اخواتي الغاليات حياكن الله بموضوعي الاول هنا
والله اني سوف اضع بين ايديكن كنز
نصيحتي لكــ اكملي الموضوع للاخر وسوف تندهشين
من واقعك وبأذن الله من هنا سيبدأ التغيير الايجابي
قبل البدايه ابتسمي وانتي تشاهدين موضوعي
ابتسامه داخليه قبل البدء
واستمتعي بعصير النعناع والليمون الباااااارد
وعليه تلج زياده لزوم الروقاااان ع الاخررررررررر
وكمان قبل ماابتدي حابه اقولكم على شغله
انو موضوعي اجزاء وطويل
يعني حكتبو براحتي لانو واقعي ومن صماصيم
قلبي يعني الشغله مو خدني جيتك
انتو طولو بالكم واستمتعو بكل جزء وطبقوه
وصدقوني حتشوفو سعاده مابعدها سعاده
وترى من دحين اقولكم الموضوع مو قصه
الموضوع نصايح ودروس دحين حتشوفو عن ايش بالزبط
كيف تتعاملي مع الحياه بكل مافيها بأبتسامه
وقناعه وتقولي للعصبيه باي باي
من ناس وبزورتك وجارتك وشغالتك
وامك واخواتك ونفسك وحنركز على عيلتك
الصغيره خاصة اطفالك سواء صغار او مراهقين
ومن دحين يابنات ترى ماحتكلم عن الزوج
عشان موضوعي مختلف وماخصو نهاااائي
والقسم مليان نصايح
فلاتفهموني غلط انا وضحت كل شي ودحين
نتوكل على الله ونبدا موضوعنا
اول حاجه حابين نتعرف عليها
هيه القناعه والرضى
البيوت مليانه هموم ومشاكل
ومافي بيت خالي
والانفس مشحونه والمعاناه بكل اشكالها
زارت كل الناس صغير وكبير
والقدر ماشي رضينا او سخطنا
طيب ياحبايب قلبي
انتي كل يوم بتجري ورى شغلك
الي بنظرك مايخلص
اطفال وزوج وبيت وتنظيف ووووالخ
وفوق دا ودا لازم تظهري بصوره حسنه
وابتسامه وماتصرخي عليهم وتهدي وتروقي
اكيد هادا الطلب مستحيل وصعب
لكن في موضوعي حتتعلمي حاجات مجانيه
طبقيها وماتبخلي على نفسك
وصدقيني حتعيشي مبسوطه وراضيه ومبتسمه
مهما واجهتي بحياتك
كيف.....!!
تخيلي نفسك في الموقف دا
اتخانقتي مع اختك وكبرها
الشيطان وكبرت ودخلتي
غرفتك لقيتي كل اغراضك
مرميه على الارض ومكسره
والحاله يرثى لها
طبعا مو بالشكل دا ههههههههههه
بس قريب منو
طبعا التصرف الطبيعي او الي متعودين
عليه من عرفنا الحياه
انك حترجعي لاختك وتتشابكي معاها
او ممكن توصل لاكبر من توقعاتنا
وتكبر وتكبر والنتيجه ندم من الطرفين
بس اللبن المسكوب...!!
يرجع للكاس؟؟؟ مايرجع والله مايرجع
لذلك حنتفادى الموقف قبل ماينكب اللبن
يمكن تقولو صعب كلامك
صعب التطبيق والكلام سهل وهاتي من الكلام
الي دايم نسمعه
لكن اوعدكم ان التطبيق سهل بس اوعدوني
تجربوووو ...
انا تعرضت لمتل هالموقف قبل الزواج
تعرفو ايش سويت والله اني سكت الين
خلصت شفتو كيف يعني شايفتها
الموقف اصعب بكتييير لانو قدامي
طنشت وسكت واتفرجت
لما خلصت وراحت غرفتها قفلت غرفتي بالمفتاح
كنت مستاءه لكن مو غضبانه ابدا
والله انتي كنت ابتسم من الداخل
مو لان الموقف عاجبني والا ماعندي دم
او احساس لكن عندي سر والسر يكمن
في قلبي
تبغو تعرفوا السر ..؟؟؟
اول حاجه تعرفو كيف تصرفت وحقولكم السبب
قفلت الغرفه وانا مستاءه على اغراضي
وقلت اعوذ بالله من الشيطان الرجيم 3 مرات
واستغفرت ربي مرتين تلاته
ودخلت المطبخ شربت مويه باااااارده
وجلست افكر كيف اتخلص من الحوسه
وانا انسانه مااحب الشغل ولاعندي شغاله
استهديت بالله اولا
بعدين دخلت غرفتي بعد حوالي 3 ساعات
وجلست اشيل الاغراض وانا مبتسمه
ابتسمت اقل حاجه اقدمها لنفسي
لموقفها البطولي اني ابتسم وخلصت الشغل
وروقت الغرفه وانتهى كل شي
يمكن تقولو مو شرط تضاربي معاها
او ممكن تتفاهمي معاها او تجبريها بأي طريقه
ترتب المكان لانها غلطانه
بس صدقوني دا كله ماحيصير مانفشت الغرفه
عشان ترتبها وماحتجي الامور ببساطه
وماحترتبها ولاتتفاهم وكلنا محشونين على بعض
بترتيبي للغرفه انتهت المشكله وانقطع طريق الشيطان
الاصح انبتر
طيب دحين اقولكم المعينات الي سهلت عليا المهمه
اولا الاستعانه بالله والتعوذ من الشيطان
ترى مو كلمات بتنقال والله مفعولها جبار
تانيا والاهم ايش هيه اغراضي
ساعه غاليه والا طقم الماس انكسر
واذا ؟؟؟ ان شاءالله الجدار بكبره طاح
طالما الموضوع خساير فلوس ومافيها ارواح ولا اجساد
خلاص كلو يتعوض دا كان معين ليا بعد الله
حتى دحين في بيتي ومع بزورتي مهما يكبو
ومهما يكسرو والله اني انظرهم نظرة المستاء
لكن لايمكن ازعل منهم والله كل الي يطلع مني
انزل لتحت عند وشهم واقولهم المفروض
مثلا ماتكسرو وتلعبو هنا وافهمهم الصح من الغلط
واجيب المكنسه وانظف وايش الي راح؟؟
وسخ دنيا والله لو قيمته مليون ماتسوى القطيعه
او كسر نفس طفل او جرحها او ضربه
بتقولو هادي ضروريات وبفلوس ويدوب جبناها
بقولكم طيب هل الصراخ والضرب والمشاكل او حتى الزعل
والعصبيه يرجعو الي راح؟؟؟
من هنا نفتح صندوق الكنز ونمسك
اول نصيحه ...
طبقيها والله حتندهشي من النتايج
عاهدي نفسك
قولي مهما مرت عليا مواقف يوميه
عصير انكب فستان انحرق
جارتي قالت عني امي جرحتني
طفلي كسر ساعتي الغاليه
اختي كسرت اغراضي
اخويا استقوى عليا وضربني او حتى زعلني
كل دي المواقف احسميها بأبتسامه
اتعاملي مع الموقف بقمة الهدوء والبرود
عادي اجلسي شيلي المكسور
وكنسي وامسحي الي انكب
وتجاهلي اغلاط وجرح الاقارب
لاتقولي ماتقدري جربي وبعدها استنى ردك
الانسان قوه خارقه يقدر يسوي المستحيل
للموضوع تتمهــ ــ ــ ــ