نصيحة منكم تفيدني

بداية ..مرحبا بكم جميعا اخواتي..
من فترة مو قصيرة يا بنات انا متابعة للمشاكل اللي تنعرض هون وعاجبتني ردودكم على اختلافها..
واليوم حابة استفيد منكم في بعض الامور اللي تنغص علي حياتي..

اول شي يا بنات علاقتي بزوجي الحمد لله كويسة ..وما اشكي من اي قصور من ناحيته اللهم انه احيانا
بعض التصرفات من اهله اتخليني انفجر واحط حرتي فيه..احيانا مو دائما ..

انا من اول خطوبتي له وانا شفت ان اهله من النوع التقليدي القديم..اللي البنت لما تدخل بيتهم خلاص لازم
تمشي على هم ما يمشون عليه في كل شي.. لذلك انا التزمت بالرسمية نوعا ما.. مع الحفاظ على علاقتي بهم والتواصل المستمر..

من ضمن المنغصات هو موضوع السفر.. ان زوجي ما يحرك رجله من بلده سواء بي او من دوني الا اول يسأل امه اذا كانت بتروح معاه وطبعا اكيد راح تطلب رفقة بناتها كمان والا بتزعل عليه لفترة مو هينة..
مع العلم انه ما قصر معاها وداها 3 مرات الحج الى جانب سفرات اخرى..

طبعا بعد ما اتزوجني انا اصريت انه اول سنة يودي امه عشان بعدين يسافر معاي لحالي وناخذ راحتنا..
وداها وانبسطت وجا دوري.. ومن يومها وهي علاقتها معاي زي مرت الرجل الثانية..

وجربت قريب اني اسافر معاهم يا بنات ما ارتحت..مجرد اني اطلب من زوجي يساعدني في طفلي ..يدخلوا وما يعجبهم ..يبون مسئوليته كلها علي وهو يتفرغ لهم ..ولا شفت منهم اي مساعدة بالمرة ..هذا غير ان هم يروحوا للاسواق وبس اجي بطلع ويا زوجي اي مكان ..ارجع الاقيهم زعلانين علي...

الامر الثاني اللي ينكد علي ..اخو زوجي تزوج بعدنا بكم شهر..وزوجته من النوع اللي يعجبهم تماما ..يعني ايش يطلبوا تنفذه وتحب تجاملهم اكثر من اللازم..
طبعا هي بكيفها وراحتها وانا ما احب اتدخل في حياة غيري..بس اللي قاهرني حركات اخوات زوجي ..يتعمدوا وقت اللي نكون مع بعض مجتمعين يمدحوا فيها بشكل مبالغ فيه.. يعني عشان يغيضوني..
وانا مهما اترفعت عن هالامور وحركات الحريم اظل انسانة وهذا ياثر فيني وحتى على علاقتي بزوجة حماي ..اللي من البداية انا ما بغيتها تتاثر..
وحتى هي صارت شايفة نفسها علي وما تعطيني وجه ..وتتعمد اذا اتكلم تتجاهلني ..

وهذا كل شي يا ريت تفيدوني بارائكم كيف تتصرفوا لو كنتوا مكاني..