نعمه ام نقمه

السلام عليكم ورحمة الله وبركاته
مساءكم ورد وعطر
خواتي ماراح اسوي مقدمه وراح ابدأ مباشره بالمشكله
اولا قبل لا اقول المشكله لازم اقولكم شوي عن شخصيتي قبل علشان تقدرون تفهمون القصه انا شخصيتي هادئه ومسالمه ماأحب المشاكل ودمعتي قريييبه مرره اذا دخلت بنقاش على طول تنزل دمعتي وبعدها ارتبك وماأعرف ارد واذا احد اتهمني لو كذب قبل لاأتكلم تأخذني العبره وابكي على طول ضعيفه مأقدر ادافع عن نفسي دايما بالنقاشات اما ابكي او انسحب يعني بالمختصر ماأقدر اواجه احد حتى زوجي لو تهاوشنا على اي شي على طول ابكي وهو شمالي يكره الدموع والضعف رحوممه مرره اذا شفت اي احد تعبان او محتاج او مهموم بعد على طول دمعتي تنزل حتى الحيوان ارحمه واذا دعيت الله سبحانه وهذا اجمل شي ابكي بعد ماهي هذا المشكله
اللي صار اني كنت البس نظاره عندي قصر نظر فرحت للدكتور علشان اسوي تشطيب لعيوني فقالي عندي بعد انحراف ولازم اسويلك عمليتين مع بعض ليزر مع تعديل انحراف سئلت كثير وكل اللي سألتهم قالو سهله ويوم وانتي طيبه وواحسن لك وومن هالكلام
توكلت على الله وسويتها وطبعا سوى لي الليزر واستخدم المشرط بعيني علشان تعديل القرنيه واول ماسويتها يابنات نزل من عيني ماء قسم بالله ماتوقعت كل ذا بالعين واستمر ينزل يوم كامل يكب كب واخذت اسبوع كامل وعيني مااقدر افتحها الجفن لازق ببعضه نشفت وصرت من بعدها على القطره المرطبه برضو ماهي هذي المشكله اللحين عيوني تمام واشوف فيها الحمدلله
المشكله يابنات اني بعد العمليييه تغييرت شخصيتي ١٨٠ درجه صار مافيه شي يبكيني
صرت لما اتناقش مع احد عادي ماتنزل دموعي وبالتالي مارتبك ولا يتغير صوتي واكمل النقاش وانا اضحك لو احد اتهمني مااخاف اني ابكي لا ادافع وانا مسترخيه على الاخر بدون خوف ولا شي حتى زوجي لو تناقشت معه او هاوشني عادي ماتأثر ولا ابكي واناقشه عادي فصار يحبني اكثر ودايم يقوللي انتي قويه صارت لي مواقف كثيره مع اهلي ومع معلمات ومع اهل زوجي طبعا مواقف نقاش وكنت اكمل النقاش معهم عادي وانا اتبسم بكل اريحيه فكنت الا حظ على وجيهم الخوف والارتباك وبالاخير افوز وصار الكل يهابني ويحترمني فالان خواتي وامي واهل زوجي وحتى عيالي يقولون انتي تغيرتي صرتي قوييه ولا يدرون وش السبب
خلاص صرت ماابكي الا قليل استغفرالله بس
في موت او مرض احد ابنائي فقط
بس المشكله اذا دعيت الله اللحين قليل ابكي وانتم تعرفون ان البكاء يزيد الخشيه وفييه دعاء لي ٤ سنين ادعي وماأستجاب الله لي ودايم اتذكر دعاء الرسول اللهم اني اعوذ بك من عيين لا تدمع وقلب لا يخشع ودعوه لايستجاب لها
وبصراحه اللحين متحسفه على العمليه صحيح اني اول ضعيفه بس كنت اذا دعيت استجاب الله لي
مادري يابنات هل انتم تشوفونها نعمه ام نقمه وليش وشكرا لكم مقدما