهولة رؤية البقعة العمياء
في السيارات الافضل بدون منازع هي السيارات الالمانيه تليها اليابانيه فالبريطانية والامريكية وطبعا الاغلى هي الالمانيه وكل وحده وامكانياتها
اذا اردتي شراء سياره مستعمله انصحج نصيحه انج تاخذينها من الوكالة نفسها مش من حد ثاني اول شي لانه الوكالات تشيك على السيارة كامله ولا ياخذون سياره فيها مشكله صح الوكاله اغلى من برع ولكن اامن واضمن