نصايح عالسريع

السلام عليكم و رحمة الله وبركاته

خواتي الغاليات ... و الله اني اعنيها انكم خوات لي و من كثر ما اقرا بذ القسم مشاكلكم تمنيت اني اقدر اساعدكم لكن بهديكم ذا الكلمات

* .. في البداية ما اقول ان عندي خبره بانواع الرجال و الحل لكل نوع و كل مشكله لكن عسى الله يهديني لما فيه خير و صالح للجميع

..*.. لا تعتقدين ان فيه رجال كامل حتى لو تشوفين رجال فلانه كامل من وجهة نظرش ماتدرين عن خفايا البيوت

..*.. طبقي نظرية " طنش تعش تنتعش"

..*.. تعودي تسامحين و تنسين

..*.. اضحكي للدنيا تضحك لش

..*.. مابين الزوج و زوجته مقولة"كرامتي ما تسمح لي" و هذي سمعتها من اخصائيه اجتماعيه شاطره في ذا الامور تقول خلي كرامتش عند الباب بمعنى انتي و زوجش واحد

..*.. لا تقعدين له على كل كلمه سواء سب ولا شتم ...الخ و حتى لو مد يده في يوم من الايام مره وحده تفوت ولا حد يموت

..*.. دوري له الاعذار في تصرفاته

..*..ادعي له و لحياتكم الزوجيه

..*.. اسمعيه عدل و اعرفي وش يبي بالحياة لان كثير من النساء ما تعرف تسمع وش يقول لاتها لاهيه بتجهيز رد عليه

..*.. عيشي بقناعه داخليه لو مزيفه ان انتي زوجة سعيده و زوجش رجل مثالي تحبينه و تموتين عليه و راح تصدقين ذا الاحساس و بينعكس عليش و من ثم عليه ان شاء الله

..*.. اما الزوج الصايع الضايع الي ما يخاف الله و لا له كبير و لا يحده حد و لا يرده احد ... للاسف ماعندي له حل الا الصبر في الدنيا و لش الجنة في الاخره باذن الله ورحمته

ولو ان امر الازواج سهل ما كان بطاعتهم و رضاهم ندخل الجنه ...لكن يوم ان رضاهم و طاعتهم صعبه علينا عوضنا الله بالجنه على ذا الجهود الصعبه الي نبذلها لحياة اسرية سعيده

عسى الله يسخر لكم ازواجكم و اتمنى اني افدتكم ...اختكم ام عبدالله