طريقة عمل التحاميل

على فكره هذي طريقتي ومقاديري

المقادير :

1- 3 ملعقه كبيره ونص مره مطحونه
2- 3 ملعقه كبيره محلب
3- من 3 ونص الى 4 ملاعق كبيره عسل نحل طبيعي ( لازم طبيعي مو من السوبر ماركت )
4- 3 فناجيل قهوه ممسوحه ملح فارسي ناعم

الطريقه :

1- نغسل المره ونتركها في مصفاة وبعدين نحطها في صحن ونخليها تنشف وبعدين نطحنها
2- نغسل المحلب بنفس طريقة المره ونطحنه
3-نغسل الملح الفارسي ونتركه في مصفاة لين ينشف ( اذا مانشف ننشفه بحذر بكلنكس ) بعدين نكسره بالهاون الحديد الى قطع صغيره وبعدين نطحنه ناعم
4- نغسل الايد عدل عشان ماتتلوث التحاميل او ممكن نستعمل القفازات النايلون بعد مانغسلهم طبعا ( لان ريحة المره على الايد ماتروح بسهوله )
4- في صحن عميق نحط المره والمحلب والملح ونضيف 3 ملاعق عسل ونحرك وبعدين نضيف الملعقه الرابعه تدريجيا ( يمكن يكفي 3 ملاعق ونص او 4 ) المهم تحسين ان الخلطه صارت ثقيله وماتلزق ( بالنسبه لي انا ضفت 4 ملاعق عسل ) ونخلطهم عدل
5- نبلل سبابة الايد اليمين بشوية ماي ( موتكثرين ) وتاخذين كثر حبة النوى وتسوينهم نفس حبة النوى بس لاتسوين اطرافها حاده وصفيها في صحن كبير مغسول عدل من الصابون ومنشف من الماي
6- حطيهم في مكان فيه تيار هوا لمدة يومين وشمس او لين ينشفون وطبعا لازم تغطينهم بمشخاله كبيره او خام تور
7- بعدين حطيه بعلبه ولاتحطينهم بالثلاجه لانهم نشفو عدل

ملاحظات :

- انا توني سويتهم وان شاء الله ينشفون واقدر احطهم بعلبه ولايذوبون مع ان شكلهم صلب ومتماسك لدرجه تمنيت اولد عشان استعملهم
- تقريبا هالكميه بتعطيج من 80 الى 100 حبة حسب الحجم اللي بتسوينه
- حاولي تخلين كل التحاميل نفس الحجم تقريبا

السلام عليكم ورحمة الله وبركاته

الله يجزاك الف خير وعافية على هالموضوع أختي لا تنسوا اسرانا

لأنه فعلا في جهل كثير بين الحريم بهالأمور ،، وفيه كثير ما يحبون طاري الأدوية الشعبية ،، مع انها هي الأفضل لعلاج المشاكل النسائية...
واتوقع اللي تقرا الموضوع راح ترتاح نفسيا وتفكر انها تجربه ،،، وتدعي للأخت فيافي على معلوماتها ولك على ترتيبك وتسهيلك للموضوع...

عني انا بآخر اسبوع من حملي باقي على موعد ولادتي تقريبا ثمانية ايام
وجهزت وصفة فيافي ،، وإن شاءالله راح اجربها ،، لأني لقيت كل مكوناتها عندنا بالرياض (عطار البحرين + عطار الكويت) .
بس حبيت اسئلك اختي لاتنسوا اسرانا
اكيد سمعتي بربط البطن اللي يسوونه الاندونيسيات.
قالته لي شغالتي واشغلتني فيه ،،، وقالت يكون طوله عشر امتار ويلف بطريقة معينة من اسفل البطن إلى أعلى البطن تحت الصدر على الطول..
شريت القماش وكان نوعيته قاسي شوي وصلحته لي ،،، بس محتاره حيل فيه ،،، ايش رايك؟؟ اجربه؟؟
له سلبيات؟؟؟ يعني ممكن يسبب لي ضرر ؟؟ لأن مثل ماتعرفين هو يضغط على البطن بقوه وتجلسين فيه الاربعين يوم كلها...
انتظر نصيحتك..
والله يهون على كل وحده تنتظر مولود جديد..

السلام عليكم ورحمه الله وبركاته

جزاج الله خير إختي لاتنسو أسرانا

ملف رائع ومرجع لبنات حواء

وناويه اتبعه انشاءالله بالنفاس بس ادعو لي الله يرزقني بالذريه الصالحه :) <==== تزهب الدوا قبل الفلعه ههههه

اختي انا الحمدالله ماعندي مشاكل لاني اهتم حيل بالدوره
واتبع اغلب الاشياء اللي ذكرتوها مع شرب الطبيخه من اول لاخر يوم بالدوره والطبيخه مثل مانتي عارفه تحتوي على الحلبه وصراحه قريت مواضيع تقولون انها ترخي !!!

حتى اني اكلها مع القبوط والمرقوق واضيف لهم الحبه السوده واي اعشاب متوفره عندي

يعني اتجنبها ولأ شلون ؟؟ مااحس انها سببت لي ضرر والله خايفه كلامكم شككني فيها

امهاتنا وجداتنا يمدحونها ويقولون زينه وتنظف الارحام

اتمنى توضحين لي

يا اختج انااا خواااااافه حيييييل من هالامور

بنات لاتنسون العصيده زينه لانه معروف تنسد نفسج عن الاكل وقت الدوره وطعمها حلو وبعد التمر مع الرشاد والسمن تاكلينهم باي وقت ايام الدوره

طريقه العصيده :

1 كوب طحين
1/2 كوب سكر
3-4 كوب ماء

فلفل اسود + زعفران + حلبه حسب الرغبه

ملاحظه يمكن الاستغناء عن الحلبه

الطريقه:

يحمس الطحين الى ان يصبح لونه ذهبي ويوضع على جنب

يوضع الماء على النار ويضاف له السكر والفلفل والحلبه ثم تضاف كميه الطحين تدريجيا مع التحريك حتى لا يتكتل
ويترك على النار لمده ساعه حتى تستوي العصيده

تحطينها في صحن او جدر بس تغطينها وتااكلينها دافيه

واكيد لو بغيتي تقدرين تاكلين مع العصيده مردود بس حطي شويه سمن مو زيت عادي على العصيده ورشي كميه قليله من المردرود
وطعمها جنااااااااااااااااان ولاتحسين بطعم الادويه المر
جنج تاكلين حلوى بحرينيه <--- يؤؤؤ يالتشبيه عاااااد

وهني عافيه على قلوبكم يا حلوات :)

تحياتي لكم :26:

بنات لاتنسوني من دعائكم

عليكم السلام ورحمة الله وبركاته
جزاج الله خير والله يعافيج يارب ويهون عليج
فعلا هم انا قالتلي اندونيسيه كبيره في السن وطيبه بس ماسالتها على طريقة اللف بس قالت قماشه طويله وطبعا اللف يكون من تحت لفوق
وتوكلي على الله وخليها تلفج .. وياليت تعلمج شلون تلفه وتعلمينا لاني فعلا اتمنى الاقي اندونيسيه تعلمني
والخام افضل من الحزام والمشد الطبي اللي يرخي الرحم .. لان الخام يرفع الرحم
ومافي داعي تضغط عليج حيل .. بس اهم شي شيليه وقت النوم وفيه ناس يشيلونه وقت الاكل
وانا شريت خام بس 5 امتار من النوع السترش وان شاء بشوفلي وحده تعلمني الربط
بس مادري من متى تربطه .؟؟ فيه ناس قالو من ثاني يوم وناس قالو من سابع يوم .. انتي اساليها افضل .. والافضل تربطين طول الاربعين عشان الكرشه تروح
حياج :26:

الجـوهـرة

عليكم السلام ورحمة الله وبركاته .. وجزيتي بمثله ان شاء الله والله يرزقج انشاء الله قولي امين
بالنسبه للحلبه لاتبالغين فيها وتستعمل اول 3 ايام بالدوره اذا مخلوطه واول يومين اذا كانت صافيه
لانها ترخي الرحم وتمتن وتطلع ريحه وتسبب رطوبه
وانتي ماحسيتي بالضرر للحين لانج ماجبتي عيال للحين .. ويمكن لانج مهتمه بنفسج
ومشكوره على طريقه العصيده بس الافضل تسوينها بالتمر لان السكر مايفيد بالعكس ماتلتئم الجروح بسرعه
وفعلا طريقتج لذيذه انا ذايقتها كنت اضيف لها سمن ومردود وتساعد على بلع المردود لان طعمه بايخ .. بس احس انها تمتن
وانا كاتبه طريقة عصيده التمر
والعصيده افضل شي على الريق بعد الحليب واللهوم
ومافي داعي للحلبه لان المردود فيه حلبه

وجزاج الله خير على الاضافه المهم اختي
حياج :26: