نظام جدتي الله يطول بعمرها بالنفاس الله يجعله علم ينتفع به ..

شفت وحدة تسأل عن أدوية النفاس وكتبت هذا الرد الا اني حبيت اكتبه بموضوع مستقل لتعم الفائدة بإذن الله ..

اول شيء تروحين محل عطارة ثقة ومشهور بنظافة منتجاته وتشترين منه 10 اشياء
وهي ..
حلبة. مطحونة _رشاد غير مطحون _ حبة سوداء _ فلفل اسود _ كمون _ قرفة _ زنجبيل _مرة _ قهوة قشر _ فلفل ابيض .. (بكميات بسيطة تكفي يعني من كل شيء بخمسة الا الرشاد والحلبة خوذوا كمية شوي كبيرة بعشرة تقريبا )


الادوية هذي كلها حطيها عند راسك بالكمودينه الي جنب سريرك .. الي بتجلسين فيه طول الاربعين ..
الحلبة تاخذينها 20 يوم الاولى .. تسفينها سف مع الحليب كل يوم ملعقتين ..
الكمون والفلفل الاسود اضيفيه على الاكل.
القرفة والزنجبيل اضيفيها على قهوة القشر لاجيتي بتشربينها ..
المرة اغسليها زين وخوذي منها شوي وحطيه بعلبة زجاجية نظيفة وصبي عليها مويه دافيه واتركيها عند راسك كل ماجاكم زوار شميها واشربي منها نتفه..

إذا خلصتي العشرين الاولى اعجني تمر كثير تقريبا كيستين تمر خلاص انزعي النوى عنه واضيفي خمس ملاعق كبار مليانات من كل شيء ماعدا الحلبة والمرة والقهوة
وبالنسبة للرشاد اضيفي كل الكيس فوق عجينة التمر.تقريبا اضيفي كاستين كبار منه على التمر.. واعجنيها زين وسويها كور وكولي منها كل شوي وبأي وقت ..
العسل .. جدا جدا مهم ومفيد اشتري العسل الاصلي من عطارة معروفة ومشهورة .. الي تجيك العلبة ب500


النصايح ماتقل اهمية من الادوية ..
اهم شيء لاتجوعين ابدا ترا مايخرب البنت الا الجوع بوقت الدورة وبوقت النفاس يخليها وسيعه ويدخلها الهوا ..
لا تتربعين بالجلسة طول الوقت حاولي تلمين رجولك وتلبسين سراويل طويلة ولا تفصخين الفوط حتى لو نشفتي ومافي دم لانها تمنع ان شاء الله دخول الهواء ..
إذا خلصتي الاربعين استخدمي التحاميل المهبلية ..
للأسف بنفاسي الاول مااستعملتها لجهلي بأهميتها ..
بعد ماتخلص فترة النفاس تجي اخت النفاس والي هي اول دورة شهرية , عادي امشي على نفس نظام العشرين الاخيرة .. جدا مهمة هالفترة يابنات لاتهملونها جدتي كانت تقول لي اخت النفاس ان لقت زين تشينه ، او ان لقت شين تزينه ..
بمعنى انه لو. خربطتي بنظام النفاس بهالوقت هذا ممكنا تتلافين وتتعدل امورك .. والعكس صحيح يعني لو كنتي جدا مهتمه بنظام النفاس واهملتي نفسك بالدورة الاولى الي تجي بعد النفاس مباشرة ممكن تخرب عليكي كل الي سويتيه ..


تراني صغيرة ولاعندي ذاك الخبرة لكن جدتي الله يجزاها الجنة بنفاسي بولدي صلوح تركت بيتها وقعدت معي نفستني هي وامي ، وعرفت كل شيء منها .. دعواتكم لها ان الله يشفيها ويمد في عمرها على الخير والطاعة ..

الاكل .. اعتمدي الكبدة الطازجة واللحم المسلوق مع مرقة اللحم والبيض المسلوق والحليب اشربيه بكثرة. عشان تلتئم جروحك بسرعة لان مايعيد بناء انسجة الجسم التالفة الا البروتين .. وقالوها الاولين مايلم اللحم الا اللحم ..

الي تستفيد من الموضوع ياليت تدعي لي بالولادة السهلة الميسرة .. وبخيري الدنيا والاخرة ..
الله يوفق الجميع ..