نظامي الي اتبعه في نفاسي الحين حامل بالرابع وكل من شافني يخطبني وحده واثقه

السلام عليكم بنات كيفكم كل مادخلت واشوف بنات محتارين وش يتبعون في النفاس تراه ماهو اختراع والله الشغله سهله لو نفكر بس ونرجع لجداتنا وش كانو يستخدمون كان عرفنا الصح المهم مابطول عليكم زي ماقلت لكم في العنوان وعن تجربه انا والي اعرفه برنامج سهل ومايكلف والله تطلعين عروس وبخير بقول لكم كل شي عنه بسم الله نبدء
1- اهم شي التمر تحطينه على النار بعد ماتشيلين النوى وتحطين عليه ينسون رشاد وحبه سوداء وتتركينه لين يذوب كله وطلعيه واحفضيه في علبه وبعد الصبح مباشره خذي منه وحطيه في المكرويف واذا طلعتيه حطي عليه سمن بعدين بشرح لكم طريقه السمن كيف تسوينها واشربي معه كاسه حليب بالعسل والحلبه المطحونه الحلبه بس العشرين الايام الاوله وبعدها العشرين الاخيره الفلف الاسود حلو
2-بعدها ب4ساعات يعني على الساعه 9 سوي لك قرص بر ورشي عليه ينسون حلبه رشاد وبعد مايستوي قطعيه وحطي عليه سمن وعسل وسوي لك حبتين بيض مسلوق وكاس قشرقهوه وبالعافيه وروحي الرقدي لين الساعه 2
3- فتره الغدء افضل شي الايام الاوله يكون مرق لحم طازج ورشي عليه فلفل اسود وكمون وكلي معه مرقوق او جريش او قرصان مراصيع انا عندي الاشياء الي بالبر احسن شي يعني سوي جدول كل يوم شي
4-فتره مابين العصر والمغرب اشربي اعشاب افضل شي زي القرفه زنجبيل يانسون قشر القهوه بابونج وكلي معها حلى فطاير اي شي تبينه بس اهم شي الجوع ماتجوعين
5-العشاء افضل شي يكون اي نوع من الشوربات زي العدس الحب الخضار المهروسه الكريمه انا احيانن كنت استخدم حقت ماجي الجاهزه اسهل لي بس اهم شي ترشين عليها فلفل اسود وكمون
6-اشربي عصيرات خاصة المفيده زي البرتقال بس مايكون حامض الرمان كوكتيل انا كان زوجي يجيبها طازجه من محلات العصير عاد وش كثرها عندنا
7- اذا شفتي البيت نام والنونو نام عاد انتي روحي الحمام وتنقعي في ملح او ارطاء او قشر رمان مع مر او زنجبيل كلها حلوه وتخليك مرتاحه واذا عندك كريمات لنفاس للبشره حطيها ونامي وانا امدح لكم خلطت الزيوت للبشره الي اهي زيت خروع للجسم مع زيت اللوز وجنين القمح وزيت الجلسرين تخلطينها مع بعض وتدهني فيها كل يوم شي والله العظيم وبشرتك احلى شي الزبادي اخلطيه مع نعناع او شوفان وحطيه على البشره لين يجف ودلكي به البشره ونومي العوافي
8-احس اني قرقرت كثير الي ماتبغي البيض المسلوق سوي لك بيض عيون على السمن ورشي عليه حلبه
9-السر هنا وصلنا له يقولون جداتي الله يسعدهم السمن والمرق الطازج حق اللحم اهو سر نشاطهم لين الحين وصحتهم خاصه للنفاس والله العظيم عن تجربه يابنات هالجدول
10-كل 3 ايام حطي مره مع فنجال قشر القهوه واشربيها سوي لك مساج للبطن باي زيت نامي على بطنك لمده ساعه يومين وتحتك مخده العشرين الاخيره سوي لك قشر رمان مطحون وملعقه صغيره مع العسل وكوريها وابلعيها لاتنسين السفوف سوي لك علبه وحطيها عند راسك الي اهي يانسون وماش وحبه سوداء فلفل اسود كمون رشاد وزنجبيل
11-انا ماكنت الف بطني ولاشي وكنت بعد شهر اسوي تمارين خفيفه للبطن وش بعد ياربيه طريقه السمن يابنات لاتفوتونها جيبي زبده كبيره وحطيها على النار وملحيها اذا ماهي مملحه وشوي دقيق في الملعقه عليها واذا تبين تحطين عليها حلبه بودره شوي بكيفك المهم خليها لين تذوب وتطلع فقعات منها يعني تغلي بشرط على نار هاديه وطفيها بعدين وحطيها بعلبه وخذي منها اذا احتجتيها مفيده مع قرص البر والعسل الاصلي
12-ابتعدو عن الحوامض والاكل الي يكون الطماط فيه كثير والموز بعد والايدامات الي حمراء مره والملوخيه والباميه لاتقولون وش خلت فيه ايدامات من غير طماط كثير نسويها وكلي فواكه عشان البشره وسلامتكم ادعو لي بس الله يفرج علي ويرزقني بالولد الصالح ان شاء الله اذا بغيتو شي راسلوني على الخاص لاني انسى ومارجع للمواضيع