http://forum.hawaaworld.com/showthread.php?t=1304742
السلام عليكم ورحمة الله وبركاته
بس على طريقة أمي الله يرحمها ، وهي من اختراعها ، ههههههههههه وعاد كنا مسمين الطبخه اسم غريب ، كنانسميها نص ... نص ....... يعني نصف ونصف بالفصحى ، اول ماطلعت اغنية نانسي نص ونص نص فطسنا ضحك . جايتكم بالحكي عن سبب التسميه .
من الطبخه ذي عرفت وش يعني ( الحاجه أم الاختراع ) .........
هذا ياطويلات العمر منذ ازل يوم كانت امي بعمري وبعدها في بدايات مشوارها الفني ، فيه جماعه لزقه من معارف ابوي أصروا إلا وإلا يذوقون طبخ زوجته اللي هي ( أمي ) عاد ابوي جاب ذبيحه ودخل البيت يعلوه الاحراج والخوف ... ( يخاف امي تبهذله ) .
طبعا امي توهقت ماعندها قدر كبير يكفي القوم اللي جايينها ، فطرأت ببالها فكره جهنميه ، طبخت بقدرين ، بس مو هنا السر ، طبخت بقدر رز شكل والقدر الثاني رز بشكل ولون وطعم غير .
الطبخه بسيطه وسهله وخفيفه ، ويمكن اكثر الحريم اللي انزنقوا بعزايم كبيره يعرفونها .
وجد يابنات ماكذب عليكم ولا امدح في طبخ العيله ، الطبخه صدق انها سهله ، لكن طعمها خيالي ، وكل من ذاقها تجنن ، ودائما اللي يذوقه يقول وش سر رزكم كأنه فيه سكر من حلاته .
المهم نبدأ في المقادير :
لحم ( استخدمت ربع الذبيحه ) . شخصيا أفضل اللحم الصغير بس يكون سمين<== حشى عريس . يعني هرفي او تيس صغيرون حليل نفس اللحم اللي يصلحون فيه المندي
3 كاسات رز . ودائما أفضل الرز البسمتي ابو شماغ مافي احلى منه حبته طويله للغايه . وطعمه فضيع وتحسينه خفيف عالمعده . قبل كنت استخدم المهيدب بس حسيته خرب مو مثل أول .
ثلاث بصلات متوسطة الحجم .
خمس فصوص ثوم .
قليل من الهيل المطحون.
ملح و بهارات مشكله ( كمون ، قرفه ، قرنفل ، فلفل أسود ، كزبره دائما اخلط كمي كبيره واحتفظ فيها )
صلصة طماطم تقريبا استخدمت ثلثها يعني ملعقتين كبار .
زبيب حسب الذوق ، تقريبا ربع الكوب .
الطريقه :
نسلق اللحم .
أول مايغلي اللحم ضروري تشيلون الزفره . شوفوا شلون شكلها مقرف .
بعد ماتشيلون الزفره ، قطعي بصله الى ارباع، ودقي ثوم واحب اضيف للثوم ربع ملعقة هيل مطحون . واضيفيهم اللحم ولاتنسين الملح ، ولو حابه تضيفين عرق ثوم كامل بقشوره يطلع فضيع مع المرق وينوكل لحاله .
شخصيا ماحب البهارات الكثير واكره البهار اللي له نكهه قويه . فدائما اضيف ملعقه طعام بهارات مشكله ، وإذا كانت نوعية اللحم جيده ماتحتاجين لبهارات كثير .
افضل اني احطه بقدر الضغط اسرع وأسهل . لين ينضج تماما تقريبا ياخذ نصف ساعه .
الحين شيلي اللحم من المرق ورصيه بصينيه .
ورشي عليه فلفل أسود مطحون وشوية ملح .
نجي للرز ، وهنا يكمن السر .
طبعا انقعي الرز قبل بربع ساعه او مثل ماتحبين ، الرز اللي استخدمه خفيف شوي وحساس ورومنسي خخخخخخخ أقصد يبيله مداراه لانه يتكسر بسرعه.
قطعي البصل لشرحات رفيعه مره ، وارجعي اقطعيها بالنص ولو حابه تقطعينها صغير مافي مانع ( وحلو يكون البصل كثير واستخدمت بصلتين متوسطيتين )
جيبي قدرين واقسمي كمية البصل واحد بتصلحين فيه رز أبيض ، والثاني رز أحمر . بس انا احب احمس البصل وبعد النضج اقسم . <== شكلي لخبطكم .
بالنسبه للكميه إذا حابه تصلحين نص احمر ونص ابيض حلو عشان يطلع نص نص ، بس انا احبه ثلثين ابيض وثلث أحمر .
طبعا لاتكثرين زيت الافضل مايكون كثير لانا بنستخدم المرق والمرق مدهن .
أهم نقطه مؤثره في النكهه خلي البصل ينضج على نار هاديه ، عشان يعطي حلاوه للأكل بس خلوه ذهبي فاتح مو أسود ، وتعرفون كل ماتكرمل البصل كل ماكان طعمه مثل السكر . تصدقون ساعات ينضج اللحم بقدر الضغط والبصل بعده يستوي على رواق .
يتبع
الحين اضيفي الثوم تقريبا ثلاث فصوص ثوم اقسمييهم بين القدرين . واضيفي شوية هيل مطحون وحلو يكون الثوم طازج .
الحين بقدر اضيفي مرق اللحم ، تقريبا كوبين لكل كوب رز ، واضيفي اعواد قرفه وقرنفل .
بعد مايغلي المرق اضيفي الرز وذوقي الملح هل يبيله إضافه أو لا .
اول مايغلي الرز هدي النار وخليه ينضج . وإذا قارب عالإستواء حطي
غطاء تحت القدر .
واغسلي الزبيب ورشيه فوق الرز ، وايضا ممكن تضيفين ألوان الطعام انا اضفت بودرة لون الزعفران وطريقتي يمكن تختلف عنكم اغمس سكينه باللون ورجع اغرزها بالرز .
نجي للقدر الثاني .
بعد ماتحطين الثوم اضيفي صلصة الطماطم .
والمرق وخليه يغلي .وبعده اضيفي القرفه والمسمار الكامل .
اضيفي الرز ، واول مايغلي هدي النار .
على فكره انا ماحب اول ماطفي الرز خلاص احطه بصحون لا ، لازم يركد الرز بالقدر ، وفيه علامه اعرف فيها ان الرز خلاص يقول كلوني لوووووووووووووول ، تصير الحبه معكوفه شوي ، وتحسينها نحيفه وأطول ، وايضا تحسينها طالعه لفوق خخخخخخخ ماعرفت اشرحها بس اللي مزاجي بالاكل اكيد يعرف شلون يكون شكلها .
الحين نجي للحم ، بعد ماخلصنا .
ندخله الفرن شوي مجرد يسخن ويتحمر وجهه . مو تنشفينه بس شوي شغلي عليه النار بالشوايه ( الغريل) . يعني نار الفرن من فوق والفرن يكون دافي .
إذا جيتوا تحطون الطبخه ، شيلي شوي رز احمر وبعدها ابيض وشوي احمر وبعدين ابيض ، عشان يطلع كنه مخلوط سوى ، فهمتوا علي .
هاه حبيباتي اش رايكم في اللطشه:)
وبالعافيه عليكم ..