طيب بسم الله
بصوا يا أجمل أمهات
اطفالنا مش مطلوب منهم يعدوا هاديين في البيت وميعملوش دوشة
مش مطلوب منهم يقولوا نعم وحاضر ويوافقوا على كل كلامك وطلباتك بهدوء بدون مناقشة سواء طفل كبير او صغير
لو كده هتربي طفل معندوش شخصية أصلا وشخص تابع سهل يتبع أي حد يقوله اي كلام بدون ما يفهم وبدون ما يحاول يتناقش أصلا
اومال يعني مفروض نعمل إيه؟
ايوا بالظبط كده احنا اللي ماسكين عصاية التربية
❤️يا أمهات خاصة اللي لسه أطفالهم صغيرين سنه سنتين 3
الطفل بياخد نفس ردود أفعالك اقسم بالله
لو ركزتي بجدية معاه هتلاقي نسخة طبق الأصل من ردود افعالك واسلوب كلامك كمان
❤️مرحلة المراهقة نتاج لمرحلة الطفولة يعني لو مرحلة الطفولة غرستي فيها كويس أن شاء الله تمر مرحلة المراهقة بكل اللي فيها بسلام ان شاء الله

مفروض نعمل ايه طيب ؟؟
نشتغل إحنا على نفسنا
نشوف مواطن التقصير فين ونعالجها
اغلب مشكلة العصبية
مفكرتيش مرة تشوفي يوميا فيديوهات عن العصبية في التربية؟
ابني عنيد
مفكرتيش تسمعي عن عند الأطفال تشوفي حله عمليا تقدري تعملي إيه؟
اي مشكلة مع اطفالك ليه مفكرتيش تشوفي حلها من يوتيوب من متخصصين في التربية؟

مفيش يا جماعة عصاية سحرية هتغير اسلوبنا في التربية وهتخليها عملية لطيفة مفيش فيها ارهاق وتعب وضغط

التحدي ده مش عصاية سحرية هتخرجي تلاقي نفسك باردة وهادية مع ولادك ولا حاجة

مفيش عصاية سحرية
في بذل وقت وجهد للتعلم إزاي أربي أطفالي ويطلعوا اسوياء في جميع الجوانب
ازاي يبقى اطفالي مشروعي للآخرة

يا جماعة كلكم راع وكلكم مسؤول عن رعيته والمرأة راعية في بيت زوجها ومسؤولة عن رعيتها
فأنت مسؤلة أمام الله عن تربيتك لاطفالك دي وهتحاسبي عليهم وعلى معاملتك ليهم كمان

طفلك اللي طول الوقت توجيه ونقد توجيه ونقد وزعيق وكلام سلبي منتظرة منه يبقى عامل إزاي؟؟؟
وانت مش بتحاولي تقوّمي نفسك معاه
ولا حاسبه حساب لمشاعره ومرحلته العمرية اللي هو فيها

لازم تتعلمي وتعرفي سمات المرحلة العمرية اللي ابنك فيها وخصائصها عشان تعرفي تتعاملي معاه صح وتفهمي مشاعره


لازم تفصلي بين الضغط اللي حاسه بيه وبين تعاملك مع اطفالك هما ملهمش اي ذنب في ضغطك
يعني هما عشان اطفال وميقدروش يردوا عليك ويحاسبوك تطلعي ضغطك وقرفك عليهم؟
عارفه إنه صعب
لكن بالتدريب والصدق والاستعانة بالله صدقيني هتتغيري
إن صدقت العزم لوجدت السبيل


ينفع انا او انت او اي حد كده فجأة يقولك هعمل طربيزة؟ هعمل انتريه؟
لا ليه؟ احنا مش نجارين ومش عندنا مهارة صناعة اشياء بالخشب
بنعمل ايه؟ بنتعلم الصنعة الأول عشان نبقى ماهرين فيها ونتعلم نصنع بيها اشياء جميلة

ليه بقى مع ولادنا عايزين نربي كده وخلاص بالحب زي ما تيجي تيجي عايزين نربي بعشوائية ومفيش استعداد اصلا لبذل الوقت والجهد وفاكرين إنه فيه عصاية سحرية هتغيرنا ؟؟


كم مرة كلامك حسس ابنك انه مصدر ضيق وهم ليك وضغط وقرف؟
وكم مرة كلامك حسس ابنك إنه نعمة بجد من ربنا ليكم وإنه مصدر فرح وسعادة ليك؟

مش ده اللي كنت منتظراه؟ إنك ترزقي بحمل وتبقي ماما لأجمل طفل؟ مش ده اللي فرحتي لما سمعتي اول نبض قلبه اول مرة فرحتي بلحظة الولادة لما حضنتيه فرحتي بتطوراته يوم عن يوم بيكبر ادامك بكلمة ماما واللعب والبراءة

ولادك نعمة تستحق الشكر وشكر النعمة إنك تتعلمي ازاي تربي وتبقي حريصة على كده وتبذلي الوقت والجهد كمان

كلمتين على الماشي
دمتم بخير❤️

#نصائح_تربوية