نصيحة مهمة للحوامل البكريات في أشهرهن الأخيرة

السلام عليكم يا حلوين

الله يقومك بالسلامة يارب أنتو وكتاكيتكم :)

نصيحتي بخصوص الرضاعة الطبيعية..بنات..بصراحة..الموضوع مش سهل ولكن مهم وكله أجر..أولها متعبة صحيح بسبب تعب الجسم من بعد الولادة و النعس والارهاق الشديدان وكمان الرضاعة الطبيعية رح تكون كل ساعتين او ساعة ونص وهادا طبيعي جداااااا..اوعي حد يحكيلك ابنك ما بيشبع عشان هيك كل ساعة بدو يرضع..لاء!!! هدول الناس بكونو اعطوا اولادهم حليب صناعي واللي متل الخروف تقيل عالمعدة و بيطول في الهضم عشان هيك اولادهم بينامو 3 ل 4 ساعات..اما في حالة الرضاعة الطبيعية الحليب بكون سهل الهضم فالطفل بجوع اسرع واصلا احسن انو يرضع كتير عشان حليبك يزيد و يستقر اول شهر على حسب احتياج الطفل...

انا اهلي ساندوني الحمدلله في الرضاعة الطبيعية كتييير خصوصا اول شهر و كانت تجيني ايام اقول هلا جيبولي علبة حليب صناعي مش قادرة بدي اناام وارتاح وهم يهدوا علي و يشيلو عني الصغيرة عشان اناملي ساعة او ساعتين واصحصحلي شوي...كلو طبيعي..رضعي هلا عشان مناعة طفلك تزيد وعضمه يقوى والأهم جهازه الهضمي ما يتعب..

نصيحتي التانية ما تسمعي كلام حد لو حكولك بنتك او ابنك حجمه صغير وزنه صغير معناتو ما بيرضع منيح لازم تدخليله اكل او حليب صناعي..غلط!! خلي جدول الوزن هو دليلك..بنتي الحمدلله 3 شهور و وزنها 6 كيلو الآن ولكن مش باين فيها و تعالوا اسمعوا التعليقات من اهل زوجي ومن امي حتى!! بحكولي حليبي خفيف!!! كلام فاضي!! لولا اني قارئة كويس وشايفة انه البنت بتنام كويس و لما تصحى بتلعب وبتكون نشيطة مش منكدة وفوق هادا بتابع زيادة الوزن كان انا من زمان رضخت لكل هالانتقادات واعطيتها الصناعي..ترا الصناعي بينفخ البيبي من احتباس الماء..احنا الكبار بينفخنا فما بالكم بالصغار..اللي خلاني اكتب هالموضوع هو انه اليوم وزنتها والحمدلله اتطمنت عليها ومع ذلك امي و حماتي مش مقتنعين انها بتشبع! هههههه فا حبيت اكون عون الكم عشان حرام يضيع اهم غذاء للطفل بس عشان كلام فاضي من الناس!

كل التوفيق يارب وياااارب تاخدوا بكلامي واكون افدت لو وحدة في هالمنتدى