مرحبا
هذي نصايح للمقبلين على الزواج..من وجهة نظر الكاتبة الي هي انا <احلفي
وطبعا قبل كل شيء لازم تحطون في بالكم ان هالشي طالع من نظرة قاصرة..ومن وحده لم تخض هذه التجربة.
نبدا في البنات..
طبعا كل بنت تتمنى تعيش حياة زوجية مستقرة وآمنة تخلو من المشاكل والشك والخوف ومن هالقبيل..
هنا بسعى جاهدة لرؤية الحلول الي توصلنا لها الشي ..نحن مجتمع البنات العازبات..
الحيـــن فرضا تقدم لك شخص..كيف تعرفين انه مناسب او غير مناسب..اذا كان غريب عن العائلة وماتعرفون عنه شي..؟
طبعا هالشي يحير مررره..وقمة الحيرة انه يتقدم لك شاب توافقين والا ترفضين ..وبناء على ايش؟؟
نبدأ في الحل..
بعض البنات كل ماتتمناه هو رجل وسيم وغني ورومنسى..ومن هالقبيل..
طيب وين المبادئ؟؟ وين الدين؟؟ وين الصلاة؟؟
لا للأسف مخليتها عالهامش لانها تحس انها شي بديهي وماتدري انه فيه رجاجيل وش كثرهم يصير قايم وانلاس تذن وتقيم وتصلي وهو مبرطع عند التلفزيون..
لهذا عزيزتي..أهم شي ..1- اسألوه أو اسألوا امه عن صلاته..! وواهم شي طبعا صلاة الجماعة..فيه ناس بتقولك ايه يحافظ عالصلاة..بس هل هي مع الجماعة اولا ..الله اعلم..
المقصود هو المحافظة على الصلاة مع الجماعة..في المسجد..يعني شخص قلبه حي اذا سمع الأذان..
تدرين ليه..؟ لانه هو اللي بيربي عيالك ان شاء الله..ولأن الصلاة تنهى عن الفحشاء والمنكر..يعني بإذن الله تثقين ان زوجك مو راعي أمور مالها داعي..ولأنه فيه فرق بين انه يقولك روحي صلي..والا انت الي تقولين له رح صل..وهو هذا كبره..ولأن الصلاة هي عماد الدين ..وهي أهم أركان الإسلام بعد الشهادتين..وهي أول مايحاسب عليه العبد يوم القيامة..فـ إذا كان يفرط في أهم شي في الحياة وهو الدين تتوقعين بيحافظ عليك؟
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
ثاني شي..اكيد كلكم سمعتوا بالموضة الي طاحوا فيها الرجاجيل في أول 2009 تقريبا..وهي موضة الطلاق..
تحضرون زواج..فجأة بعد كم شهر تسمعون بطلاقهم..صارت كثيييييييير..
أكيد طبعا أولا وأخيرا هذا الشيء قضاء وقدر..لكن نعمل بالأسباب طيب؟؟
عشان كذا..من الأشياء المهمة الي تسألونها الخاطب (و) أم الخاطب...<<الأفضل تسألونه هو..
2- عن جديته في تكوين أسرة..واستعداده لتحمل المسؤولية وتربية وإعالة الذرية..
وشي مهم بعد وهو رغبته فالزواج نفسه..لأن كثييير من الشباب يتزوج لأن أمه والا ابوه والا اهله قالوله تزوج وراحوا وخطبوا له وهو ماعنده مشكله..لا..لابد يكون هو راغب في هالشي..مب السلام عليكم..في كثيييير ناس تزوجوا بسبب هالشي..واكتشفت ان الرجال ماعنده قدرة على تحمل المسؤولية..والا ماعنده رغبة قوية فالزواج ..
لااااابد لاااابد الرغبة ثم الرغبة ثم الرغبة..وش الفايدة اذا كان عايفك من قبل..وجيتي من باب البركة..لاازم يحس انه حصل على الشي الي يرغبه والي يسعى عشانه..وهو امرأة صالحة وبيت أسري..ويكون متشغف لهالشي..مب عاادي يوم حصل قال يالله وان ماحصل مافي مشكلة..لاياحبيبتي ..بنات الناس موب لعبة..
يعني أعرف شباب..يوم تزوجوا طبعا أمهاتهم الي زوجوهم بدون مايطلبون..وكونوا عائلة وجابوا بزارين..ويوم ظاقت عليهم الدنيا..قالوا لاهلهم محدق قال لكم زوجوني..<<بالله ترضين تسمعين زوجك يقول كذا
والا الرجال وش الي يصعب عليه يقول كلمة طالق..الا اذا كان هالشي عنده ثمين وحاس بقيمته..اما انه يكون سربوت وين ماودوه اهله يروح..هذا بيستسهل الموضوع ..ويالله ..انت طالق..
ختاما..احس هالشرطين الي قلتهم يكملون بعض..لأن الشاب لو كان يخاف الله بيفكر قبل الزواج ويتأنى في اختيار زوجته..
وبــــس..
الله يوفق كل عريس وعروسه وكل بنت بتعرس وبنت ما أعرست..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
نجي الحيـــن للشباب:
انا صراحة ماكنت في يوم من الأيام ولد <<قولي قسم
لكني بقولكم معاناة البنات..
الحين الشاب يتقدم ..يدخلون البنت عليه عشان الرؤية الشرعية..فجأة ..لا مابيها..طيب ليـه؟؟
لأنها سمرا مثلا..والا مليانه..والا قصيرة..
طيب ياعزيزي الشاب..هلا تكرمت وقلت لنا مواصفاتك قبل لاتشوف بنتنا..؟؟ وقبل لاتجرحها؟؟
يعني رجااء خاص..
عشان كذا..اهم شي 1- تحدد مواصفاتك الي مرررره تبغاها..والا ترا مرح تلقى احد كامل..
يعني حتى لو لقيت بنت زينه وفيها كل الي تبغاه..لاتخليها تحتسي..ان تنصدم فالحياة صدمة ابديه..
يعني نصيحتي ..اهم شي جمال الروح..ياما شفنا بنات حلوااات لكن منبووذات ..ليــه؟؟
اما انها تفكيرها معوج يعني تفكير بزران مهنا ثقافة وانسانة تهتم بالدنيا ومن هالقبيل..
والا انها..اللهم لك الحمد والشكر يااارب..!!
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
ثاني شي..ولو اني مستحية اقوله..بس ناظروا بنص عين..هع
ارجوووكم ايها الشباب..الثقافة ثم الثقافة ثم الثقافة..
يعني..لنفترض ان انت ايها الشاب بتسافر لبريطانيا..وش بتسوي طبعا؟؟
اكيد بتدور وتبحث عن الاماكن السياحية والفنادق ومدري وشو..والأسعار..
طيـــب هذا شي حلو..والأحلى انكم تطبقونه عالزواج..
يعني انت بتتزوج..
ادخل النت..تعلم عن الحياة الزوجية..وياكثر هالمواقع..
تعلم الزواج من الناحية الشرعية..وشي الأدعية الي لازم تقولها في اول ليلة من الزواج ..ووش الي يجوز لك ووش الي يحرم عليك فعله..وزي كذا..
مثلا تعلم عن غسل الجنابة طريقته ووقته ومتى يجب ومتى يجوز تأخره وزي كذا..لأن هالشي يتعلق بصلاتك ..
حاول تقرا عن التعامل مع الزوجات ..التعامل مع الأبناء..الأخلاق الأساسية فالزواج.. وياكثر هالشباب الي يتزوجون مايعرف حتى الأشياء البديهية..
تعلم دينك أكثر..لأنك بتكون مربي ان شاء الله ورح تربي أجيال..بتربيهم على ايش؟؟
اكيد لازم تعلمهم الأدعية ..والأذكار..أذكار المساء والصباح..أذكار الدخول والخروج من المنزل ..أذكار دخول وخروج من الخلاء..أذكار النوم..
فيه كتااااب مررره جميل جامع لك هالأشياء..اسمه (تحفة العروس) ..مررره حلو ومشهور مره..
نصيحتي لكل مقبل ومقبلة على الزواج انه يقرا هالكتاب..
وأيضا حلو أنك تفتح البخاري..لو عالنت..وتدخل كتاب النكااح وتقرا الأحاديث..وان شاء الله بيكبر عقلك وتتفتح اكثر..
وبــــــــــــــــــــــــــــــــس..
وان شاء الله تتم الفايدة ولو شي بسيط من هالي كتبته..
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
طيب ..ادري اني طولتها ..بس باقي نقطة بسيطة..
الحين حنا يالعزوبيات..ماخذين فكرة عن المهر..انه لشراء تجهيز الزواج..ويالله فساتين رايحة فساتين جايه..وكريمااااات وخرااااااااابييييط وقرابيع مالها سنع..
نصيحتي لكل متملكة..اذا صرتي تكلمين زوجك..اسأليه عن اهله هم راعين عزايم؟؟ هم راعين عروووس؟؟ هم يجتمعوون دايم؟؟ وزي كذا..
لاني بصراحة عايشت كثير من اوضاع الي حولي.. اول ماتاخذ المهر ..يالله من سوق لسوق..ماترضى بأقل من ست فساتين وكل واحد اثقل من الثاني..ويالله تخمخم من هالمرطبااات ..ويلعبون عليها الناس.. فيه زبدة جسم وفيه مدري وشو..وهي ماتصدق تروح وتخمخم من كل نوع حبة..لاااااااا ياعزيزتي..
مثلا اشتري مجموعة وحده بس..ولو اني منك ما أشتري شي ..لأن الناس ماتحب تعطي هدايا الا مجموعات عطريه..
مثلا اذا صاروا اهل زوجك مو كثيرين عرووس ..اشتري لك بس فستانين..وناعمااات اهم شي..مب اللهم ياكافي..
مثلا اشتري لك خمس تيوراات..
لاتكثرين خلااقيييييين نصيحة مني والله لاتكثريين..صدقيني بتندمين اذا تزوجتي..
يعني والحمدلله ترا هذي نصيحة من اخواتي..عندي ثلاث اخوات متزوجات..وكلهم قالوا نفس الكلاااام..
وكلهم قالوا احسن شي لاتشترين الا فستان واحد والباقي اشتريه مع زوجك ..اذا رحتوا اسوااق وكذا..لأن عيونك تصير مفتحه اكثر..
وكله على حسب الزووووج ..كثير بنات اعرفهم..شرت لها درزن فساتين..ويوم تزوجت..مالبست الا واحد..
ياعزيزتي..ترا مب لاازم تخلصين المهر..
نصيحة من محبة..
خلي عندك جزء من المهر..لك وللزمن..عالأقل خلي خمس آلاف منه..مب تصيرين طايرة فالعجة وبس..
لاحسة مخك هالفلووس..لا ياعزيزتي..
صدقيني بتستفيدين كثييير من هالجزء الي خليتيه..بس لاتعلمين زوجك عاد..يطمع فيها..!
الزبدة..عزيزتي المتملكة..لاتخلصين مهرك..على أشياء بتكتشفين انها قرااابيع مصيرها الزبالة بعد الزواج..
وحده من خواتي..لعبوا عليها بعض الناس وهي تتقضى الجهاز..وقالوا لها فيه زبدة رحتها حلوه تحطينها على جسمك كله..وبينبسط زوجك <<هع
المهم..هي راحت وشرت منها ثلاث الظاهر..والله اني نسيت..
وكل وحده بثلاثميه الظاهر..من نكتار بعد..
تقول بعد الزواج..قال زوجها لعد اشوفها يرحم والديك..تحووم كبدي..
ووش صار مصيرها؟؟؟ الزباالة تكرمون..فـهي الله يجزاها خير تنصحني وتقول لاتاخذين خرااابيط..
وبسـ..
<<هذرة بلا حدود
تحيااااااااااااااااااااااااااااااااااااااااااااااااااااتي
عزوبيـــهـ~
21/8/1430هـ
( تنبيــــــــــــــــــــهـ: الموضوع قابل للزيادة..اللي حابه تزيد أي إضافات..احنا حابين نستفيد من ذوي الخبرة)
ســـامريهـ~ @samryh_1
عضوة جديدة
يلزم عليك تسجيل الدخول أولًا لكتابة تعليق.
الصفحة الأخيرة
عليك بالدعاء في آخر الليل..فإنه ينزل الرب إلى السماء الدنيا في الثلث الأخير منا الليل
فيقول هل من مستغفر فأغفر له؟ هل من داع فأستجيب له؟؟
وإن شاء الله تبشرينا العطله هذي..
الله يوفقنا وإياك ياقمر..
ولاتنسـين..فإن مع العسر يسرا..إن مع العسر يسرا..وهذا كلام رب العالمين..
تحيااااتي لك..