نصيحة نصحتها لزميلتي قبل سنتين .. فجأة ارجعتلي !!!!

السلام عليكم


أنا صارلي فترة طويلة عند أهلي بسبب مشاكل مع زوجي وربي يشهد إني بذلت كل ما في وسعي لإصلاحها بس ربي ما كتب وأملي بالله سبحانه وتعالى كبير
الحين ساكنة من أمي وأبوي الكبار بالسن وعيالي معاي ونفسيتي أحيانا تكون بالنازل وتمر علي أيام ما أنام إلا ودموعي تارسة مخدتي وأقول ياربي ليش أنا بهالوضع ؟ إن كان اختبار فأنا صابرة وما عندي غير الصبر حتى لو بتطلق منه ما راح يتغير شي بظل عند أهلي ونفس الحالة .. بالعكس يمكن أخسر قيامه بمتطلبات العيال ومشاويرهم

يمكن يكون إبتلاء وتكفير ذنوب وأنا الحمدلله راضية بكتبة ربي

المهم .. أنا علاقتي بوالديني فيها نوع من الميانة بحكم إنهم ربونا كأصدقاء أكثر من علاقة الأب والأم الرسمية اللي فيها الإحترام الزايد والتوقير
وكنت دايما أتضايق من نفسي لما أعصب عليهم أو لما أضحك بدون تقدير لمشاعرهم وهم عمرهم ما بينولنا إن هذا الشي غلط بالعكس عادي الموضوع لكن لما صرت أم وعندي عيال أربيهم بديت أحس إن العلاقة اللي تربيت عليها مو صحيحة وصرت حيل أركز على مبدأ الإحترام لي ولأبوهم والميانة الزايدة مرفوضة
قبل كم يوم كنت قاعدة أفكر بحالي وتذكرت زميلاتي بالشغل وأتساءل عن أحوالهم وأقول بقلبي فلانة يا ترى تزوجت مثل ما كانت تتمنى ولا بعدها ؟ وفلانة هذي زميلة كبيرة بالعمر تقريبا بمنتصف الخمسينات وغير متزوجة وكانت دايما تتأفف من أمها وأبوها المسنين لأن على كبر عمرها ما زالوا يعاملونها كطفلة بالإضافة لمسؤولياتهم اللي تتحملها مضطرة كونها الوحيدة اللي عايشه عندهم ومحد يراعيهم غيرها

فجأة تذكرت نصيحتي لها : مرة قلتلها يا فلانة لا تزعلين على حالج يمكن ربي ما خلاج تتزوجين عشان تقعدين مع أمج وأبوج بكبرهم وتبرينهم وتقومين فيهم ويكونون سبب لدخولج الجنة .. ربي له حكمة بوجودج معاهم لحد هالعمر

يا بنات حسيت قلبي يرجف

حسيت إن هذا هو الجواب

معاملتي لأمي وأبوي طول عمري ما كانت حلوة .. صحيح ما كانت سيئة بس ما فيها الاحترام المطلوب
الميانة الزايدة والغشمرة البايخة ووقت العصبية لا تشوفوني ألطش بالكلام !!

ربي رجعني لهم بعد ما كبرت وصرت أم والله أعلم كفرصة ثانية أكفر فيها عن معاملتي لهم .. يمكن هذا هو السبب ويمكن فيه أسباب ثانية بس لما تذكرت نصيحتي لزميلتي فعلا في شي داخلي تحرك وقالي هذي النصيحة لج إنتي

بعد هالموقف انزلت مشاكلي مع زوجي للمرتبة الثانية وصار بر والديني وتعويض ما فات هو الأهم ..

وعندي يقين إن مفتاح البر هو اللي بيفتح علي باب السعادة بحياتي بشكل عام ومع زوجي بشكل خاص


الله يرزقني وإياكم بر الوالدين والله إنه كنز البعض غافل عنه وأنا كنت منهم