نظام لتكوني جميلة على الدوام

لتكوني جميلة يعني ان تكوني نظيفة وانيقة على الدوام
والنظاافة والجمال ماتحتاج لا وقت ولاجهد



العناية بالشعر شعرك داائما وابدا هوا اطار صورتك وشخصيتك
عن نفسي على رغم انه شعري ناعم لكن مااستغني عن اليوكو انام واصحى واتروش وشعري مازال نااعم كالحرير
ووقت ماابغى اطلع لمناسبة مااشيل هم شعري ابدا

عيبه سعره الغالي وميزته انه تحتاجيه مرة في السنة او في السنتين
انصح به وبشدة مع الانتباه اول 3 ايام الشعر لاتربطي عليه بغطوة ولا بكلة ولاشباصة والافضل طبعا تروحي وقت الدورة لانك ماراح تغسليه 3 ايام
المكانين الافضل والمعتمدة من اليوكو
مانا سنتر وسمى سنتر
سعره على حسب طول الشعر
تقريبا ليا يكلفني الف ونص واحيانا الفين وانا مايوصل لنص ظهري
وفي الغالب يكون لازم تروحي الثلاث ايام للمركز يعيدولك عليه عشان النتيجة تكون بيرفكت وكأنك مستشورة طول الوقت
حلو للعرايس
نصيحة اللي تبغى تسويه تبتعد عن الحنة والصبغة السودا والبني الغامق والميش لانه ماحينفع معاها
وتصبغه قبل اليوكو باسبوعين واعتقد اللون البني بدرجاته يناسب كل البشر ات كل لون وله درجة تناسبه وابدا مايقدم



نجي للحواجب


عن نفسي احب اكون دايما مزبطة حواجبي يا اما بقلم حواجب او صبغة من اول مااصحى من النوم


نجي لطريقة تجميل الحواجب

كل وحدة وقناعتها بس انا اشوف مو عشان ازبط حواجبي انطرد واتلعن بقص او نتف
التشقير عندي طريقة خاصة فيه اني اعيد التشقير مااغسله الين اشوف لونه راح الصفار واختفى ومشقري المفضل جولان


صبغة الحواجب في صبغة معروفة دايما موجودة في النهدي وماقد دورت عليها في غيره
فيه منها كذا لون ودرجة وانا اللي تعجبني وتناسبني فيهم البني المتوسط
لاني مااحبها تكون سووودا وغامقة ولامرة فاتحة
الغامق بمبالغة يعطي قساوة في مظهر وملامح الوجه
والفاتح ماينفع الا للصبغات الفاتحة جدا
اسمهrefecto cil
تقريبا يدوم اسبوع لعشرة ايام اذا خليتيه على حواجبك الين ينشف


نجي للوجه الوجه والرقبة يلزمها نفس العناية واسبوعيا تحتاج تقشير خفيف
للنقاط السودا عندي طريقة دايما تنفع
الليفة المغربي حطي فيها الصابون او الصابون المغربي
وافركي خشمك بحركات داىرية صغيرة وبشكل خفييف الين تشوفي اللمعة في خشمك تعرفي انه نظف لاتفركي بقوة حتى مايتقشر


تقشير الجسم له طريقتين كل وحدة اجمل من الثانية وانتي واللي يناسبك


اولا المغربي
وكلكم تعرفو طريقته

وادا مافيكي للمغربي او مايزبط معاكي
زبدية وحطي فيها الزيت اللي تحبيه وملح وقبل لاتبللي جسمك افركي جسمك كله وشوفي النظافة واللمعة والرطوبة
وادعيلي

ادا حابة ريحة حلوة ممكن تظيفي دهن تحبي ريحته وادا حابة تظيفي ليمون للخلطة لنظافة افضل



الاظافر اقرف شي في الدنيا الاظافر المبالغ في طولها
وفي اعتقادي المرأة الانيقة اللي دايما اظافرها مرتبة وفي طول متوسط او شبه طويلة مااطيق الاظافر الطويلة واشمأز من شكلها

وكل وحدة وزوقها بس الاظافر حلو لها شي جميل من بودي شوب على شكل فرشة بعد ماتنقعي اظافر يدك او رجلك في موية شبه حارة مع صابون افركي اظافرك فيها او استخدمي الطريقة اللي انا افضلها
بالليفة المغربي افركي كل ظفر لوحده بشكل دائري حتلقي الجلد الميت راح وايدك فرقت عن اول
لنعومة يدك حلو قناع الموز لليد جدددا والترطيب المستمر ويدك تدل على عمرك واهتمامك لاتهمليها



اظافر رجلك نفس النظام ولو الجفاف عرف طريق لرجلك ماراح تخلصي
في كل استحمام افركي اسفل القدم وفي النص وفرك خفيف عند الاصابع ورطبيها باي مرطب تختاريه وابعدي المرطب عن المنطقة بين الاصابع لانه يعجزها بسرعة واتصاحبي مع الشراب خليه رفيقك وماحتندمي


ازالة الشعر للبنات اللي مايقدرو على الشمع والحلاوة لاي سبب كان
في بعض البشرات عندها قابلية للتبقع يعني اي الم او صقعة او اصابة على طول يأمر في جسمها وفي بنات مايناسبهم الواكس والحلاوة وتطلع لهم حبوب



عندك حلين اما الليزر
او الموس لكل مناطق الجسم ماعدا الابط

الليزر لو تعرفي مركز معتمد وموثوق وعندك مادة واستعداد لكل الجلسات اتوكلي على الله مع العلم انه ممكن يرجع الشعر مع الحمل والازالة ليست نهائية ولكن 85 % وهذا اكثر من حلو

اللي بتعاني من الحبوب والتبقع من الحلاوة والشمع والفتلة والالة مابقي قدامك الا الامواس وفيه انواع جيدة اسألي عنها وخلي عدتك دايما جاهزة الامواس حتحتاجيها كل عشرة ايام زيها زي صبغة الحواجب
الجسم بشكل عام شهريا يحتاج تقشير عميق




اختصارات:
دايما خلي ادواتك كاملة في الحمام من عدة الاظافر والتقشير والشعر في شنطة خاصة بيكي

دايما خلي كريم اليد في المكان اللي تقضي فيه اغلب وقتك حتى لو كان المطبخ

كاختصار للوقت والجهد جيبي علبة وحطي فيها كريمات الترطيب او اللوشن واذا حابة التفتيح اخلطيها مع نسبة من كريمات التفتيح يسير في كل ماترطبي جسمك تكوني بتفتحيه كمان واختصرتي الجهد والكسل

يعني مثلا زبدة الكاكاو من فازلين حطي معاها كريم الدوكين وخليها في حمام استخدميها بعد الحمام



افضل قناع جربته وله مفعول جميل للجسم والوجه
مقادير متساوية من الترمس المطحون والفول الناشف المطحون والعدس المطحون مع عسل وموية ورد العسل على قد ماتحبي اهم شي يكون لزوجة معتدلة


اسأل الله ان ينفعكم وان يجنبني الاثم في نصيحة الحواجب يعلم الله اريد النصيحة للبنات اللي ينمصو وادورلهم على البديل الطرد من رحمة الله عشان كم شعرة جعلنا الله واياكم من اهل الجنة