العطاوية @alaataoy

عضوة فعالة

نظامي في النفاس +نصائح مهمه عن تجربه طازه لي 20 يوم في النفاس

حياكم الله وبياكم حبيباتي
بداية اهنئكم بعودة الملك حفظه الله لنا
عدت إليكم من جديد بعد نصائحي للحوامل في الشهر التاسع ليكون ممتع والولادة ميسرة بإذن الله
أنا الآن لي 20 يوم من ولدت وودي اقدملكم خلاصة تجربتي في هذه الأيام:
بعد الولادة مباشرة انتي بحاجة إلى حليب حار وشربة دجاج وخبز بر يمسك بطنك ويريحك
لا تستخدمين أي خلطات واعشاب وغسولات لمدة اسبوع خلي الدم ينزل بطبيعته وراح تساعدك على التخلص منه السوائل الساخنه من حليب وحلبه وزنجبيل وقرفه وشربه واكثري منها خاصة شربة دجاج ومعاه رشة حلبه وفلفل اسود
إذا كنتي تشعرين بألم في المنطقة بعد الولادة وهذا طبيعي التنظيف يتعب لأني لاحظتهم يستخدمون الشاش للتنظيف وهو خشن يتعبك بعد الولادة والحل تجلسين في ماء دافي والله العظيم يسحب الآل بشكل مو طبيعي طبعاً في الصيدلية تاخذين حوظ قد المرحاظ بس تشيلين الغطا وتركبينه وخذي املاح البحر الميت وحطي نصف البكت واجلسي 10 دقائق وراح تلاحظين الراحة وكأنه يمص الألم استمري عليه الثلاث الأيام الأولى فقط لأن كثرة استخدام الماء يفك الخيوط وراح ترجعيله بعد 15 يوم يكون الجرح التأم وتخيط الجسم مابقا غير الخيوط فيفضل إنك تجلسين في الماء عشان تطيح الخيوط أو تروحين للدكتورة تطمنين على الخياطة وهي تفك الخيوط والراحة بعد ماتطيح يطيح معاه الهم
نرجع للأسبوع الأول هو اهم شي إنتي بحاجه لعناية خاصة من غذاء وراحة ولابد من احد يساعدك في الطفل ولا تنسين شرب المر جرعات بسيطه ورضعي طفلك من تشوفيه لاتقولين مافي حليب وتعطينه كم مره وخلاص تنتظرين يومين ثلاث لين ينزل الحليب وهذا إللي كنت اسويه في ولاداتي السابقه هذه المره رضعتها واستمريت وحسيت بنتي تلقى حليب حتى يوم مرت ثلاث ايام حسيت الوضع طبيعي ماانتفخ صدري مثل كل مره لأنها تسحب اول بأول
واهتمي بالفطور بعد الفجر تمره بالرشاد وقرفه وزنجبيل وفلفل اسود كلها شوي حتى الرشاد لأن الرشاد في العشرين الأولى ماتكثرين منه لأنه ينشف وغير هذا لو جاك امساك تتعبين بسبب حبيباته خروجها متعب كأنها امواس تجرح فتحت الشرج اكرمكم الله ولو حصل اجلسي على طول في ماء دافي وترتاحين وتفطرين على عصيدة بالتمر وهي الأفضل الإسبوع الأول خلي كل شي خفيف وسريع الهضم عشان مايسببلك امساك لأن الإمساك ممكن يفك الخياطه
بعد اسبوع تستمرين على الأكل وتستخدمين اللحم وتاخذين الأعشاب إللي متعوده عليها أنا بصراحة استخدم اعشاب من قبل مااتزوج ومناسبتني تسويها حرمه اعرفها واثق فيها اخذها وأنا مطمنه ملعقة في الليل والصباح مع حليب واستمر على استخدام اللفلفل مع الشربه
طبعاً الفطور فيه فطور أول وثاني الأول عصيدة وممكن تسوين كيكة دخن تجلس عندك كم يوم ماتخرب حطيها في حافظة كل ليلة عندك وفي الصباح خذي قطعة مع كاس حليب مع اعشاب وقبل ماتفطرين من أول ماتولدين خذي ملعقة عسل مع سبع حبات حبة البركة
ولو نمتي لا تنامين بعد الاكل على طول راح تطلعلك كرش اجلسي ساعة مع مولودك رضعيه وغيرليله ولاعبيه
ونامي ومتى ماقمتي ممكن 10 أو 11 افطري خبزة بر مع عسل وسمن أو زيت زيتون أنا افضل العسل مع زيت الزيتون خاصة لو كان الزيت معصور طازج الله يجزاه خير جارنا اهدانا كيلو قبل اولد ويوم ولدت اشتريت منه طبعاً هو اردني والزيت ذكر في القرأن يعني له فوائد افضل من السمن يكفيك مايسمن وهذا إللي لاحظته علي إلى الآن ماسمنت ولآني ما اكثر في الأكل أهم شي ما اجوع وامشي في البيت وبعد ثلاث اسابيع اصبحت امارس حياتي طبيعيه بس ما اجهد نفسي لأن الحركة فيها بركة
وبعد الفطور جهزي ثلاجة قشر مع زنجبيل ويانسون ونانخه وقرفه وتمر وترى التمر المطبوخ ينظف الرحم والغدا مرقوق أو مرق
والعصر ثلاجة اعشاب ينسون أو قرفه أو زنجبيل أو حليب إللي يناسبك
والعشاء فته أو مرقوق او عصيده أي شي فيه برر أو مشويات من باب التغيير أو شربة العدس تدر الحليب وتقوي العظم وبعد ماتستوي رش عليها بقدونس مفروم يدر البول ومفيد للمسالك
وبعد العشرين كلي من أي شي عدا الممنوعات وانتم عارفينها يعني ممكن تاكلين رز أو فول أ صالونة خظار وسلطة من غير ليمون أو خفيف جداً وكبه وتراها مفيدة لأنها تحتوي على برغل ولحمه وصنوبر كلها فايدة أنا اشريه مثلجة من سورية ومتى مابغيت قليتها
وإذا كان حليبك مايدر خذي حلاوة طحينية وإذا جيتي ترضعين تأملي مولودك وداعبي شعره وحني عليه عشان يدر الحليب واحمدي الله وإنتي تتأملينه على هذه النعمه إللي بين يدينك غيرك مالقاه ويتمناه الله يرزق كل محرومه لاتنسين تدعيلهم لحظتها
وحسسي نفسك خلصتي النفاس عشان ترتاحين ومارسي حياتك طبيعي من غير خروج واشكري الله في كل لحظة وراح تعيشين سعيدة لأنه يزيدك من خيراته اللتي لا تعد ولا تحصى حتى النوم إذا حطيت راسي على المخده احمد ربي عليه لأنه يريحنا من عناء اليوم
( اللهم لك الحمد حتى ترضى ولك الحمد إذا رضيت ولك الحمد بعد الرضى )
والعشرين الخيرة اجلسي في موية ومر وملح وقشر رمان ولو ودك تتبخرين خليها مره كل ثلاث أيام يعني مو كل يوم واهتمي بالمناطق المسمرة نظفيها كل يوم بقطنه مبلوله بمحلول منظف بالليمون وراح تلاحظين السواد يطلع في القطنة ومع الإستمرار راح تروح
ولكم عندي خلطة راح اسويها واقلكم نتائجها مجربه من قبل صديقها عزيزة
بنزل موضوع عنها قريب
اتمنى استفدتو مني ولا تنسوني من دعواتكم الله يصلحلي ابنائي ويسخر زوجي ويرزقنا ببيت العمرعاجل غير اجل

45K

يلزم عليك تسجيل الدخول أولًا لكتابة تعليق.

تسجيل دخول

طبشوره صفراء • 13 سنة

شكرااااااااا

ليان ورزان • 13 سنة

مشكوره ياعسل على النصائح الحلوه********

مصقوعه بورده • 13 سنة

الله يجزاكي خير

@مناير@ • 13 سنة

انا اللحين لي والده 36 يوم بس احس للحين بالتعب الارهاق من اي مجهود وبسالك كم سؤال لو سمحتي:
1-بعد ماطهرتي نزل منك مويات خفيفه؟انا للحين تنزل مني خصوصا اذا حطيت تحميلة المر تتوقعين ليش؟؟؟؟ومتى راح ينقطع؟؟ظ
2-الظهر يالم مره مع اني مستمره بحبوب الكالسيوم
3-بطني ماراح اذا لبست ضيق يبين وش السوات؟؟؟
4- شعري تساقط مره انتي صارلك كذا؟؟
وانا استخدمت خلطات والحمد لله جابت نتائج مره كويسه احس جسمي نظف وبيض منها
وشكرا

حبي الأبدي • 13 سنة

الله يسعد قلبك ويجعل كل حرف كتبتيه في ميزان حسناتك ..كلامك حلو وريحني كثيييير..
لاني على وجه ولاده وهموم الدنيا على قلبي..
والله والله حبيتك .. ياليتك جارتي ..
الله يصلحك احوالك وعيالك ويسخر لك زوجك ويرزقك بيت في الدنيا وقصر في الجنه..