نصايح وفضايح

نصايح و فضايح :32: نصايح وفضايح ,,مقال مهبول (منقول)
*- أهـم قاعدة أساسية في إستمرار العلاقة الزوجية هي الإحترام المتبادل .. يعني شئ إسمه مكابرة و عنطزه هذا تنسونه طالما ناوين تكملون حياتكم مع بعض .. و الا خذوها من قاصرها و تطلقوا قبل ما تبلشون بعيال مساكين كل ذنبهم إن أهلهم مغرورين (والله البداية المطمئنة أنا بعد)

*- لـكـا
موب تقعد تتفشخر عليها بشهاداتك و علمك مثل ذاك الدكتور اللي طلق حرمته علشانها ما تعرف نظرية فيثاغورس قايلينه هالرياضيات ما نرجي من وراها خير أصلاً

*- لـكـي
صحيح إن الرجال ما أخذك حبـّا فيك و إنه أخذك حبّـاً في وظيفتك بس موب معنى هذا إنك تقعدين تعايرينه بشهادة الكفاءة اللي معه و على طاري المعاير بأستشهد لك بقصة "ميب" حقيقية و صدقيني "ما" صارت لناس "ما" أعرفهم يقول لك وحدة تزوجت واحد تعرفت عليه من الإنترنت كل ما تهاوشت مع رجلها قالت له : إيه قل إنك غاير مني ليش إن رتبتي "عضو بروفيشينال إنترناشونال" و المنتديات كلهم يدورون علي و إنت توك "عضو مايدري وين الله حاطه فيه" و لا حد يعطيك وجه

*-لـكـا
إذا زوجتك مدرسة إعرف متى يكون عندها حصة فراغ خل عندك ذوق إتصل عليها حسسها إنها على بالك و قل لها انك متصل علشانك مشتاق لها (بس لا تكثر بربسة ترى الغرفة مليانة مدرسات) و بآخر المكالمة قل لها تحاول تعتذر عن باقي الدوام و ترجع البيت تطبخ لأنك الحقيقة عازم زميلك على الغداء

*-لـكـي
لا تعودينه إنك تدقين عليه على طول بسبب و بدون سبب بإسلوب إشتقت لخشتك وينك تأخرت و خلافه لأنه بالشكل هذا ماراح يقدّر إتصالاتك حق قدرها و لا يهتم بالمكالمات و يصير يطنش و تخيّـلي عاد يطنش يرد وإنتي ذيك الحزه (مشتـَـطـّـة) و عندك سالفة ضرورية مثل "نسيت أقول لك ترى الخبز قاضي"
و دائماً..دااااااااائماً ....لو إتصلتي على رجلك وحصل و تهاوشتوا ... لا يجي في بالك إنه سكر السماعة بوجهك إفترضي إن الخط إنقطع بسبب الشبكة التعبانة خليك إنتي العاقلة برضو

*-لـكـا
لا عمرك تدلع مرتك قدام أمك ترى الأمهات حساسات من هالناحية (مع إنه معروف هالدلع شهر العسل و غيره تقشير بصل)...بس موب تروح تصب لمرتك شوربة و تلقـّمها السمبوسة ما بقى إلا تاكل عنها بعد و أمك حلوة اللبن قاعده تتفرج على حشاشة جوفها و هو يأكل مرته اللي توه يعرفها و أمه اللي طول عمرها تدلعه حتى الحبحر ما مدّه لها !!‍‍‍
و لا تكثر سواليف عن خواتك قدام مرتك خصوصاً أيام الملكة لأن بعض البنات و يمكن تكون زوجتك منهم تفكيرهم هالكبر (.) تبي تحقد على أخواتك قبل لا تشوفهم من كثر ما تسولف عنهم ... أعرف وحدة خطبها واحد متعلق بإخته ب و أبلشها ذا الآدمي أيام الملكة كل سواليفه إختي فعلت وإختي سوّت اللي يسمعه يقول بتتزوج إخته يوم إنه يسولف لها عنها .. عاد بعد الزواج بثلاث شهور بغى يناديها قام نادى إسم إخته البنت سوّتها مشكلة و ما رضت إلييييين ما وداها للعثيم ...(<--بس سالفة العثيم اللي نصبة لو تبون الصراحة )

*-لـكـي
إنتبهي تقارنين نفسك بخوات زوجك أو تعلقين عليهم قدامه لأن هذا التصرف بيحسس زوجك أنك تغارين منهم مع إني دارية إن هذا اللي حاصل في الواقع بس ترى مافيها شئ لو زوجك ضحك مع خواته تراهم خواته قبل لا تصيرين زوجته و المفروض غلاهم من غلاه يالدبشة (<-- متفاعله بقوة )

(فاصل إستهبالي)
يافرحنا الليلة بالعيييد ... فرررحة فرررحة .. العمر كلـّو إنشالله عيييد ...فررررحااااه (<--أهديها لنفسي بمناسبة عيد ميلادي )
(إنتهى الفاصل )

*-لـكـا
أدري إن طلعة السوق أكره ما عندك بس لا تنسى إن طلعاتكم السوق تتناسب تناسباً طردياً مع تكشخها لك و إذا تبيها كل يوم شكل و لون كل شي بحقه ولو

*-لـكـي
إعرفي متى تقولين لزوجك عن أي مشروع طلعة موب إذا جاك من الدوام يبي يرتاح إستلمتيه إمش نبي نطلع ... أنتي جمعي مشاويرك كلها و إذا شفتيه مرتكز في الصالة يتابع مباراة فريقه ولنفترض إنه نصراوي ، إلبسي بنطلون جينز أزرق و تي شيرت أصفر (تنازلي عن تعصبك الهلالي في سبيل المشاوير ) و شجعي معه و إذا فاز (مع إني ماهقيته) باركي له بالفوز و قولي له يوديك لمشاوريك بهالمناسبة

*-لـكـا
إذا كنت إنسان طموح و عندك نية تكمل دراستك برا... لا تقعد تتفلسف و تقول أبدرس و أتزوج بعد ماأخلص حرام أمرمط البنت معي في الغربة ...من قال لك إنها مرمطة هالحين على كيفك خليتها مرمطة أصلاً البنت وافقت عليك مخصوص حتى تدرس معك موب علشان سواد عيونك يكون في علمك (<-- من جد قاهرني )

*- لـكـي
ترى أهلك ما زوّجوك حتى تسكنين عندهم !! خفـّي عليهم شوي إحمدي ربك إنك ساكنه في نفس الديره غيرك بنات متغربين مع أزواجهم ما يشوفون أهلهم إلا بالسنة و السنتين مرة (عيني عليهم باردة) و بعدين موب لازم كل ماراح لأهله رحتي معه محرم مثل ماأنتي تروحين لأهلك لحالك .. أحياناً هو بعد لازم يروح لأهله لحاله .. خليه يوسع صدره مع إخوانه لايقولون حرمته حرمته (حطوا الحركات أنتم عاد موب كلش عليّ) من إخوانه و أنتي بذكائك إستغلي فرصة زيارته لأهله و دقيـّها سواليف على التلفون و خذيها نصيحة إذا صار عندك لا تطولين قرق في التلفون حتى مايستغل هالشي لصالحه بعدين تكثر طلعاته و سهراته وإذا قلتي له وراك تطلع و تخليني بيقول وش أسوي إنتي إللي تتركيني و تسولفين مع صديقاتك بالساعات

*-لـكـا
ماراح تنكسر يدك أو تقلل من هيبتك(من زين هالهيبة الله وأكبر ياإكـّة الشيريا) لو إنك ساعدت حرمك المصون في تسبيع المواعين و ضف الخلاقين للغسيل زي ماإنتم شريكين في الحياة و شريكين في البيت فمن باب أفق (ما لقينا حجز في الأولى) المفروض شغل البيت تتشاركون فيه بعد إيه وش فيها ؟؟

*-لـكـي
لا تصدقين المسلسلات إذا جابوا لك ممثلة تضيـّق على رجلها و ما تخلي معه ولا قرش حتى ما يعرس عليها ترى كل ذي خرابيط × خرابيط ... الرجال إذا بغى يعرس أعرس و لا شاور ياوخيتي و ترى الشرع محلل له أربع أنتي أهم شي لا تقصرين معه ولا مع أهله حتى ما يلقى له حجة يلومك فيها و الشكوى على الله

*- لـكـا
إذا صنفت في راسك و لزمت بتعرس على مرتك و لابد..... حط في بالك زوجتك الثانية لازم تكون أقصر من الأولى حتى تخفف من وقع الصدمة عليها
و إذا بغيت تستقدم زوجة من برا البلد إحرص إنك تاخذها بنت نعمة متعودة على الخير و عط أهلك خبر بالموضوع موب تسافر بالأسبوعين والثلاث بحجة العمل و إنت في واقع الأمر تشوف مرتك اللي ماخذها من سنة ممن هب و دب و فجأه تروح تطق على أمك على غفلة و معك مرتك الثانية و إنت مخطط تسكـّنها في الدور الثاني و من ثاني يوم (يجهشون) ربعها و اللي من طينتها ذا المشافيح يزورونها و يصافقون بالبيبان و يدابكون على أمك هالضعـّيفة بلاهم ماقد شافوا دور كامل في حياتهم حدّهم حمـّام و أوضه فوء السطوح يالله لك الحمد و الشكر هذاني قلت لك

و الله يسعد كل زوجة برجلها و يهني كل متملكة بمملوكها
ترى المقال منقول لا يبلشنا راعيه



:32: :31: :31: