كما هو ملاحظ في هذا القسم ..
ان الاخوات البكريات لما يدخلن التاسع كل وحدة تنزل موضوع وتسأل المجربات وتستفسر عن حالتها واذا كان الوقت مناسب تروح المستشفى او لا.. وشو المفروض تاكل او تشرب..
وطبعا البنات مومقصرات وبنية طيبة كل وحدة تدخل وتنصحها بشي الي تقولها شربي خروع والي تقولها لا تشربي والي تقولها روحي المستشفى والي تقولها لا تروحي وكل وحدة تبذل مجهودها عشان تساعد.. ومتناسين انه احنا الحريم نختلف في طبيعة اجسامنا وحالاتنا و كل وحدة دورتها وحملها تختلف عن الثانية حتى اعراض الولادات تختلف.. واشكال واعراض الطلق عند كل وحدة غيرعن الثانية..
يعني في بنات فتح معاهم الرحم بسرعة لما شربوا القرفة وفي بنات تسكر عندهم الرحم بسبب القرفة.. حتى كف مريم الي الكل يمدحوا ما يجيب نفس النيجة مع الكل..
الي ابغى اقوله انه احنا يا بنات من خوفنا على بعض نحاول نساعد بعض قدر الامكان بدون ان نفهم الحالة.. مع انه احنا مش دكاترة..
والله يا بنات قلبي يعورني لما وحدة تنزل موضوع وتقول انها في التاسع او داخلة العاشر وعندها نزيف او افرازات او ماي وتردوا عليها تقولولها لا تستعجلي وتروحي المستشفى... على اي اساس ما تروح المستشفى هل انتي عارفة بصحتها وطبيعة حملها.. هل تتحملي مسؤلية نصيحتك لا سمح الله لو صار شي معها..
والله يا بنات انا في حملي الاول ما كنت عارفة شي وكله اسال صديقاتي بالدوام لان كل وحدة عندها 3 عيال ويشتغلن ممرضات بالمستشفى ولما كنت في اواخر التاسع ونزل مني شوية ماي وافرازات ومافيني طلق نصحوني ما استعجل وما اروح المستشفى واخذت بكلامهم لانهم مجربات وفاهمين وفي النهاية شو كسبت غير اني عذبت ولدي وخسرته للابد.. وطاح اللوم كله علي..
وبعد ازيدكم لما جات وحدة من صديقاتي تعزيني تقول لي في الحمل الثاني لا تتاخري تروحي المستشفى وتأذي ولدك مثل ما اذيتي هذا الولد.. تخيلو.. نسيت انها كانت جالسة على راسي عشان ماروح المستشفى... كذا الوحدة تتحمل مسؤلية نصيحتها؟ والله مع اني عارفة انهم اشكثر يحبوني ويخافوا علي بس شوفوا نصيحتهم وين ودتني..؟
ولما سألت الشيخ عندنا اذا كان علي كفارة على موت ولدي قال لي اذا أكد الاطباء ان الحالة كانت بسبب تأخري.. فلأني بكرية فالكفارة تجب عالحرمة الي نصحتني ما اروح المستشفى لانها مو طبيبة عشان تطبطب حالتي..
فهل انتو قادرين تاخذوا بهذا الذنب على رقبتكم؟
صحيح ان كل شي مكتوب وهذا قضاء وقدر لكن الوحدة تاخذ بالاسباب...
ونا اسفة اذا كنت ما قدرت اوصل النصيحة بأسلوب سليم وطبعا كلامي هذا ما اعممه عالكل.. ولو ما كنت اعتبركم زي اخوتي ما كنت فكرت انزل هالموضوع... ونا ما بقولكم لا تنصحوا البنات بنصايح طيبة وتريح البال لكن كل وحدة توزن نصيحتها قبل ان تنصحها لغيرها...
والله يحفظكم ويخلينا لبعض..
آلاان @alaan
عضوة نشيطة
يلزم عليك تسجيل الدخول أولًا لكتابة تعليق.
كلامك عين الصح
الله يعطيك العافيه والله يعوضك خير مما فقدتي والحمدلله كل شيئ بأجره حبيبتي
الله يعطيك العافيه والله يعوضك خير مما فقدتي والحمدلله كل شيئ بأجره حبيبتي
الصفحة الأخيرة
عوضك الله خيرا في القريب العاجل ان شاء الله