نصيحه من القلب للي على وجهه نفاس الله يقومنهن بالسلامه

والله اخواتي اليوم قريت موضوع عن النفساء وطرت على بالي قصة امي مع متاعب الارحام وقلت خلني اقولها لاخواتي نصيحه لوجهه الله . امي الله يطول بعمرها عانت سنوات من متاعب الارحام لا وفقر الدم وهشاشة العظام والصداع وكثرة السوائل والرطوبه والروائح الكريهه وانتن بكرامه اللي ملازمتها حتى يوم كبرت و انقطعت عنها الدوره والسبب بعد مشيئة الله هو عدم العنايه بنفسها ايام كانت نفاس وهالكلام مو معالجه الي قالته لها لا هذا كلام الطبيب يوم سقطت اخر مره قبل حوالي 10 سنوات قالها ياماما انتي ارحامك صارت مثل التغليف النايلون الرقيق ومو متحمله واي حمل بعدين راح يضر بحياتك خصوصا ان جسمك تعبان ويوم سألته امي عن السبب قالها اكيد انك ماتتغذي التغذيه الكافيه ايام ولاداتك السابقه عشان تعوضين كل الفيتامينات والمعادن اللي ضاعت منك بالحمل والولاده ومع كثرة الولادات يتعب جسمك وارحامك اكثر واكثر يعني تراكم المشكله و الي ماتتغذى بالنفاس مايبين عليها الحين يبين عليها بالمستقبل ياكبرت غير كذا امي ماكانت تهتم بتطهير المنطقه الحساسه ايام النفاس مما زود عليها الالتهابات ومع تقدم العمر تنقص المناعه وتزود الالتهابات اكثر والله حبيباتي انا ماابي اخوفكن بس حبيت انصحكن عشاني اشوف بعض الحريم ماياكلن ولا يتغذن بالنفاس عشان مايسمنن وغير كيذا يخافن يستخدمن اي مطهر للمنطقه الحساسه حتى الملح والماء والارطه يخافن منه . والله من وراء القصد