نظام نفاس يرجعك بنت 15 سنه ويطلعك قمر

صباح الخير للحلوين .. :biggrin2:

هذا نظام للنفاس شامل واللي تمشي عليه بالحرف الواحد أضمن لها جسم رشيق و مرسوم وتطهر من النفاس وهيا مرتاحه و بعد النفاس تقل أيام دورتها يعني اللي تكون 7 أيام تسير 5 أيام لانو الوسخ و الدم المتجمد كلو نزل منها في النفاس ومايكون عندها ضعف دم وبتتهنى في بشره نظره وصافيه ومورده وشعر صحي وحيوي

هذا النظام من صحبة أختي جنسيتها الاصل حضرميه بس ماخذه جنسيه كينيه وبنفاسهم كذا يسو وربي أمي شافتها بزواج بعد نفاسها جات تقولي لو شفتيها ماشاء الله ماتصدقي انها عندها طفلين الله يحفظها من كل شر وهيا قالت لأختي أستخدمي هذا النظام بنفاسك
يلا نبدأ :

1) أبتعدي عن المعجنات و الباميه و الموز والمانجو والحبحب و أي مشورب بارد و آي سكريم و الشبسات و الشوكولاته و الخرابيط كلها و الخيار و الطماطم

2) الاكثار من اكل السمك و الشوربه و المرق و السلطات الخضراء زي ( بقدونس + كزبره + جرجير + خس + سبانخ + زعتر أخضر اللي بالكيلو )

3) الاكثار من اكل العصيده الحضرميه معروفه وتنباع في المحلات


4) دهان الجسم بزيت زيتون يوميا 40 يوم بحركات دائريه هذي الطريقه تشد الجسم واللي تستمر ع زيت

الزتون حتى بعد ماتخلص النفاس جسمها بيكون مشدود ولمن تدهن صدرها تسوي مساج للصدر كذا الصدر

بيكون مشدود حتى لو ترضع ولدها وبعد النفاس اللي تبغى عنايه واهتمام ورياضه تدخل ع موضوعي

( عنايتي بشعري و ببشرتي لعيون كل اللي طلبوها  )

( ان شاء لله بكره أنزلكم طريقة الرياضه الكامله اللي أنا أسويها يوميا )

5) دهان الشعر بزيت سمسم يوميا 40 يوم ويغطى بطاقيه ( هيا زي القماش تجيكي بمحلات العبايات أو اي محل

بالسوق الشعبي وفوقها تلبسي الطرحه فهمتو واكبر غلط لمن تلبسو الطرحه المنقشه الشفافه وتبينو الشعر

لانو كذا يدخل الهواء في الأذن ويجي صداع في الراس وممكن يستمر الصداع بعد النفاس بس لو لبستو

الطاقيه ولو كانت طويله يعني تغطي الأذن يكون أفضل بس لو قصيره يعني فوق الاذن يسير جيبو مناديل

قطعتين صغيره وغطو فتحة اذنكم فيها ألبسو الطرحه .. لاتغسلو الشعر الا بعد 15 يوم يعني كل يوم حطو مسحات من الزيت ع فروةه راسكم مع مساج


6) المشد الاندنوسي بعد 4 ايام من الولاده

تربطو من تحت الصدر الين الفخذ بقماش قطن طويل وفوقو المشد الاندنوسي تاخذوه من بقالة الاندوسين

يوميا هذي الطريقه لآخر يوم في النفاس طبعا هذا للي ولادتها طبيعيه واللي عمليه تربط بعد اسبوع أو اسبوعين

7 ) لبس بنطلون قماشه قطن ( اللي هو زي الاسترنش مليان بكل الأسواق وفي ألوان كثيره وكل وحده

تجيب لون يناسب لبسها ) تلبسوه بعد 7 ايام من الولاده .. ولاتسوي حلاوه الا بعد 40 يوم لانو غلط المسامات تكون مفتوحه والشعر بيرجع يطلع بسرعه و الافضل انو بعد ال 40 يوم تسو حمام مغربي بعدو بيومين تسو حلاوه ..


8 ) لبس الشراريب يوميا الثقيله حق السراميك موجوده بكل مكان ماتنزلوها الا وقت دخول الحمام الله يكرمكم ولمن تخرجو رطبوها بزيت زيتون وألبسو الشراب






24 ساعه كل يوم تسو قهوة قشر تخلوها تحت السرير أو جنبكم وكل شويا تشربو منها

1) تجيبو قشر تحمسوه على النار شويا وتطحنوه بس يكون طحن خفيف يعني القشور تكون نصها مطحونه طحن خشن ونصها لا زي ماهيا بس ضغطه وحده بالطاحونه و أرفعو يدكم بعدين تاخذو ع حسب حجم الثلاجه وتغلوها 5 دقايق على النار وتطفو النار بعدين تصفوها في الثلاجه بالصفايه ..

2) كيلو تمر معجون ( يعني منزوع النواه ومعجون زي العجينه ) + نص كيلو زيت سمسم

أعجنوه مع بعض تمام وحطوه بعلبه وكل ماجعتو كلو منه طول الوقت مع قهوة القشر

3) أكله اسمها ( المديده )

دقيق أسمر (دقيق بر ) + حليب سائل اي نوع ( أبو 4 ريال )+ حلبه محوسه الافضل قصيميه ( يعني نحمصها ع النار )

أول شي ننقع الدقيق في مويا مغليه ونكب فوقه الحلبه ونجيب حليب ونخليهم يغلو ع النار شويا ونحط عليهم شوية زيت أو زبده أو سمن نخليهم يغلو زي الشوربه ونصفيه بالصفايه وتجو في علبة ولمن تعطشي تشربيه زي قشر القهوه ..

ضروري انك ماتجلسين جوعانه أبدا كل ماجعتي كلي من التمر و أشربي قشر القهوه و المديده

في الصباح على الريق :

المقادير :

1) كيلو زبيب أسود( أفضل شي اليماني وتلاقوه بمحلات المكسرات وبالمخيمات اللي هيا البزارات اللي يبعوها اليمنى فهمتو بكل مناطق السعوديه ) + كيلو يناسون + كيلو سكر أحمر ..

تاخذو نص الكميه وتفوروها ع النار الين يسير ثقيل زي العسل تقريبا وتشربوها بعد التصفيه مع اضافة مويا شويا بس والباقي ينحط بعلبه وتشربوه قبل النوم


2) ربع كيلو شمار أو شمر كذا اسمو + ربع كيلو حبة سوداء ( اللي هيا حبة البركه لونها اسود معروفه عند الكل) + ربع هرد ( الخشب الجاوي يجي زي الزنجبيل الطازج موجود في بنده وبقالة الاندنوسين ) + ربع كيلو زموده ( أو زموته أو زومته كذا اسمها )+ ربع كيلو عسل كشميري ( تقريبا الكيلو ب 30 ريال ) ولو كان العسل الحضرمي الأصلي أفضل

المقادير كلها تتطحنوها بالطاحونه حق البهارات وتخلطوها مع بعض في الخلاط وتاخذو قفشه من العسل يعني تكون كمية العسل مقدار نص علبة جبنة بوك الكبيره المهم حركوه تماااااام وكل يوم في الصباح على الريق تاكلو ملعقه كبيره ..




( في الليل قبل النوم )

سكر أحمر + قرفه + زومته ( أو زموته أو زموده كذا اسمها عند العطار ما أعرف اي اسم ثاني لها
تفور زي القهوه العاديه يعني تغلوها على النار ولازم تكون ثقيله زي العسل وتشربوها )


( بعد 7 أيام من الولاده )

دهان الجسم بزيت زيتون بعدين فوري أو أغلي مويا وطفي النار وحطي فوقها شويا من مر الفطير اللي هو المره في البانيو خليه لمن يسير شويا دافي أجلسي فيه كذا تنزل الاوساخ و اللي ماعندها بنيو تجلس في كروانه كبيره

( بعد 15 يوم )

تجيبي مويا حاره تنقعي فيها شوية من مر الفطير أو المره لمن تدفئ حطيها في قارورة المويا نص كاسه يوميا الين ولمن تخلص سوها من جديد ( يلم الجروح ويمسك الرحم تمام )

( بعد 20 يوم من الولاده )

نغلي حليب بالطريقه العاديه بعدين صبيه في الكوب وجيبي حبة بيض بلدي كسريها فوقه مع ملعقه صغيره عسل و أشربيه بأي وقت ( يرفع الرحم ويرجعو مكانو عشان مايكون رحمك نازل ويجيكي هوار وبلاوي )

( بعد ماتنفتح الخياطه )

تتبخري ببخور النفاس ( هيا تجيبو من اليمن ) بس انتو أتبخرو باي بخور تعرفوه حق النفاس و اكتبو بقوقل بخور النفاس اقرو المواضيع واللي يناسبكم أستخدموه ..

( 15 يوم الأولى مرق دجاج )

تاكلي الدجاجه كامله وتشربي المرقه + سلطه خضراء يوميا .. ( لو تحطي ملعقه زيت سمسم في المرقه يكون افضل )

( 15 الثانيه اللي بعدها )

لحم مرق وبنفس طريقة الدجاج + سلطه خضراء يوميا

والايام الباقيه تعيد نفس الشي مره لحم ومره دجاج

والعشاء سمك ..

رجاء اقرؤ الموضوع كلو تمام لاتساألو اي سؤال جوابو يكون بالموضوع ..