نظره لازم تتغير...ان شالله

بسم الله الرحمن الرحيم
حبيت اكتب عن شي نعاني منه في المجتمع
وهو وضعنا* كمنفصلات او مطلقات
يعني الي لاحظته من تجربتي الي مريت فيها والحمدلله ربي لطف
ان اي احد يعرف عن الموضوع يطلعوني انا الغلطانه
يعني مثلا
وحده من قريباتنا تسال امي ليش وش فيها فللانه (الي هي انا)
قالت امي ولله ربي ماكتب توفيق
تخيلو وش ردت عليها

مافي شي اسمه توفيق
في شي اسمه غصب
ترجع معه غضب عليها بغته ولا مابغته وش ذا البنات يحسبون الزواج لعبه

انا اتكلم عن نفسي وعن الي اعرف حالتهم وهم زي وضعي
الى متى البنت نتعامل معها* بالغصب
الحياة الزوجيه اساسها *الموده والرحمه وهذا شي في القران مذكور
مو اساسه الغصب

وبعدين احنا تزوجنا وماكتب ربي *نصيب وش نسوي نقعد ونجيب اطفال ونربيهم تربية الله اعلم فيها وكل هذا الشي بالغصب
ليش
زوجات الرسول فيهم مطلقات وفيهم ارامل(وهم يعني* افضل النساء)
وبعدين الى متى نظره الرحمه والشفقه لنا

يعني في يوم اجتمعنا مع العايله وجلسنا على العشا
اشوف قريباتي يناظروني وانا اسولف واضحك اشوف بعيونهم شفقه
يحسبوني امثل الوناسه والسعاده
ليش....ابالعكس احنا سعيدات مو كلنا لكن معظمنا انشالله
انا اقولكم
تاكدو ان الوحده اذا تطلقت عن رغبه منها راح تكون اسعد بكثير من حياتها الاوليه
بالذات الي تعبت خلال مده قصيره او الي ذاقت العذاب في مده طويله في النهايه
ارتاحت ولله الحمد

انا ماانكر ان الناس تغيرو شوي عن المطلقات وفي معاملتهم وكل مره يتحسن المجتمع اكثر
بس ولو
ابعدو نظرات الشفقه والرحمه
وتاكدو ان حياتنا الان افضل مليون مره من الاولى
صح انها تغيرت
وتغير الوضع مره
لكن ولو
في نقطه المفروض كلن يعرفها
راحة الانسان هي الزم ماعليه
اذا انا اخاف ربي واعرف ان اي شي كاتبه ربي مو بيديني اغيره
اذن راحتى وطمأنينتي وسعادتي الزم ماعلي
واذا انا لم ااجد في زواجي اي توفيق وهذا بيد الله(مو تتخانقين انتي وزوجك وتقولين ربي ماكتب توفيق,لا عدم التوفيق شي اعظم بكثيييييييير من ماتتخيلون)

اذن الطلاق هو الحل الوحيد لي
بعدين في شي ثاني بعد لاحظته
المتزوجات بعضهم طبعا يخافون من المطلقات يعني كاننا نذير شؤم او كانناا بنخطف ازواجهم
ليش كذا
انتي كان ممكن تصيرين زي اوضاعنا في يوم من الايام(الله لا يقوله)لكن ارادة ربك اختارت غيرك

بنات اخوات وصديقات
ياليت كلنا نغير نظرتنا تجاه المطلقات
خلاص الدنيا تغيرت والاوضاع ماعاد هي مثل اول
ياليت نساهم في تغير المجتمع لشي افضل ونترك عننا ترهات واشياء ماكانت موجوده



معليش بنات
انا فيني شي براسي وودي اطلعه معكم لانكم خواتي ومالي متنفس الا منتدانا الله يخليه لنا ويخليكم لي

ياريت تشاركوني